حزبەکانی ڕۆژهەڵاتی كوردستان لە دانانی مەرجەع ناکۆکن

تشرين2/نوفمبر 02, 2019

 

ئاژانسه‌كان

حزبەکانی ڕۆژهەڵاتی کوردستان بە دوو بەرەی جیاواز سەرقاڵی درووستکردنی مەرجەعن بۆ ڕۆژهەڵاتی کوردستان، ئەوەش ناکۆکییەکانی نێوان ئەو هێزانەی زیاتر کردووە و سەرجەم هێزەکان ئامادە نین بە یەک بەرنامە و لەگەڵ یەک ئەو مەرجەعییەتە درووست بکەن.

حزبەکانی بەشدار لە ناوەندی هاوکاری سەرقاڵن ناوەندەکە کە لە چوار حزبی گەورەی ڕۆژهەڵات پێک هاتووە بکەنە مەرجەعی ڕۆژهەڵات، لە بەرامبەردا نزیکەی دە حزبی تر کە ئەندامی ئەو ناوەندە نین دەیانەوێت مەرجەعێکی تر درووست بکەن و دان بە ناوەندی هاوکاریدا نانێن وەک مەرجەعی ڕۆژهەڵات.

عەتا سەقزی، بەرپرسی پەیوەندییەكانی كۆمەڵەی زەحمەتكێشانی كودستان بۆ ״ئاژانس״ وتی: ״ناوەندی هاوكاریی حزبەكانی ئێران، لە سەرەتای دامەزراندنییەوە تاكو ئێستا كاریگەریی باشی هەبووە هەر بۆیە كاری بۆ دەكرێت بۆ ئەوەی بكرێتە مەرجەعییەتێك بۆ ڕۆژهەڵاتی كوردستان.״

وتیشی: ״دەمانەوێت ئەم ناوەندە بكەینە مەرجەع بۆ ڕۆژهەڵاتی كوردستان و تەواوی جیهانیش بۆ ئەوەی لە پرسە چارەنووسسازەكان و ڕەوشی ڕۆژهەڵاتیش خەڵكی ڕۆژهەڵات و تەواوی دنیاش چاوەڕوانی هەڵوێست و بڕیاری ئەم مەرجەعە بن و لێرەوە بڕیار و هەڵوێستەكان دەرببڕین لەسەر ڕۆژهەڵات.״

ناوەندی هاوکاریی حزبەکانی ڕۆژهەڵات لە مانگی ٤ی ساڵی ٢٠١٨دا درووست کراوە.

״ناوەندەکە پەیڕەوی ناوخۆی هەیە و باس لەوە کراوە یەک میدیای هاوبەش، یەک هێز و بڕیاری هاوبەشمان هەبێت و یەک گوتارمان هەبێت و لای حزبەکانی پارچەکانی تری کوردستان دەیناسێنین، بۆ لایەنەکانی تری ڕۆژهەڵاتیش دەرگا کراوەیە پێمان خۆشە بێنە ناوەندەکەوە.״ عەتا سەقزی وای وت.

ناوەندی هاوکاری سەرەتا پێنج لایەنی سیاسیی ڕۆژهەڵاتی كوردستان ئەندام بوون تیایدا، ئەوانیش: هەردوو حزبی دیموكرات، هەردوو كۆمەڵەی شۆڕشگێڕ و حزبی سازمانی خەبات. بەڵام دوای چەند مانگێك سازمانی خەبات لە ناوەندەكە چووە دەرەوە.

حەمەنەزیف قادری، جێگری لێپرسراوی گشتیی حزبی دیموكراتی كوردستانی ئێران بۆ ״ئاژانس״ وتی: ״پەیوەندیمان لەگەڵ خەڵكی ڕۆژهەڵات و لایەنەكانی باشوور و دەرەوەش زۆر باشە، بۆیە ئەم ناوەندە بە مەرجەعییەتێك دەزانین بۆ ڕۆژهەڵات و بە فیعلی دەبێتە مەرجەعییەت بۆ ڕۆژهەڵاتی كوردستان.״

״ئەم ناوەندە كە دەكرێتە مەرجەعێك ئەو كات دەبێتە نوێنەری ڕۆژهەڵاتی كوردستان بۆ دەستەبەركردنی مافی سیاسی و پێكهێنانی یەكهەڵوێستی و یەكدەنگی لە نێوان لایەنەكان و پشتیوانیی خەباتی ژنانی كوردستان لە پێناوی یەكسانیی ڕەگەز.״ حەمەنەزیف قادری وای وت.

هەرچەندە ئەو چوار لایەنەی ناوەندەكەیان پێك هێناوە گەورەترین لایەنی سیاسیی ڕۆژهەڵاتی كوردستانن، بەڵام لایەنەكانی تر بە پێچەوانەوە پێیان وایە ئەم ناوەندە ناتوانێت ببێتە مەرجەعییەت بۆ خەڵكی ڕۆژهەڵاتی كوردستان، بۆیە ئەوانیش هەوڵی دامەزراندنی مەرجەعییەتێکی تر دەدەن.

ئیسماعیل موراد تریك، نوێنەری حزبی كۆمەنیستی ئێران ״كۆمەڵە״ لە هەرێم بۆ ״ئاژانس״ وتی: ״هەوڵەكانی ئەو ناوەندە بۆ بوون بە مەرجەع نەزۆكن و سەركەوتوو نەبوون لە كارەكان، بەڵام ڕۆژهەڵات مەرجەعێكی پێویستە و ئێمەش لەگەڵ چەند لایەنێك لە هەوڵی درووستكردنی مەرجەعێكین.״

وتیشی: ״ئەو ناوەندە كە لە چوار حزب پێك هاتووە ناتوانێت ببێتە نوێنەری هەموو ڕۆژهەڵات و بە ناوی خەڵكی ڕۆژهەڵاتەوە بەیاننامە و بۆچوونی خۆی بچەسپێنێت، چونكە ئێستا نزیكەی 10 حزبی ڕۆژهەڵات هەن و هەمووشیان لایەنگر و پشتیوانی خۆیان هەیە.״

سه‌رچاوه‌: ئاژانس – سەلام هانەدنی