میدیا - هەولێر

 مه‌كته‌بی سیاسیی یەکێتى نەتەوەیى دیموکراتى کوردستان YNDK به‌بۆنه‌ی یه‌كگرتنه‌وه‌ی هه‌ردوو حیزبی دێموكراتی كوردستانی ئێران و حزبی دێموكراتی كوردستان په‌یامی پیرۆزباییان ئاڕاسته‌ ده‌كات، له‌ په‌یامه‌كه‌دا هاتووه‌: ئه‌م یه‌كگرتنه‌وه‌یه‌ ‌ ده‌ستپێكی قۆناغێكی نوێی خه‌بات و تێكۆشانه‌ له‌ رۆژهه‌ڵاتی كوردستان و هه‌وێنی سه‌ركه‌وتن و به‌دیهێنانی ته‌واوی مافه‌كانی گه‌لی كوردستانه‌ .

ده‌قی په‌یامی پیرۆزباییه‌كه‌:

بۆ بەڕێز ده‌فته‌ری سیاسی حیزبی دێموكراتی كوردستانی ئێران

بابەت / پیرۆزبایی

سڵاوی سەرخۆبوون‌و ئازادی ...

     به‌بۆنه‌ی یه‌كگرتنه‌وه‌ی هه‌ردوو حیزبی دێموكراتی كوردستانی ئێران و حزبی دێموكراتی كوردستان به‌ناوی خۆمان‌ و تەواوی ئەندام ‌و لایەنگرانی یەكێتیمان YNDK، جوانترین پیرۆزباییتان ئاڕاستە دەكەین ‌و خوازیارین ئه‌م یه‌كگرتنه‌وه‌یه‌ ببێته‌ هه‌وێنی سه‌ركه‌وتنی بزاڤی سیاسیی نه‌ته‌وه‌ییمان له‌ رۆژهه‌ڵاتی كوردستان.

بەڕێزان : حیزبی دێموكراتی كوردستانی ئێران وه‌ك حیزبی دایك له‌ رۆژهه‌ڵاتی كوردستان  هه‌میشه‌ رێبه‌رایه‌تی شۆڕش و راپه‌ڕینه‌كانی ئه‌و به‌شه‌ی وڵاتی كردووه‌ و له‌گه‌ڵ لایه‌نه‌ سیاسییه‌كانی دیكه‌ خاوه‌ن سه‌ركه‌وتن و سه‌روه‌ری نه‌ته‌وه‌كه‌مانن و خودان هه‌زاران قوربانی و شه‌هیدن‌ له‌ پێناوی  به‌ده‌ستهێنانی مافه‌كانی گه‌لی كوردستان، ئه‌م یه‌كگرتنه‌وه‌یه‌ ده‌ستپێكی قۆناغێكی نوێیه‌ و ده‌بێته‌ هۆی زیاتر خورتبوونی خه‌بات و تێكۆشانی نه‌ته‌وه‌كه‌مان له‌ رۆژهه‌ڵاتی وڵات له‌پێناو رزگاری ئازادی ئه‌م به‌شه‌ی كوردستان.

 ‌ئەوەی لەم قۆناغەی ئەمڕۆشمان گرنگە یەكریزی و تەبایی سەرجەم هێزو لایەنەكانی رۆژهه‌ڵاتی كوردستان و سەر لە نوێ‌ داڕشتنه‌وه‌ی نه‌خشه‌ی خه‌بات و تێكۆشانه‌ بۆ خۆئاماده‌كردن بۆ هه‌ر ئه‌گه‌ر و پێشهات و گۆڕانكارییه‌ك كه‌ له ‌ناوچه‌كه‌ رووده‌دات.

 له‌دووماهیدا جارێكی  تر جەخت  دەكەینەوە سەر زیاتر توندوتۆڵكردنی پەیوەندی  برایانەی نێوانمان و سەرجەم هێز و لایەنەكانی هەموو به‌شه‌كانی كوردستان .   

هەر سەركەوتوو بن .... لەگەڵ رێزماندا.

مەكتەبی سیاسی

یەكێتی نەتەوەیی دیموكراتی كوردستان YNDK

22ی ئابی 2022ی زایینی