میدیا وردەکاری کوشتنی ئەبوبەکر بەغدادی بڵاوده‌كاته‌وه‌

تشرين1/أكتوير 27, 2019

 

ئاژانسه‌كان

سەرلەبەیانی ئەمڕۆ بەرپرسانی باڵای پنتاگۆن کوژرانی ئەبوبەکر بەغدادی سەرکردەی رێکخراوی تیرۆرستی داعشیان بڵاوکردەوە، هەرچەندە تائێستا کوشتنی ئەو سەرکردەیەی داعش بەفەرمی لەلایەن ئیدارەی کۆشکی سپی رانەگەیەنراوە، بەڵام دواتر هێزەکانی سوریای دیموکرات رۆڵی گرنگی خۆیان لەئۆپەراسیۆنی کوشتنی ئەبوبەکر بەغدادی رونکردەوە، میدیاکانی ئەمریکاش وردەکاری ئۆپەراسیۆنەکەیان بڵاوکردەوە. 

بەگوێرەی ئاژانسەکانی هەواڵ، سوپای ئەمریکا بەهاوکاری سەرچاوە هەواڵگرییەکان لەئۆپەراسیۆنێکدا بەدو قۆناغ ئەبوبەکر بەغدادی و گروپەکەیان کوشتوە.

لەوردەکاری راپۆرتەکەدا ئاماژە بەوەکراوە شەوی رابردو لەنزیک کاتژمێر 12-ی شەو هەشت هێلیکۆپتەر بەهاوکاری دو فڕۆکەی جەنگی سەربە سوپای ئەمریکا ئاسمانی گوندی باریشا لەناوچەی ئیدلیب لەباکوری رۆژهەڵاتی سوریایان کۆنترۆڵکردوە کە دەکەوێتە نزیک خێوەتگەی تورلاها و لەقۆناغی یەکەمدا بۆماوەی 90 خولەک هێرشیان کردۆتە سەر بینایەک. 
 
بەگوێرەی شایەتحاڵەکان، هێلیکۆپتەرەکان روبەروی بەرەنگاری بونەتەوە و بەچەکی قورس تەقەیان لێکراوە.

دواتر پاش بۆردومانکردنی تەواوی ئەو ناوچەیە، هێلیکۆپتەرەکان بۆماوەی نزیکەی نیو کاتژمێر ئاسمانی ناوچەکەیان چۆڵکردوە و دواتر گەڕاونەتەوە و بەهەمان شێوە دەستیان کردۆتەوە بە بۆمبارانکردنی ئەو ناوچەیە.

دەستپێکردنەوەی قۆناغی دوەمی هێرشەکە بۆماوەی دو کاتژمێر و نیو بەردەوامبوە، لەگەڵ ئەوەشدا ژمارەیەک سەربازی هێزی تایبەت لەهێلیکۆپتەرەکانەوە رەوانەی خوارەوە کراون و روبەروبونەوەی توند لەسەر زەوی لەگەڵ گروپەکەی داعش دەستیپێکردوە.

بەپێی سەرچاوە ئەمنییەکان هەردو قۆناغی روبەروبونەوەکە چوار کاتژمێری خایاندوە و دواتر هێلیکۆپتەرەکان ئاسمانی ناوچەکەیان بەتەواوەتی جێهێشتوە.

چەند بنکەیەکی تەندروستی لەو ناوچەیە ئەوەیان ئاشکراکردوە، پاش هێرشی هێلیکۆپتەرەکان و روبەروبونەوەی سوپا تایبەتەکەی ئەمریکا لەناوچەکە، دیمەنی خانویەکی روخا و چەند خێوەتێکی سوتاویان بینیوە.

سەرچاوە تەندروستییەکە ئاماژەی بەوەشکردوە، پاش ئەو ئۆپەراسیۆنە سەربازییە، 7 لاشەیان بینیوە کەمنداڵێک و سێ ژنیان تێدابوە و پێنج کەسیش برینداربون.
لەبارەی هۆکاری کوشتنی و دەستگیر نەکردنی، فەرماندەیەکی باڵای پێشوتری پنتاگۆن بەسی ئێن ئێنی راگەیاندوە، زانیارییان هەبوە هەمیشە ئەبوبەکر بەغدادی هەڵگری پشتێنەی تەقینەوە بوە و تەنانەت لەکاتی نوستنیشدا ئەو پشتێنەیەی دانەناوە، ئەوەش لەبەرئەوەی دەستگیرنەکرێت و هەرکات پێویستبکات خۆی بتەقێنێتەوە. 

ئەوەی جێگای سەرنجە ونبونی رۆڵی سوپای روسیایە لەو ئۆپەراسیۆنەدا، هەرچەندە کۆنترۆڵی ئاسمانی ئیدلیب لەدەستی روسیادایە.

لای خۆشییەوە سەرچاوەیەک لەپنتاگۆن ئەوەى پشتڕاستکردۆتەوە کە هەفتەی رابردو، دۆناڵد ترەمپی سەرۆکی ئەمریکا واژۆی لەسەر جێبەجێکردنی ئۆپەراسیۆنێکی نهێنی کردوە بۆسەر ئەبوبەکر بەغدادی سەرکردەی رێکخراوی تیرۆرستی داعش.
بەگوێرەی گۆڤاری نیوس ویکس، بەرپەرسانی باڵای پنتاگۆن دڵنیایی تەواویان داوەتەوە کۆشکی سپی کە ئەبوبەکر بەغدادی سەرکردەی رێکخراوی داعش لەو ئۆپەراسیۆنەدا کوژراوە.

یەکەم دەرکەوتنی ئەبو بەکر بەغدادی لە ساڵی 2014 بو لەمزگەوتی نوری موسڵ کاتێک وەک خەلیفەی راگەیەنراوی خەلافەتەکەی داعش لەسوریا و عێراق خۆی ناساند.

دواتریش لەکۆتایی مانگی نیسانی ئەمساڵدا لەوێنەیەکی ڤیدیۆیی پروپاگەندەی رێکخراوەکەدا دەرکەوت کاتێک قسەی بۆ ژمارەیەک فەرماندەی رێکخراوەکەی دەکرد.

سه‌رچاوه‌: مالپه‌ڕی خەندان-