سه‌رچاوه‌: ماڵپه‌ڕی نەوا

وەزارەتی پێشمەرگەی هەرێمی كوردستان رایگەیاند، شەوی رابردوو هاوڵاتیانی سنوری گوندێكی مەخمور هێرشێكی چەكدارانی داعشیان تێكشكاندوەو پەلامارەكەی چەكدارانی داعش بۆ سەر ئەو گوندە بێ زیان بوە.
وەزارەتی پێشمەرگە لە بەیاننامەیەكدا رایگەیاند، شەوی پێنج شەممە چەكدارانی داعش هەوڵیانداوە دزەبكەنە ناو گوندی (عەلی رەش) لە سنوری ناحیەی "باقرت"ی سەربە قەزای مەخمور، بەڵام خەڵكی گوندەكە، كە سەرجەمیان كوردن،‌ رێگرییان لێكردون و شەڕ لەنێوانیان دروست بوە.
وەزارەتی پێشمەرگە ئاماژەی بۆ ئەوەشكردووە، كە داعش نەیتوانیوە مەرامەكەی جێبەجێ بكات و هیچ زیانێك بەو گوندەو دانیشتوانەكەی بگەیەنێت، لە ئەنجامدا پەلامارەكە شكستی هێناوەو چەكدارانی داعش ناچاركران بەرەو مۆڵگەكانیان هەڵبێن.