Share this on Faceook

Follow us on Twitter

FacebookTwitterGoogle BookmarksPinterest
Pin It

Facebook

Twitter

Google Plus

YouTube

ئەیوب عەبدوڵڵا

كۆمەڵگەی كوردەواری, كە دەشێ بڵێین تا ئێستاش كۆمەڵگەیەكی نیوچە دێهاتیی خێڵەكیی نێرسالارە, هەندێك نەریت و دابی هەن, كەم و زۆر تا هەنووكەش, لە هەڵسوكەوتی تاكی كورددا ڕەنگدەدەنەوە. یەك لەو نۆرمە كۆمەڵایەتییانە ڕێزگرتنی گەوران و بەساڵداچووانە و سوودوەرگرتنە لە ئەزموونی ژیان و تەمەنیان, كە دیارە بۆ كۆمەڵگایەكی دێهاتنشینی كشتوكاڵی, ڕەنگە ئەو ئەزموونانە بێبایەخنەبن. یەك لە دابەكانی كوردەواریش, بە تایبەتی لە دێهات, ئەو دانیشتنانەن كە پێیان دەگوترێت مەجلیس, یان مەدریس, بە تایبەت لە شەوانی درێژی زستاندا, كۆمەڵە پیاوێك لە دیوەخانێك كۆدەبنەوە و لە ژیان و كاروباریان دەدوێن و گفتوگۆ دەكەن و ڕا دەگۆڕنەوە. كە یەكێكیش چوو و لە مەجلیس دانیشت, دەبێ دابی مەدریس بزانێ و سنووری خۆی نەبەزێنێ‌! یەك لەو دابانەش ئەوەیە تا كابرای ڕیش چەرموو دانیشتبێ, بۆ گەنجێكی تازە پێهەڵكەوتوو ناشێ شووڵی لێهەڵكێشێ‌! خۆ گەر پێی لێ هەڵبڕی و سنووری خۆی بەزاند, هەر زوو جوامێرێك دەمكوتی دەكا و تێی ڕادەخوڕێ: "بێدەنگ بە, دەمڕووت!"

دەمڕووت  كەسێكە كەمتەمەن, هێشتا سمێڵی هێند لێ نەهاتوون تا سەرووی دەمی دابپۆشێت, وەك بڵێی پیاو تا تەواو سمێڵی لێ نەڕوێن و دەمی دانەپۆشن, هێندە لە ژیان ناگات وەك خاوەن ڕایەك سەیری بكرێ و قسەی لێ بە هەند وەربگیرێت. خۆ هێندە دوور نەڕۆین, ئەو ساڵانەی من چوومە زانكۆ (یانی پانزە ساڵێك لەمەوبەر), هێشتا سمێڵتاشین لای زۆرینەی خەڵكی باو نەبوو, خۆ گەر یەكێك سمێڵی تاشیبا, بە ڕاست بووایە یان هەر بۆ گاڵتە و خۆشی, دەكەوتە بەر تەشەری هاوڕێ نزیكەكانی و ناخۆشترین تانەیەكیش لێی دەدرا ئەوە بوو پێیان دەوت: "دەڵێی سەر و پێی چاككراوی!", خۆ فێرخوازی زانكۆیی ئەو ڕۆژەی سمێڵی بۆ یەكەم جار دەتاشی, بۆ ڕۆژی دواتر تای لێدەهات, ئاخر چۆن بچێتە زانكۆ لە كاتێكدا بە دەستی خۆی خۆی كردووە بە دەوڕووت؟!  عەیبەی سمێڵتاشین لەوەدا بوو كە ئەو كەسە خۆی لە ژن دەچوێنێ و ئاخر ژنیش لە كۆمەڵگەی نێرسالاردا, ئەگەر قێزەون و كەمپایە نەبێت, ئەوە لە باشترین حاڵەتدا مرۆڤێكی نمرە دووە.

كوردەواری كەم تا زۆرێك  گۆڕاوە, ئێستا بێسمێڵی هێند باوە, كەس لا بە لای سمێڵدا ناكاتەوە, ڕەنگ بێت شەپۆلی بەجیهانیبوون سەیر ئەو كۆمەڵگەیەی ئێمەی لەگەڵ خۆی ڕاپێچ كردبێت. ئێستا كەس بە بابای بێسمێڵ ناڵێ‌ دەمڕووت, نەك هێشتا خۆی سمێڵی لێ نەڕوابن, بەڵكو با هەموو ڕۆژ خۆی پاك بیانتاشێ. من هومێدەوارم كۆمەڵگەی كوردەواری زوو ئەو قۆناغە میانەییە تێپەڕێنێ و بەرەو كۆمەڵگەیەكی مرۆسالاری شارستانی ڕێ بگرێت, بەڵام خۆ دەكرێت ئێمە لەو كەلەپوورەی پێشینانمان سوودوەرگرین و لەو وشە باوانە دەستەواژە و چەمكی نوێ ساز بكەین.

دە كەواتە دەمڕووتی سیاسی كێیە؟

دەمڕووتی سیاسی كەسێكە دەستی داوەتە سیاسەت و لێی نازانێ‌, شانی داوەتە بەر كارێك كە شیاو نییە بۆی, خۆی لە كارێك هەڵقورتاندووە كە دەڕۆستی نایەت, قەفی سمێڵی تا پەنا گوێی بڕوات, یان بێسمێڵ بێت, چ لە مەسەلەكە ناگۆڕێت,لە بیستەكانی تەمەندا بێت, یان گڵۆڵەی تەمەنی كەوتبێتە لێژی, هەر جیاوازییەكی نییە,كابرالە سیاسەتكردندا هەرزە و دەمڕووتە و هیچ شەفاعەتی بۆ ناكات. جا كە كار كەوتە دەستی دەمڕووتە سیاسییەكان, دەبێ چاوەڕێی هەڵسانی قیامەت بین, چونكە گەندەڵی و بێباری و مەحسوبییەت و پاشاگەردانی و هەر كەس بۆ خۆیی و چیی دەرهاوێشتەی نێگەتیڤی دیكەشن بە حاڵ و باری وڵات و دەوڵەت و كۆمەڵگەوە وەدیاردەدەن.

ئەی كاشكێ جوامێرگەلێكی كورد دەبوون دەو هەموو دەمڕووتە سیاسییانەیان ڕاخوڕیایە كە بیست و پێنج ساڵە باشووری كوردستان بەدەستیانەوە دەناڵێنێت و ڕۆژ دوای ڕۆژیش لە هەڵدێران و سەرسمدانی نزیكدەخەنەوە و یاری بە چارەنووسی و بە ژیان و گوزەرانی گەلەكەیەوە دەكەن و بەسەریاندا هاواریان بكردایە:  "دەمتان تێكنێن دەوڕووتینە!"