میدیا- كوردستانی

  بەهۆی كۆمەڵێك پێشێلكاری لە بەرامبەر مافەكانیان، ماوەی مانگێكە 29 بەندكراوی سیاسی كورد لە بەندیخانەی ناوەندی ورمێ دەستیان داوەتە مانگرتن، ته‌نیا هۆكاری هه‌ڵسووكه‌وتی خراپی بەرپرسانیش له‌گه‌ڵ به‌ندكراوانی سیاسیی كورد، كوردبوونیانه‌.

سەرەتا بەختیار عەزیزی جێگری كۆمیتەی ناوەندی سازمانی خەباتی كوردستان ئاماژه‌ بۆ ئەوە دەكات كە 29 ڕۆڵەی ماندوونەناسی نەتەوەی كورد، ماوەی مانگێكە بە هۆی داواكارییەكی سەرەتایی دەستیان داوەتە مانگرتن لە خواردن، مانگرتنێكی كە بێ گومان دوا بژاردەیە بۆ دەستەبەربوونی لانیكەمی مافە زەوتكراوەكانیان كە بەپێی یاسای بنەڕەتی كۆماری ئیسلامی ئێرانیش بە مافی ڕەوای ئەو بەندیانە دەزانرێت كەچی بەرپرسانی بەندیخانە لیبڕاون لە پەیڕەوكردنیان. وتیشی: "داواكاری ئەو بەندییانە بریتییە لە جیاكرانەوەیان لەو بەندیانەی كە بە تاوانی تری وەك مادەی هۆشبەر و مرۆڤ كوژیەوە گیراون". داواكارییەكی ڕەوا كە بەپێی مادەكانی 7 و 8 ی ئایینامەی چۆنیەتی جیاكردنەوەوە و هەڵاواردن و پۆڵین كردنی بەندیەكان بە ژومارە نامەی 16523/85/1 ـ9/9/1385 هەڵگری 17 مادە و 9 تەبسەرە، كە لە لایەن هێزی دادوەری كۆماری ئیسلامییەوە چەسپێندراوە، دڕەندەیی و ئەشكەنجە دژەمرۆیی و سەدە ناوەڕاستییەكانی ناو بەندیخانەكانی كۆماری ئیسلامی ئێران، ئێستا زیاتر لە پێشوو بۆ هەموو لایەك ئاشكرایە و بەرپرسانی ئاسایشی بەندیخانەكان و دەست و پێوەندەكانی دادوەری بە شێوەیەكی لەڕادەبەدەر و هەمەچەشن، بەندیەكان دەخەنە بەر ئازار و ئەشكەنجە كە ڕاپۆرتە فەرمییەكانی خودی بەرپرسان و بیرەوەری بەندییە سیاسییەكان دەرخەری ئەو ڕاستیە حاشاهەڵنەگرەیە.
هەندێك لەو مانگرتووانە بە هۆی گوشاری لەڕادەبەدەری دەماری ڕەوانەی نەخۆشخانە و بنكە دەرمانیەكان كراون، بەڵام تا هەنووكەش و سەرەڕای ئەو دۆخە نالەبارە، بەردەوامن لە پێداگری لەسەر داواكارییەكانیان.
ئیمە وەك كۆمەڵێك لە چالاكانی مافی مرۆڤ لە رۆژهەڵاتی كوردستان، داوا لەسەرجەم خەڵكی كوردستان، بنكە و رێكخراوەكانی مافی مرۆڤ، چالاكانی مەدەنی و سیاسی و حیزبە سیاسییەكانی كوردستان دەكەین كە پشتگیری لەو بەندییە سیاسیە مانگرتووانە بكەن. هاودەنگی و یەكگرتوویی هەمەلایەنەی ئێمە لە ڕۆژی دووشەممە، ڕێكەوتی ١ی سەرماوەز و دەست نیشانكردنی ئەو ڕۆژە وەك ڕۆژی مانگرتنی سەرانسەری بۆ پشتگیری و كۆدەنگی لەگەڵ بەندیە سیاسییەكانی بەندیخانەی ورمێ، دەتوانێت دەرخەری ورەی نەتەوەیی و یەكگرتوویی ئێمەی كورد بێت بۆ دەسەڵاتدارانی سەرەڕۆی كۆماری ئیسلامی ئیران.
لەلایەكی دیكەوە چاودێری سیاسی ئاریتما موحەممەدی بە میدیای راگەیاند: كە نزیك به‌مانگێك ده‌بێ‌ به‌شێكی زۆر له‌ به‌ندكراوانی سیاسیی كورد له‌به‌ندی ١٢ی‌ به‌ندیخانه‌ی ناوه‌ندی شاروی ورمێ له‌ڕۆژهه‌ڵاتی كوردستان ده‌ستیان داوه‌ته‌ ده‌ربڕینی ناڕه‌زایه‌تیی و له‌دژی سیاسه‌تی هه‌ڵاواردنی نێو به‌ندیخانه‌ به‌چه‌شنێكی شارستانی هه‌ستاونه‌ته‌وه‌، به‌ندكراوانی سیاسیی كورد له‌و به‌ندیخانه‌یه‌دا له‌ دۆخێكی ناجێگیردا ژیان به‌سه‌ر ده‌به‌ن و هه‌ربه‌و بۆنه‌یه‌شه‌وه‌ ده‌ستیان داوه‌ته‌ مانگرتن، كه‌چی تاكوو هه‌نووكه‌ ڕژیمی ئێران بایەخی به‌ داخوازییه‌كانی ئه‌و به‌ندكراوه‌ سیاسییانه‌ نه‌داوه‌ و ڕێز له‌ داخوازییه‌كانیانی نه‌گرتووه‌.
له‌ ڕاستیدا ویست و داخوازی به‌ندكراوه‌كان‌ ‌كۆمه‌ڵه‌ داخوازییه‌كی سروشتی و ڕه‌وا له‌خۆ ده‌گرێت و به‌ مافێكی سه‌ره‌تایی هه‌ر به‌ندكراوێكی سیاسیی پێناسه‌ ده‌كرێت. به‌ڵام ڕژیمی ئێران هه‌ر له‌ بنه‌ڕه‌ته‌وه‌ باوه‌ڕی به‌مافی سروشتی به‌ندكراوانی سیاسیی نییه‌ و كێشه‌كه‌ له‌وه‌ش به‌رفه‌راوانتره‌. چونكه‌ ڕژیم ته‌نانه‌ت یاساكانی خۆشی له‌سه‌ر به‌ندكراوانی سیاسیی كورد جێبه‌جێ ناكات.‌
داخوازی به‌ندكراوه‌كانی سیاسیی گه‌ڵێك سروشتین و به‌ مافێكی ئاسایی هه‌ر به‌ندكراوێكی سیاسیی ئه‌ژمار ده‌كرێت. داخوازییه‌كان له‌چه‌ند خاڵی سه‌ره‌تاییدا كۆ ده‌كرێنه‌وه‌‌، لەوانە جیاكردنه‌وه‌ی به‌ندكراوه‌كانی سیاسیی له‌ به‌ندكراوه‌كانی دیكه، پێداچوونه‌وه‌ به‌تۆمه‌ته‌كانی ئاره‌سته‌كراو، چاره‌سه‌ركردنی نه‌خۆشه‌كان و پێڕاگه‌ییشتن به‌دۆخی نێو به‌ندیخانه‌ و دانی موڵه‌تی سه‌ردان به‌كه‌سوكاری به‌ندكراوه‌كان و پێدانی مه‌ره‌خه‌سیی.
فه‌لسه‌فه‌ی گوشاره‌كانیش بۆسه‌ر به‌ندكراوه‌كانی سیاسیی كورد له‌بوونی كێشه‌ی سیاسیی‌ كورد سه‌رچاوه‌ ده‌گرێت. مه‌زنترین كێشه‌ له‌ سیسته‌مێكی دیكتاتۆر، فاشیست و توتالیته‌ردا ئه‌وه‌یه‌ كه‌ به‌رپرسه‌كان و ده‌سه‌ڵات به‌چه‌شنێكی به‌رپرسانه‌ له‌ كێشه‌كان ناكۆڵنه‌وه‌ و پتر بایەخ به‌و په‌یامانه‌ ده‌ده‌ن كه‌ له‌ ئارا‌سته‌ی ستراتیژییه‌كانی فه‌لسه‌فه‌ی سیسته‌مدا ده‌چنه‌ پێش. پتر هه‌وڵی داتاشین و سازكردنی نه‌یار ده‌ده‌ن، چونكه‌ به‌و چه‌شنه‌ ئاسانتر كۆمه‌ڵگا میلیتاریزه‌ ده‌كه‌ن و خه‌ڵك ملكه‌چی ستراتیژییه‌كانیان ده‌بن. به‌گشتی دۆخی سیاسیی به‌ندكراوانی سیاسیی له‌نێو به‌ندیخانه‌كانی ئێران دژواره‌، به‌ڵام دۆخی به‌ندكراوانی سیاسیی كورد به‌چه‌شنێكی دیكه‌یه‌‌ و دوور له ‌هه‌ر چه‌شنه‌ له ‌به‌رچاو گرتنی سه‌ره‌تاییترین مافی مرۆڤ له‌گه‌ڵیان هه‌ڵسووكه‌وت ده‌كرێت. له‌ ڕاستیدا دۆخی سیاسیی به‌ندكراوانی سیاسیی كورد و به‌ندكراوانی سیاسیی نه‌ته‌وه‌ی باڵاده‌ست گه‌ڵێك جیاوازه‌. ته‌نیا هۆكاری هه‌ڵسووكه‌وتی له‌و چه‌شنه‌ش له‌گه‌ڵ به‌ندكراوانی سیاسیی كورد، كوردبوونیانه‌.
هه‌روه‌ها‌ ناوه‌نده‌كانی مافی مرۆڤ له‌ ئاستی نێوده‌وڵه‌تییدا چه‌ندین جار داخوازینامه‌ی مرۆڤدۆستانه‌یان ئاره‌سته‌ی ڕژێمی ئێران كردووه‌ كه‌ بنه‌ماكانی مافی مرۆڤ له‌به‌رچاو بگرێت، به‌ڵام ڕژیم تێكڕای پێشنیار و ڕاسپارده‌كانی ڕه‌تكردووه‌ته‌وه‌ و بایەخی پێنه‌داوه‌. بەڵكو تۆمه‌تی سیاسیی پێوه‌ندیدار به‌ئاساییشی نه‌ته‌وه‌یی ده‌خاته‌ پاڵ چالاكوانانی سیاسیی كورد و له‌ژێر ئەشكه‌نجه‌ی ده‌روونی و جه‌سته‌ییدا تۆمه‌ته‌ ئاره‌سته‌كراوانه‌كانیان به‌سه‌ردا ساغ ده‌كاته‌وه‌ و وه‌ك بكه‌ری تاوان ده‌یانناسێنێت، حوكمی قورس به‌سه‌ریاندا ده‌سه‌پێنێت و هه‌موو مافێكی سه‌ره‌تایی به‌ندكراوه‌كان ژێرپێ ده‌خات و زۆرجاریش ڕووبه‌ڕووی سێداره‌دان ده‌بنه‌وه‌. ئه‌ركه‌‌ له‌سه‌ر‌ هه‌موو كوردێكی نیشتمانپه‌روه‌ر كه‌ پشتیوانی خۆی له‌ به‌ندكراوانی سیاسیی كورد له‌ به‌ندیخانه‌ی ورمێ ڕابگه‌یه‌نێت و ئه‌و په‌یامه‌ بگه‌یه‌نێته‌ به‌ندكراوانی سیاسیی كه‌ ته‌نیا نین و به‌هه‌موو چه‌شنێك له‌ گه‌ڵیاندان.