غەفوور مەخموورى بۆ گۆڤارى (گوڵان) : ئافرەتی كورد هەمیشە لە ئافرەتی نەتەوەكانی دی ئازادتر بووە

- هزرو ئایدیۆلۆژیا هاوردەكان كاریگەری نێگەتیڤیان هەبووە بۆ هێشتنەوەی ئافرەت لەو دۆخەی ئێستادا
 
گوڵان - هەولێر :
 
غەفوور مەخمووری سكرتێری گشتیی یەكێتی نەتەوەیی دیموكراتی كوردستان YNDK، لە دیمانەیەكیدا لەگەڵ گۆڤاری گوڵان، باس لە ڕۆڵ و پێگەی ئافرەتی كورد دەكات و، جەختیش لەوە دەكاتەوە كە باوەڕی تەواوی بە ماف و ئازادییەكانی ئافرەت هەیە، پێداگرییش لەسەر ئەوە دەكات، كە هەتا ئافرەت ئازاد نەبێت لە دەربڕینی خواست و مافەكانی و وەدەستهێنانیان، كۆمەڵگە پێشناكەوێت و لە دواكەوتووییدا دەمێنێتەوە.
گوڵان : تۆ وەك سكرتێری پارتێكی نەتەوەیی ، ئەوەت لا ئاشكرایە هەتا ئافرەت ئازاد نەبیت نەتەوە ئازاد نابێت .. بەڵام لە نووسینەكانت كەم ئەم پرسە گرنگە دەبینرێت، بۆیە دەپرسم, ئایا پرسی ئازادی ئافرەتانی كوردستان لای تۆ چۆن دەخوێنرێتەوە؟
غەفوور مەخموورى : روانین بۆ ئازادى ئافرەت لە کۆمەڵگەیەکەوە بۆ کۆمەڵگەیەکى دیکە دەگۆڕێت، ئەوەش پەیوەستە بە تێگەیشتن لە بنەما دیموکراتى و ئازادییەکان، ئافرەت لە کۆمەڵگەى کوردستان لە رابردوودا لە زۆربەى زۆرى بوارەکانى ژیان رۆڵێکى کاراى هەبووە، بەشدار بووە لە کارکردن و بەڕێوەبردنى ماڵ و پەروەردەکردنى منداڵ و زۆر جاریش رۆڵى رێبەرایەتى بینیوە خانزادى سۆران و حەفسە خانى نەقیب نموونەى بەرچاوى ئەو بوارەن، چەندین ئافرەت لە ژیانى پێشمەرگایەتى و کارى رێخستن و حزبایەتیى و سیاسەت رۆڵى کارایان بینیوە، ئەوە لە رابردوودا وا بووە، بەڵام بەداخەوە ئێستا وا نییە، تارادەیەکى زۆر هەوڵدراوە، ئافرەتان لەسەر بنەماى حزبى بهێنرێنە پێشەوەو کاریان پێبدرێت، نەک لەسەر بنەماى تواناو لێهاتوویى، ئەمەش کاریگەرى نیگەتیفانەى هەبووە بۆ سەر کارو خەباتى ئافرەتان، ئێستا لە کۆمەڵگەى کوردستان زۆر ئافرەتى بە تواناو لێهاتوومان هەیە لە تەواوى بوارەکانى کارگێڕى و بەڕێوەبردن و راگەیاندن و نووسین و بوارەکانى دیکە بەڵام کە حزبى نین ئەو بایەخەیان پێنادرێت کە بە ئافرەتێکى حزبى دەدرێت، کێشەکانى ئێمە لێرەدایە کەوا حزب کۆنترۆڵى هەموو کایەکانى ژیانى کردووەو بەشێوەیەکى دادپەروەرانەش مامەڵە ناکات ئەوەش زۆربەى حزبەکان دەگرێتەوە، ئەم شێوازە مامەڵەکردنە کارێگەرى خۆى هەبووە بۆ کەمکردنەوەى رۆڵى ئافرەت لە کۆمەڵگەدا و زۆر جاریش وای لێهاتووە ئازادییەکانیان پێشێل بکرێت.
من باوەڕى تەواوم بە ماف و ئازادییەکانى ئافرەت هەیە، تا ئافرەت ئازاد نەبێت لە دەربڕینى خواست و مافەکانى و وەدەستهێنانیان کۆمەڵگە پێشناکەوێت و لە دواکەوتوویدا دەمێنێتەوە، بۆیە پێویستە هەموو لایەکمان هەوڵبدەین و هاوکاربین بۆ وەدەستهێنانى ماف و خواست و ئازادییەکانى ئافرەت، ئەمەش ئەرکى دەزگا و دامەزراوەکان و هەموو تاکێکى کۆمەڵگەى کوردستانە.
گوڵان : كاتێك دێینە سەرباسی بیری نەتەوەیی كوردستان ، هەست دەكەین و فیكر و خامەی خانمانی كورد لەم پرسە گرنگەدا زۆر سنوردارە و زۆر كەم لە خانمان لەسەر ئەم پرسە گرنگە دەنووسن یان بیری لێدە كەنەوە، ئایا بەرای تۆ ئەمە بۆ ئەوە ناگەریتەوە كە لەناو فەلسەفەی بیری نەتەوەیی كوردستاندا ، ئافرەتان هەست ناكەن شوێنی شیاوی خۆیان هەبێت، یان بە دیوێكی دیكە ئافرەتان هەست ناكەن لەناو چوارچێوەی بیری نەتەوەیدا فەرامۆشكراون؟
غەفوور مەخموورى : ئافرەتى کورد لە بوارى نووسیندا زۆر کەم کارى لەسەر هزرو سیاسەت کردووە، خامەى ئافرەتى کورد زیاتر خزمەتى زمان و ئەدەبى کوردى کردووە، لە بوارى زمانناسى و لێکۆڵینەوەى ئەدەبى و رۆمان و شیعر و چیرۆک رۆڵێکى بەرچاویان هەیە، بەڵام بۆ لە بوارى هزرو سیاسەتدا خامەکەیان نەخستۆتە کار ؟ ئەش هۆکارى خۆى هەبووە، کۆمەڵگەى کوردستان کۆمەڵگەیەکى پیاوسالارییە و کەمتر بوارى بە ئافرەت داوە کەوا بیربکاتەوە و تێکەڵى کارى سیاسەت بێت، ئەمەش وایکردووە ئافرەتى کورد رێگەى خزمەتکردنى بوارى کلتور بگرێت، لەگەڵ ئەوەشدا دەبووا ئافرەتى رچەشکێنمان هەبوواو لەم بوارەدا دەربکەوتبایە.
گوڵان : كاتێك باسی بیری نەتەوەیی هەر نەتەوەیەك دەكرێت، باس لە زمانی دایك، پەروەردەی دایك دەكرێتەوە، ئەمەش مانای ئەوەیە قوتابخانەی یەكەم بۆ بیری نەتەوەیی ئەو دایكەیە كە رۆڵەكەی چۆن پەروەردە دەكات، باشە كە ئەمە گرنگی ژن بێت بۆ بیری نەتەوەیی, ئایا لەناو بیری نەتەوەیی كوردستانیدا پرۆژە بۆ ئازادی ژن دەبێت چۆن بیت؟
غەفوور مەخموورى : زمان ناسنامەى پاراستنى هەر نەتەوەیەکە، یەکەم قوتابخانەى فێربوونى زمانیش ماڵ و یەکەم مامۆستاى فێربوونى زمانیش دایکە، بیرى نەتەوەیى کوردى هەمیشە روانین و رێزى تایبەتى بۆ ئافرەتن و ماف و ئازادییەکانى هەبووە، بەڵام دەبێ ئەو راستییەش بزانین کەوا تیبەتمەدییەکانى کۆمەڵگەى کوردستان وایکردووە کەوا ئافرەت وەک پێویست پێشنەکەوێت و نەگات بە ماف و ئازادییەکانى ئەمەش دەگەڕێتەوە بۆ ئەوەى هزرو ئایدۆلۆژیا هاوردەکان کاریگەرى نیگەتیفیان هەبووە بۆ هێشتنەوەى ئافرەت لەو دۆخەى ئێستا، خاوەن پرۆژەکانى هزرو ئایدۆلۆژیاى هاوردە پشتیوانى و هاوکارى زۆریان هەبووە، بەڵام هەڵگرانى مەشخەڵى بیرى نەتەوەیى زۆر جار رێگریان لێکراوەو کۆسپ و تەگەرە خراوەتە رێگەى کارو خەباتیان، بە باوەڕى من پێویستە هەر تاکێکى کورد لە ماڵەوە کەشێکى گونجاو دروست بکات بۆ ئەوەى دایک لەسەر بنەمایەکى کوردانە و کوردستانییانە منداڵەکەى پەروەردە بکات، بۆ ئەمەش حکومەت و راگەیانى کوردستان دەتوانن رۆڵ ببینن بۆ وشیارکردنەوە لە مەترسى هزرو ئایدۆلۆژیا هاوردەکان بۆ سڕینەوەى مۆرکى نەتەوەییمان.
گوڵان : كاتێك سەیری میژووی نەتەوەكەی خۆمان دەكەین، دەبینین بە بەراورد بە نەتەوەكانی دیكەی دەوربەرمان، ژنی كوردستان ئازادییەكی زۆر زیاتری هەبووە و، دەكرا لەو میژووەوە ئازادی ژنی كوردستان زیاتر پێناسە بكرایە، بەڵام ئەوەی ئێستا دەیبینین ئەوەیە كە ئەو میژووە فەرامۆشكراوە، چی بكەین بۆ ئەوەی جارێكی تر میژووی كوردستان ئازادی ژنان پێناسە بكاتەوە؟
غەفوور مەخموورى : بێگومان ئافرەت کورد وەک لە سەرەتاوە باسمانکرد رۆڵێکى کاراى لە کۆمەڵگەى کوردستان هەبووە، بەڵێ ئافرەتى کورد هەمیشە ئازادتر بووە لە ئافرەتى نەتەوەکانى دەوروبەرمان، ئەمەش ئەو کاتە بووە کەوا هزرو ئایدۆلۆژیا هاوردەکانى ئێستا لە کۆمەڵگەى کوردستان کارا نەبوون، تاکى کورد نەکەوتبووە ژێر کاریگەرى ئەو هزرە ئایدۆلۆژیا هاوردانە، پێوێستە تاکى کورد لەسەر بنەماى باوەڕبەخۆبوون و پەیوەست بە خاک و نیشتمان و کلتوورى نەتەوەییمان پەروەردەو بینابکرێتەوە، ئەمەش دەبێتە سەرەتایەک کەوا جارێکى دیکە ئافرەتى کورد رۆڵى کوردانەى خۆى ببینێت و مێژووى کوردستانیش بە شێوەیەکى سەردەمییانە ئازادى ئافرەتان پێناسە بکاتەوە.
گوڵان : تۆ وەك سیاسەتمەدارێك ئاگاداری ئەوەی خەریكە بە هاوردەكردنی كۆمەڵێك ئایدۆلۆژیایی دەرەكی .. جوانی ژنی كورد بە ناوی ئیسلامەوە دەشوێنرێت و خەسەڵەتی كوردانەی ژنی كورد بزر دەبێت، ئەمە لەكاتیكدا بەشی هەرە زۆری شاعیرانی كورد مەلا و زانایانی ئیسلامی بوون و شیعرەكانیشیان بەشی هەرە زۆری بۆ پیشاندانی جوانی و ئازایەتی ژنی كورد بووە، ئایا بەرای تۆ ئەم ئایدۆلۆژیەتە هاوردەكراوانە تاچەند سیما و روخسار و جوانی و ئازایەتی ژنی كوردیان شیواندووە؟ تاچەند ئەم شێواندنە كاریگەری سلبی لەسەر بیری نەتەوەییمان دەبێت؟
غەفوور مەخموورى : زۆر بەداخەوە ئەوە هزرو ئایدۆلۆژیا هاوردانە کاریگەرییەکى زۆر نێگەتیفیان کردۆتە سەر کۆمەڵگەى کوردستان گەورەترین قوربانیش ئافرەتى کورد بووە، ئەو هزرو ئایدۆلۆژیا هاوردانە زۆرترین کاریگەرییان بۆ سەر ئافرەتان هەبووە، ئەمەش بۆتە هۆى ئەوەى زۆر جار شیرازەى خێزانیشیان تێکداوە، کۆمەڵگەى کوردستان لە رووى ئایینییەوە زۆربەى زۆرى موسڵمانن، لە رابردوودا کورد بە ستایلى کوردانە موسڵمان بووە، بەڵام ئێستا هەوڵدەدرێت کورد بە ستایلى تورکى و سعودى و ئێرانى موسلمان بێت و تایبەتمەندییە نەتەوەییەکانى بسڕێتەوە، ئەو جل و بەرگ و لەچکەى کەوا ئێستا لەلایەن هەندێ لایەنى ئیسلامى سیاسى کراوەتە مۆدێل بۆ ئافرەتى کورد زۆر دوورە لە تایبەتمەندى کوردانەو شێوانى دەستوورى جل و بەرگى کوردییە، ئەم جۆرە ستایلە هاوردانە هەموو جوانییەکى ئافرەتى کوردیان شێواندووە، ئەمە لە رووى دەرەوە، لە رووى ناوەوەش هەوڵدراوە کەوا لە جێى هزرى نەتەوەیى و نیشتمانى هزرى ئایینى بخرێتە مێشکى تاکەکانى کوردستان، وەک ئەوەى کێشەى ئێمە نەتەوەیى و نیشتمانى نەبیت و کێشەیەکى ئاینى بێت، ئەمەش زۆرترین کاریگەرى بۆ سەر ئافرەتان هەبووە و وایکردووە تاکى کوردى شێواندووەو بەمێژووى خۆى نامۆى کردووە، بۆیە پێویستە سنوورێک بۆ ئەو شێواندن و سڕینەوەى مێژوو و تایبەتمەندییە نەتەوەییەکانمان دابنرێت، ئەمەش لە رێگەى راگەیاندن و بەرنامەیەکى نیشتمانى دەکرێت.
گوڵان : هەموو سیاسەتمەدارانی كوردستان شانازی بەوە دەكەن دەستی دایكە شەهیدێك ماچ بكەن بۆ ئەوەی پیشانی بدەن كە ژنێكی قارەمان پیشمەرگەیەكی قارەمانی پەروەردە كردووە، باشە ئەگەر بپرسین چۆن وەبەرهێنان لە كچانی ئێستا بكەین ئەو ژنە قارەمانەی لێ بەرهەم بێت؟
غەفوور مەخموورى : گرنگ ئەوە نییە دەستى دایکە شەهیدێک ماچ بکەیت، گرنگ ئەوەیە دەتوانرێ چى بۆ ئەو دایکە شەهیدە بکرێت کە ئازیزترین کەسى خۆى بەخشیوەتە نیشتمان، گرنگ ئەوەیە ژنە شەهیدێک بە چاوى رێزەوە سەیر بکرێت و منداڵەکانى بێناز نەبن، ئێمەى کەى توانیمان ژن و دایک و خوشکى شەهیدان ئاسوودە بکەین و بە چاوێکى یەکسان سەیریان بکەین ئەو کات دەتوانین وەبەرهێنان لە کچانى ئێستا بکەین بۆ ئەوەی لە داهاتوودا کەسانى قارەمانیان لێ بەرهەمبێت، ئێمە پێویستیمان بەوە هەیە کەوا عەدالەتى کۆمەڵاتى فەراهەم بکەین، بێگومان کۆڵەگەى هەر دەسەڵاتێکیش عەدالەت و یەکسانییە، ئەگەر ئافرەتى کورد هەستى کرد لە کۆمەڵگەدا عەدالەت هەیە و رێزى لێدەگیرێت و بە چاوى یەکسان سەیر دەکرێت ئەوا هەمیشە خۆى بە سەربەرزو دایکى قارەمانان دەبینێت.
* ئەم هەڤپەیڤینە لە ژمارە (1281)ى رۆژى دووشەممە، رێکەوتى 9 / 8 / 2021 ى گۆڤارى (گوڵان)دا بڵاوبۆتەوە.