- جەماوەری وڵاتپارێزی كوردستان ...

 - كەس و كار و بنەماڵەی شەهید سەربەست...

  بیست ساڵ بەسەر تیرۆركردنی شەهید سەربەست مەحموود ئەندامی مەكتەبی سیاسی YNDK و سەرنووسەری رۆژنامەی میدیا و خاوەن ئیمتیازی گۆڤاری سەرخۆبوون تێپەڕدەبێت، لەم رۆژەدا دوور لەهەموو یاسا و رێسایەكی مرۆڤایەتی لە 31/5/2000 دەستی ره‌شی تیرۆریستان گەیشتە گیانی پاكی شەهید سەربەست و زۆر هۆڤیانه‌ شەهیدیان كرد.

 تیرۆریستان به‌شه‌هیدكردنی سه‌ربه‌ست مه‌حموود وایانزانی ده‌توانن رێگری بكه‌ن له‌ رێبازی كوردایه‌تی شه‌هید و كاركردنی بۆ سه‌ربه‌خۆیی كوردستان، نه‌یانزانی شه‌هید سه‌ربه‌ست ده‌یان سه‌ربه‌ستی سه‌ربه‌خۆخوازی له ‌دوای خۆی په‌روه‌رده‌ و گۆشكردووه‌، هه‌موو ئه‌ندامێكی YNDK شه‌هید سه‌ربه‌ستن، خه‌بات بۆ ئازادی و سه‌ربه‌خۆیی كوردستان ده‌كه‌ن.

 شەهید سەربەست مەحموود لە بنەماڵەیەكی نەتەوەیى و كوردپەروەر گۆشكرابوو، بۆیه‌ لە رێزەكانی YNDK درێژەی بە خەبات و تێكۆشانیدا، جگە لەوەی سیاسەتوانێكی لێهاتوو بوو، لەهەمان كاتدا رۆژنامەنووسێكی بوێر و چاونەترس بوو، زۆر نه‌ته‌وه‌ییانه‌ رەخنەی لە سیاسەتی داگیركاری دوژمنانی كوردستان دەگرت، لە رێگەی نووسینەكانی هەموو كات نەخشە و پیلانەكانی شرۆڤەدەكردن و لەدیدگایەكی وڵاتپارێزانە و بەشێوازێكی هێمنانە رووبەڕوویان دەبۆوە و دژی هەموو توندو تیژی و ئازار و تۆقاندنێك بوو، هەڵوێستە نەتەوەییەكانی زۆر كاریگەر بوون, بۆیە لەسەر ئاستی هەموو بەشەكانی كوردستان ناسراو بوو.

 بیست ساڵ بەسەر تیرۆركردنی شەهید سەربەست مەحموود تێپه‌رده‌بێت و تا ئێستا بكوژانی ئاشكرانەبوونه‌، بۆیە داوا لە دەزگا پەیوەندیدارەکانى كابینه‌ی نۆیه‌می حکومەتى كوردستان و بەتایبەت به‌رێز مه‌سرور بارزانی سه‌رۆكی حكومه‌تی كوردستان دەكەین، کەوا هەوڵ زیاتر بده‌ن تا بكوژانی شەهید سەربەست ئاشكرا بكرێن و بەسزای دادگەرییانەی خۆیان بگەن و رۆحی شه‌هیدیش ئارام بێت.

 -  سڵاو بۆ گیانی پاكی شەهید سەربەست مەحموود و تەواوى شەهیدانی رێی سەربەخۆیی و ئازادی كوردستان.

 - مردن رووڕەشی بۆ تیرۆریستان و دوژمنانی كوردستان .

 

 

 

                                                                                مه‌كته‌بی سیاسیی      

                                                             یەكێتی نەتەوەیی دیموكراتی كوردستان YNDK

                                                                      10ی جۆزەردانى 2720ی كوردی

                                                                       31 ی ئایارى 2020ى زایینی