رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

میدیا - عومەرئاوارە

  دوای هاتنی میلیشیا چەكدارە شیعەكان بۆ شاری خورماتوو لە ئێستادا ڕۆژانە هاوڵاتییان دەڕفێندرێن و زۆرینەی كەسە ڕفێنراوەكانیش سوننە مەزهەبن كە بووەتە بەشێك لە ژیانی ڕۆژانەی دانیشتووانی ئەو شارە و بەرۆكیان بەرنادات.

لە دوای هاتنی میلیشیا چەكدارە شیعەكان و رزگاركردنی هەردوو شارەدێی ئامرلی و سلێمان بەگی سەر بە قەزای خورماتوو، تاكو ئێستا هەشت هاوڵاتی لەو شاره‌ ڕفێنراوە و زانیاری لە بارە یانەوە نییە كە ئاخۆ كوژراون یاخود ماون كە سەرجەمیان سوننە مەزهەبی دانیشتووی خورماتوون.
نەقیب ئەنوەر داودی لێپرسراوی بەشی بەدواداچوونی پۆلیسی خورماتوو وەكو پۆلیسی شاره‌كه‌ بێئاگایی خۆی دەربڕی لە ڕفاندنی هاوڵاتییان، ئەو لەو بارەیەوە وتی" بە هۆی ئەوەی لە دوای مانگی شەشی ئەمساڵەوە تاكو ئێستا پۆلیسی خورماتوو بە تەواوەتی دەوامیان نەكردووە، ئەویش بە هۆی شەڕی داعش لە ناوچەكە تاكو ئێستاكە ئاگاداری ئەوە نین كە لە خورماتوو دەست بە ڕفاندنی هاوڵاتییان كراوە، چونكە لە ئێستادا تەنها یەك مەفرەزەی پۆلیس لە خورماتوودا هەیە ئەویش بە فەرمانی قایمقامی شارەكە كاردەكات و تەنهاش كاری ئێمە بەدواداچوون بۆ كێشەی زەوی زاری حكومی وتەجاوز و دروستبوونی دەمەقاڵی نێوان هاوڵاتییانە".
شێرزاد قادر بەرپرسی حیزبی ئێسلامی عێراقی سوننە لە شاری خورماتوو ئەو دەستی تۆمەتی بۆ میلیشیا چەكدارە شیعەكان درێژ كرد، كە كاری ڕفاندن دژ بە هاوڵاتیانی سوننە دەكەن لە خورماتوو، ئەو بۆ میدیا وتی" ئەو میلیشیا چەكدارانە بە شێوەیەكی ئاشكرا خەڵكی سوننە مەزهەب دەڕفینن، بە بیانووی ئەوەی پەیوەندییان بەو گروپە تیرۆرستییانەوە هەیە، بەڵام خۆی لە ئەساسدا وانییە، ئەمەش جۆرە دژایەتییەكە كە چەكدارە میلیشیا شیعەكان دژ بە سوننەكانی شارەكە دەیكەن، ئەوان بە بەرچاوی خەڵكەوە هاوڵاتی دەڕفێنن و دواتر بۆ بارەگا حیزبییە شیعەكانی ناو شاری خورماتووی دەبەن" .
حەسەن بارام جێگری بازنەی حەمرینی یەكێتی نیشتیمانی كوردستان لە خورماتوو لەو بارەیەوە وتی" ئێمە وەكو لایەنی كوردی شاری خورماتوو زۆر نیگەرانین بەرامبەر بەو ڕەفتارانەی كە ئەو چەكدارە شیعانە بەرامبەر بە هاوڵاتییانی سوننە دەیكەن لە ڕفاندن وهێرشكردنە سەریان، كە ئە و دیاردەیە لە لای ئێمە بە هیچ شێوەیەك قەبوڵ نییە و لەو بارەشەوە چەندین جار كۆبونەوەمان لەگەڵ ئەو میلیشیا چەكدارانە ئەنجامداوە و ئاگاداریانمان لەو بارەیەوە كردۆتەوە و لەم نزیكانە جارێكی دیكە كۆبونەوەیان لەگەڵ دەكەین و ئاگاداریان دەكەینەوە، كە ئێمە وەكو لایەنی كورد پێمان باش نییە بەو جۆرە مامەڵە لە گەڵ هاوڵاتیانی سوننە مەزهەبەكانی خورماتوودا دەكەن و دەبێت واز لەو ڕەفتارە بهێنن".
گەڕەگی عەسكەری شاری خورماتوو یەكێكە لەو گەڕەكانەی كە شەوانە كاری ڕفاندنی هاوڵاتیانی سوننەی تێدا ئەنجامدەدرێت وئەوانەش كە ئەو كارە ئەنجامدەدەن بە گوتەی دانیشتووانەكەی ئەو گەڕەكە چەكدارە میلیشیاكانن كە بەم دواییە هاتنە شاری خورماتوو بەمەبەشتی ڕاگرتنی ئاسایشی شارەكە.
هەیسەم عەدنان هاوڵاتییەكی دانیشتووی گەڕەكی عەسكەرییە، ئەو لە بارەی ڕفاندنی هاوڵاتیانی سوننەوە لەلایەن چەكدارانی میلیشیا شیعەكانەوە بۆ (میدیا) وتی" چەكدارانی سوپای بەدر چەند ڕۆژێك لەمەوبەر، پێش نوێژی عیشا هەڵیانكوتاوەتە سەر ماڵی چوار هاوڵاتی سوننەی دانیشتووی ئەم گەڕەكە كە دوانیان توركمان و دووانەكەی دیكە عەرەبن و بەرەو شوێنێكی نادیاریان ڕفاندوون وتاكو ئێستاش چارەنووسیان نادیارە".
ئەو هاوڵاتییە ئاماژەی بەوەشدا كە ڕفاندنی هاوڵاتییانی سوننە مەزهەب بە بیانووی ئەوەیە كە دەستییان هەیە لەو تەقینەوانەی كە لەگەڕەكە شیعە نشینەكانی خورماتوودا ئەنجامدەدرێت و تاكو ئێستاش نازانرێت ئەو ڕفێنراوانە ماون یاخود كوژراون.
تاریق مەندیل هاوڵاتییەكی عەرەبی سوننەی تەمەن 48 ساڵەی خورماتووە، ئەو لەو بارەیەوە وتی "چەكدارە شیعەكان بە ڕفاندنی هاوڵاتییانەوە نەوەستاون ولە ڕێگەی بۆمبی چێنراوەوە خانووی ماڵە عەرەبەكان دەكەنە ئامانج و تاكو ئێستاش بەو هۆیەوە چەندەها عەرەبی سوننە كوژراو برینداربوون".
لە ئێستادا لەسنوری قەزای خورماتوو هەشت میلیشیای شیعە بوونیان هەیە و بارەگاكانیان لە شارەدێی ئامرلی خورئاوای شارەكەیە كە شارەدێیەكی شیعە نشینە، لە دوای ئازاداكردنی شارەدێی سڵێمان بەگ و ڕاوەدووناكی چەكدارانی داعش لەو ناوچە تاكو ئێستا 40 گوندی سوننەنشین كۆنترۆڵكران و زۆرینەشیان تاڵانكران و سوتێنران كە لە ئیستا دانیشتووانەكەی ئاوارەی هەردوو شاری كەركووك و خورماتوون.
باسم بەیاتی سەرۆكی ئەنجومەنی قەزای خورماتوو كە هاوكات عەرەبێكی سوننە مەزهەبی دانیشتووی شارەكەیە، سەبارەت بەو كەسانەی كە هاوڵاتییان لە شاری خورماتوو دەڕفێنن بۆ (میدیا) وتی" تاكو ئێستا ڕوون نەبووەتەوە بۆ دەزگا ئەمنییەكانی خورماتوو كە ئەو كەسانە كێن و سەربەچی لایەنێكن كە شەوانە لە ناو شاری خورماتوو هەڵدەكوتنە سەر ماڵە سوننە مەزهەبەكان و دەیانڕفێنن، ئێمە وەكو لایەنی سوننە ناتوانین هیچ كەس و لایەنێك تۆمەتبار بكەین، بەڵام ئەو دیاردەیە بوونی هەیە لە شارەكەدا و ناو بە ناوە ئەنجامدەدرێن بۆ ئەوەی ئەو كەسانە ئاشكرانەبن كە كاری ڕفاندن دەكەن كە تێدا هاوڵاتییانی سوننە مەزهەبی دانیشتووی ئەو شارە دەكرێنە ئامانج".
یاسین خەشامنە پۆلیسێكی سوننە مەزهەبی تەمەن 41 ساڵەی دانیشتووی خورماتووە، ئەو ئاماژەی بەوەدا كە ماوەیەكە لە ناو شاری خورماتوو دیاردەی ڕفاندنی هاوڵاتییان و تیرۆركردنیان پەیدابووە، بەڵام تاكو ئێستا ئاشكرا نەبووە كە كێن ئەو كارە ئەنجامدەدەن، ئەو وتی" لە پاڵ دیاردەی ڕفاندنی هاوڵاتیان بە تایبەت ئەوانەی كە سوننە مەزهەبن تەقینەوەش لە گەڕەكە سوننە نشینەكاندا ئەنجامدەدرێت، ئاماژەی بەوەشدا كە لە ئێستادا چەكدارێكی زۆری میلیشیا شیعەكان هاتونەتە نێو شاری خورماتوو بە كوچە و كۆڵانەكانیدا دەسوڕێنەوە بە تایبەت ئەو گەڕەكانەی كە سوننە نشینن".
عەلی حوسێنی ئەندامی تەیاری سەدری شیعە لە شاری خورماتوو سەبارەت بەو دیاردەیە بۆ (میدیا) وتی" بەڵی ڕاستە لە خورماتوو دەستگیركردنی هاوڵاتییان هەیە نەك ڕفاندن، ئەوانەش كە ئەو كارە ئەنجامدەدەن هێزەكانی سوپای عێراق و چەكدارانی حەشدی شەعبین كە پێیان دەوترێت میلیشیات، ئەوان میلیشیات نین بەڵكو سوپایەكن هاتون بەرگری لە شاری خورماتوو دەكەن و ئەوانەش كە دەستگیریان دەكەن تۆمەتبارن بە كردەوەی تیرۆریستی و هاوكاریكردنی داعش، نەك سوننە مەزهەبەكان كە باسی لێووە دەكەن كە گوایە میلیشیاكانی شیعە سوننەكان دەستگیر دەكەن، ئەوە پڕوپاگەندەی هەندێ كەس و لایەنن كە تەنها بۆ ئەوەیە شەڕی تایفەگەرێتی نێوان شیعە و سوننە لە خورماتوو دروست بكەن".

كۆمێنتت له‌سه‌ر ئه‌م بابه‌ته‌