میدیا - هەولێر :

غەفوور مەخموورى سکرتێرى گشتیى یەکێتى نەتەوەیى دیموکراتى کوردستان YNDK پەیامێکى پیرۆزبایى ئاراستەى بەڕێزان مستەفا هیجرى لێپرسراوى گشتیى حیزبى دیمۆکراتى کوردستانى ئێران و ئەندامانى دەفتەرى سیاسیى حیزبى دیموکراتى کوردستانى ئێران کرد و، بەبۆنەى 80 هەشتاهەمین ساڵیادى دامەزراندنى حیزبى دیمۆکراتى کوردستانى ئێران، پیرۆزباییان لێدەکات و هیواى پێشڤەچوون و سەرکەوتنیان بۆ دەخوازێت، جەختدەکاتەوە سەر یەکڕیزى لایەنە سیاسییەکانى رۆژهەڵاتى کوردستان و، لەم پێناوەدا پێشنیارى پێکهێنانى (بەرەیەیەکى یەکگرتوو) بۆ لایەنە سیاسییەکانى رۆژهەڵاتى کوردستان دەکات. ئەمەش دەقى پەیامەکەیە :

برای بەڕێزمان كاك مستەفا هیجری لێپرسراوی گشتیی حیزبی دێموکراتی کوردستانی ئێران

بەڕێزان ئەندامانی دەفتەرى سیاسیى و کۆمیتەى ناوەندیى حیزبی دێموکراتی کوردستانی ئێران

سڵاوێكی برایانەى گەرم ...

بەڕێزان؛ بەناوی خۆمان و ئەندامانى مەكتەبی سیاسی و كۆمیتەی سەركردایەتی و تەواوی ئەندامانى یەكێتی نەتەوەیی دیموكراتی كوردستان YNDK، بەبۆنەی (80) هەشتاهەمین ساڵیادى دامەزراندنى حیزبە تێكۆشەرەكەتان (حیزبی دێموکراتی کوردستانی ئێران)، جوانترین پیرۆزبایی ئاراستەی بەڕێزتان و تەواوى هەڤاڵانى حیزبی دێموکراتی کوردستانی ئێران دەكەین و، هیڤیدارین ساڵیادى دامەزراندنى حیزبتان ببێتە فاكتەری پێشڤەچوون و خاڵی وەرچەرخان و سەركەوتنی زیاتر لەپێناو خزمەتكردنی دۆزی رەوای گەلى کوردستان.

بەڕێزان؛ لەكاتێكدا كە یادی دامەزراندنی (حیزبی دێموکراتی کوردستانی ئێران) دەكەنەوە كوردستان و رۆژهەڵاتی ناڤین بەشێوەیەكی گشتیی و بەتایبەت رۆژهەڵاتى كوردستان لە رەوشێكی زۆر ناسك و هەستیاردان و چاوەڕوانی هاتنەپێشی كۆمەڵێ‌ ئەگەرو پێشهات و گۆڕانکارى مەزن دەكرێت، لەسەر هەموو لایەكمان پێویستە رەچاوى بەرژەوەندى باڵاى نەتەوەیى و نیشتمانى بکەین و لەپێناو یەكێتی و یەكدەنگی كوردان و سوود وەرگرتن لە گۆڕانکارییەکان خەبات بكەین، بێگومان یەکبوون و یەکدەنگیمان کاریگەرترین چەکمانە بۆ رووبەڕووبوونەوەى پیلانى دوژمن و ناحەزانمان، لەمڕووەوە کۆبوونەوەکانتان لەگەڵ لایەنە تێکۆشەرەکانى رۆژهەڵاتى کوردستان بەرز دەنرخێنین و چاومان لەوەیە کەوا بە زووترین کات هەوڵەکان بە ئەنجام بگەن و بەرەیەکى یەکگرتوو رابگەیەنن، بەباوەڕی ئێمە پێکهێنانى بەرەیەکى فراوان و یەکگرتوو بۆ هێزەکانى رۆژهەڵاتى کوردستان، پێگەى رۆژهەڵاتى کوردستان لەنێو هاوکێشە سیاسییەکانى ناوچەکە بەهێزتر دەکات و، دەبێتە فاكتەری سەرەكی یەكڕیزى و سەرکەوتنمان، بۆیە پێویستە هەموو لایەكمان لەپێناو ئەم ئامانجەدا تێبكۆشین.

لەكۆتاییدا؛ دووبارە هیوای سەركەوتنتان بۆ دەخوازین و، سڵاو لە خەبات و بەرخودانی رۆژهەڵاتی كوردستان دەكەین و بەچاوی رێزەوە لێی دەڕوانین و، هیوای پێشڤەچوون و سەركەوتن بۆ خەباتی رۆژهەڵاتى وڵات دەخوازین و، جەختدەكەینەوە سەر پتەوكردن و پێشڤەبردنی پەیوەندی برایانەی نێوانمان لەپێناو زیاتر خزمەتكردن و پێشڤەبردنی دۆزی رەوای گەلی كوردستان و گەیشتنمان بە مافە رەواكانمان ... لەگەڵ سڵاوو رێزى دووبارەماندا .

هەر بژین و تەندروست و سەركەوتووبن بۆ كوردو كوردستان.

براتان

غەفوور مەخموورى

سکرتێرى گشتیى

یەکێتى نەتەوەیى دیموکراتى کوردستان YNDK

15 / 8 / 2025