رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

 میدیا - عومەر ئاوارە

   زۆرێك لەو دووكاندارانەی كە لە ناو بازاڕی شاری خورماتوو دووكانیان هەیە، لایەنی ئەمنی بە كەمتەرخەم دەزانن لە پاراستنی بازاڕی شارەكەو هێما بۆ ئه‌وه‌ ده‌كه‌ن كه‌ كۆمه‌ڵێك "دز و تێكدەر" شەوانە هەوڵی دزین، یاخود سووتاندنی دووكانه‌كان دەدەن، ئەفسەرێكی پۆلیسیش ئاماژە بەوە دەكات كە بە بەردەوامی شەوانە لە ناو بازاڕی شاڕەكە دەسووڕێنەوە و تاكو ئێستاش چەندەها دز و تێكدەریان دەستگیر كردووە.


ئیبراهیم عادل دووكاندارێكی نێو بازاڕی شاری خورماتووە، ئەو باس لەوە دەكات كە لە بەر نەبوونی پاسەوانی شەوانە، چەندین جار بە شەوان له‌ بازاڕەكە دزی كراوه‌، گوتیشی: "ماوەیەك بەر لە ئێستا ژمارەیەك دووكان سووتێنران، تاكو ئێستاش كەسێك لە سەر ئەو سووتاندنە لە لایەن پۆلیسەوە دەستگیر نەكراوە، كەس نازانێت ئەمانە كە ئەم كارانە ئەنجام دەدەن، دزن یاخود تێكدەرن و بە فیتی لایەنێك ئەم كارانە ئەنجام دەدەن" .
بەپێی ئەو ئامارانەی پۆلیسی خورماتوو كە دەست (میدیا) كەوتوون، لە ماوەی دوو ساڵی ڕابردوودا زیاتر لە 20 دووكانی جۆراوجۆر لە ناو بازاڕی شاری خورماتوو دزییان لێكراوەو سووتێنران، ئەویش بە هۆی نەبوونی پاسەوانی شەوانەوە كە دز و تێكدەرەكان ئەم هەلەیان قۆستۆتەوە و بە ئارەزووی خۆیان كارەكانیان ئەنجام دەدەن.
حوسێن سەعید دووكاندارێكی دیكەی شاری خورماتووەو باس لەوە دەكات كە لەگەڵ دووكاندارەكانی دراوسێی داوایان لە ئیدارەی شاری خورماتوو كردووە، بۆ ئەوەی كەسێكیان وەكو پاسەوانی شەوانە بۆ دەستنیشان بكەن، ئەگەریش مووچەی لەلایەن حكومەتەوە بۆ سەرف نەكرێت، ئەوا ئامادەن بە ژمارەیەك دووكاندار مووچەیەكی مانگانەی بۆ ببڕنەوە، بەڵام ئیدارەی شارەكە داواكارییەكەیانی ڕەتكردۆتەوە، گوتیشی: "دابینكردنی پاسەوانی شەوانە ئەوە ئیشی ئێمە نییە، بەڵكو ئیشی حكومەتە، دەبێت حكومەت مشوری ئەوە بخوات، بەڵام ئێمە لە گیرفانی خۆمانیش ئاماده‌ین پاسەوانی شەوانەمان بۆ دابینبكرێت، كەچی لە لایەن كاربەدەستانی شارەكەوە قەبوڵ ناكرێت و ڕەتدەكرێتەوە".
فەرهاد عەلی دووكاندارێكی دیكه‌ی شارەكەیە و ئه‌ویش ئاماژەی بەوەدا كە دەزگا ئەمنییەكان "كەمتەرخەم"ی ده‌كه‌ن و گوتی: "دەزگا ئەمنییەكانی شارەكە خۆیان ڕێگە بۆ ئەو دز و تێكدەرانە خۆشدەكەن بۆ ئەوەی شەوانە بێنە ناو بازاڕ و بە ئارەزوی خۆیان دزی و كاری تێكدەری ئەنجام بدەن، بەتایبەت ئەو دووكانانەی كە خاوەكانیان كوردن، زورتر دەكرێنە ئامانج لەلایەن ئەو دز و تێكدەرانەوه‌، پۆلیس دەتوانێت شەوانە 6-8 پاسەوان لە ناو بازاڕی شارەكە دابنێت، بۆ ئەوەی بازاڕەكە لە دەست ئەو دز و تێكدەرانە بپارێزن".
ئەو دووكانداره‌ ئاماژەی بەوەدا كە ماوەی سێ‌ مانگ بەر لە ئێستا ژمارەیەك دووكانی ناو بازاڕەكە "بە ئەنقەست" سووتێنران كە هی كوردبوون، گوتیشی: "ململانێی نێوان كورد و توركمان كاریگەری لە سەر ئێمەی دووكانداریش دروستكردووە، لە بەر ئەوەی بازاڕەكە زیاتر لە گەڕەكە توركماننشینەكانەوە نزیكە، تاكو ئێستا چەندەها دووكانی كوردان لە لایەن توركمانەكانی شارەكەوە سووتێنران و تەنها هۆكاریش بۆ ئەو سووتاندنە ئه‌وه‌ بووه‌ كە هی كوردە".
زۆرێك لە دووكاندارە كوردەكانی ناو بازاڕی شاری خورماتوو شوێنەكانی خۆیان بەجێهێڵاوە و دووكانەكانیان لە ترسی سووتاندن و دزی بردۆتە شوێنێكی نزیكی گەڕەكە كوردییەكان. عیماد خەلیلی دووكاندار یەكێكە لەو كەسانە و وه‌ك خۆی باسیكرد چەند جارێك دووكانەكەی لەلایەن توركمانەكانی خورماتووە سووتێنراوە، بۆیه‌ گواستیەتیەوە بۆ شوێنێكی دیكە، گوتیشى "زۆرجاران شەوانە لە ترسی دزی و سووتاندنی دوكانەكەم بە چەكەوە دێمەوە ناو بازاڕ و چاودێری و پاسەوانێتی دووكانەكەم دەكەم، چەندەها دراوسێی دووكانم، كە كوردن، دووكانەكانیان لە ترسی هەڕەشەی توركمانەكانی شارەكە بردووه‌تە نزیك ماڵی خۆیان، چونكە ئەوەی لە ئێستا دژ بە دووكانە كوردەكانی شاری خورماتوو دەكرێت، دزی نییە، بەڵكو ململانێی سیاسییە و توركمانەكان دەیانەوێت بازاڕەكە بە كورد چۆڵ بكەن و دووكانەكانیان بۆ خۆیان داگیر بكەن.
مەحمەد عەبدوڵڵا خاوەنی دووكانی مۆبایلە لە ناو بازاڕی شاری خورماتوو، ئەو بە توڕەییەوە ده‌ڵێت: "حكومەت پۆلیسی هەیەو مانگانە مووچەی باش وەردەگرن، كەچی ئەمە حاڵی ئەمنی شارەكەیە، پاراستنی بازاڕەكە بە شەوانە كار و ئەركی پۆلیسە، بەڵام ناتوانن سەروماڵی هاوڵاتییان بپارێزن".
لەلای خۆیەوە عەلی بەیاتی ئەفسەری بەشی لێكۆڵینەوە لە پۆلیسی خورماتوو، له‌ باره‌ی ئه‌و كێشانه‌وه‌ بۆ میدیا گوتی: "لە ئێستادا بازاڕی شاری خورماتوو شەوانە ئارامە و پۆلیس شەوانە چاودێری بازاڕەكە دەكەن و بە بەردەوامیش دەورییەكان دەسووڕێنەوە، تاكو ئێستاش چەندەها كەسمان دەستگیر كردووە كە شەوانە لە ناو بازاڕی شارەكەدا بە تەمای دزێتی و سووتاندنی دووكان بوون، هەر دووكانێكیش لە كاتی ئەركی هەر پۆلیسێكدا بدزرێت، ئەوا ئەو پۆلیسە بە توندی سزا دەدرێت".
له‌ وه‌ڵامی ئه‌و پرسیاره‌شدا كه‌ دووكانداره‌كانی شارەكە گومانیان لەوە هەیە، كە لەلایەن چەند پۆلێسێكەوە هاوكاری ئەو دز و تێكدەرانە بكرێت، یاخود خۆیان دەستیان لەو كارەدا هەبووبێت، عەلی بەیاتی گوتی: "هەر پۆلیسێك ئەوانەی بە سەردا ساغ ببێتەوە، ئەوا پلەكه‌ی لێوەردەگیرێتەوەو وەكو دز و تێكدەر مامەڵەی لە گەڵ دەكرێت".

كۆمێنتت له‌سه‌ر ئه‌م بابه‌ته‌