میدیا- كه‌ركووك:  

هه‌رێمی كه‌ركووكیYNDK  به‌شداری كۆبوونه‌وه‌ی فراوانی حزب و لایه‌نه‌كان سه‌باره‌ت به‌ڕه‌وشی كه‌ركووك و رێككه‌وتن له‌سه‌ر دیاریكردنی پارێزگارێكی كورد بۆ ئه‌و شاره‌ ده‌كات.

ئەمڕۆ یەكشەممە رێكه‌وتی 21/7/2024 هه‌ڤاڵ مه‌سعود سه‌عید نوێنه‌ری هه‌رێمی كه‌ركووكی یه‌كێتی نه‌ته‌وه‌یی دیموكراتی كوردستان YNDK،  به‌شداری كۆبوونه‌وه‌ی حزب و لایەنە كوردستانییەكان لە پارێزگای كەركووك ده‌كات، له‌ كۆبوونه‌وه‌كه‌ لایه‌نه‌كان جەختیان كردەوە كە دەبێت كوردێك ببێتە پارێزگاری كەركووك. بۆ ئه‌م مه‌به‌سته‌ حزب و لایەنە كوردستانییەكانی پارێزگای كەركووك بە مەبەستی رێككەوتن و دیاریكردنی پارێزگارێكی كورد بۆ كەركووك  و هاندانی هاوڵاتیان بۆ خۆ تۆماركردن له‌ سه‌رژمێری پارێزگای كه‌ركووك، هاوڕابوون كۆبوونه‌وه‌كان به‌رده‌وامی هه‌بێ، دوای كۆبوونەوەكەش حزب و لایەنە كوردستانییەكان لە كۆنگرەیەكی رۆژنامەوانیدا راگەیەنراوێكی هاوبەشیان بڵاو كردەوە.

راگەیەنراوە هاوبەشەكە خۆی لە سێ خاڵی گرینگ دەبینێتەوە كە بریتین لە:

یەكەم / داوا لە لایەنە براوەكانی ئەنجوومەنی پارێزگاری كەركووك دەكەین، بە زووترین كات حكومەتی خۆجێی كەركووك پێكبهێنن بۆ خزمەتكردنی شاری كەركووك بە هەموو پێكهاتەكانییەوە.

دووەم / سەرجەم حزبە كوردستانییەكان كۆكن لەسەر ئەوەی پۆستی پارێزگار پشكی كوردە و دەبێت بۆ كورد بێت.

سێیەم / سەرجەم حزبە كوردستانییەكان هاوڕابوون لە كاتی پێویستدا كۆبوونەوەی بەرپرسی یەكەمی حزبەكان لە پارێزگای كەركووك ئەنجام بدرێت، مانگانەش كۆبوونەوەی پەیوەندییەكان بەبەردەوامی ئەنجام بدرێت.

هه‌ڤاڵ مه‌سعود سه‌عید كارگێڕی هه‌رێمی كه‌ركووكی YNDK كه‌ له‌ كۆبوونه‌كه‌ به‌شدار بوو به‌ میدیای راگه‌یاند:  گرنگه‌ له‌م قۆناغه‌ سه‌رجه‌م لایه‌نه‌كان لە كەركووك لە گفتوگۆدا بن بە مەبەستی رێككه‌وت و دانانی پاریزگارێكی كورد له‌به‌ر ئه‌وه‌ی كه‌ركووك كوردستانیه و ده‌بێ پارێزگاره‌كه‌ی كورد بێت‌ و له‌م قۆناغه‌ گرنگه‌ لایه‌نه‌ كوردستانییه‌كان به‌رگی حزبایه‌تی فرێبده‌ن و بیر له‌چاره‌نووسی كه‌ركووك و خه‌ڵكه‌كه‌ی بكه‌نه‌وه‌ و له‌سه‌ر ئه‌م پرسه‌ هاوڕابن و بگه‌نه‌ رێككه‌وتن.

رۆژی 11ی ئەم مانگە، یەكەمین كۆبوونەوەی ئەنجوومەنی پارێزگای كەركووك بەڕێوەچوو، كۆبوونەوەكە بە كراوەیی هێڵرایەوە تا لایەن و پێكهاتەكان رێك بكەون و لە ماوەی مانگێكدا پارێزگارێكی نوێی هەڵبژێرن و پۆستەكانی دیكەی پارێزگاكەش پڕبكرێنەوە.