رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

میدیا - تایبەت

   بەپێی سەرچاوەكانی هەواڵ، ئاماری له‌سێداره‌دان له‌ ئێران بەسەرجەم نەتەوەكانه‌وه‌ لەماوەی دەوڵەتداری (حەسەن رۆحانی)دا بەشێوەیەكی چاوەڕواننەكراو لەبەرزبوونەوەدا بووه‌، بەپێی ئاماره‌كان رێژەی له‌سێداره‌دان لە ئێراندا 24% زیادی كردووە و لە 115 هەزار كەسدا، كەسێك لەئێران له‌سێداره‌ دەدرێ.

هەمزە ئاگوشی چالاكی سیاسیی دووره‌وڵات، لەلێدوانێكی تایبەتدا بۆ میدیا، سه‌باره‌ت به‌ به‌رزبوونه‌وه‌ی رێژەی له‌سێداره‌دان لەماوەی دەوڵەتداری سه‌رۆك كۆمارى ئێران (حەسەن رۆحانی)دا، گوتی: "گەلانی ئێران دەنگیان بە ئاڵوگۆڕ دا، نەك بە رۆحانی، ئەم دەستەواژەیە، پەیامی ئاشكرای كۆمەڵانی خەڵكی ئێران بوو بۆ دەستەڵات، خەڵكی ئێران لەوە دڵنیایە كە لەچوارچێوەی نیزامی كۆماری ئیسلامی ئێراندا هیچ یەك لە داخوازییەكانیان وەدی نایەت و ئەوەی كە مۆرەیەكی دیكەی دەسەڵات وەك ئاغای رۆحانی بە هێندێك دروشمی بریقەدار و دەمامێكی دیكەوە قوت دەكرێتەوە، ئەوە پەلەقاژەكانی كۆماری ئیسلامییە بۆ دەربازبوون لەو قەیرانە ئابووری و سیاسییەی كە تێیدایە". ئاگوشی جه‌ختی له‌وه‌ كرده‌وه‌ كه‌ چاوەڕوانییەكانی خەڵكی ئێران بەگشتی لەچاوەڕوانییەكانی دنیای دەرەوە جیاوازە، گوتیشی: "دنیای دەرەوە كێشەی چەكی ئەتۆمی و كۆمەڵێك كێشەی ناوچەیی لەگەڵ ئێران هەیە، بەڵام كێشەی خەڵكی ئێران، كێشەی ئابوورییە، كێشەی ئازادییە، كێشەی ماف و داخوازییەكانیانە، كێشەی كه‌لتووری و نەتەوەییە، كێشەی مەزهەبی و دەیان و كێشەی دیكه‌یه‌ كە بەرۆكی خەڵكی ئێرانی گرتووە و بێشك كەسێكی وەك ئاغای رۆحانی كە خۆی بەشێك لەو دەسەڵاتە بووە و سوێندخواردووی بەیتی رەهبەرییە، ناتوانێ لە ئاستی چاوەڕوانییەكاندا بێت، بەپێی ئامارەكان، بە دوای هاتنەسەركاری ئاغای رۆحانی، لانیكەم رۆژێ دوو كەس لە سێداره‌ دراون، ئەوەش باشترین بەڵگەیە بۆ سەلماندنی ئەو راستییە كە ئەو ئەكتەرە تازەی كۆماری ئیسلامی بۆ چەواشەكردنی كۆمەڵگه‌ی نێودەوڵەتی هێناویانه‌تە كایەوە، هیچ جیاوازییەكی لەگەڵ ئەوانی پێش خۆی نییە، ئەویش یەكێكی ترە لەو مۆرانەی دەسه‌ڵات كە یاری بە چارەنووسی خەڵكی ئێران دەكەن، من خۆم هیچ جیاوازییەك لە نێوان ئاغای ئەحمەدینەژاد و ئاغای رۆحانیدا نابینم و لاموایە ئەكتەربازییەكانی ئاغای رۆحانی بۆ خەڵكی ئێران مەترسیدارترە".
لەبەشی تایبەت بە ئێعدامی راپۆرتی ساڵانەی كۆمەڵەی بواری مافی مرۆڤدا هاتووە: "هیچ زانیارییەك سەبارەت تۆمەتی 29 لەسەدی ئێعدامكراوەكان و ناسنامە و رەگەزیان لەبەردەستدا نییە و هەروەها هێزی دادوەری نیوەی ئێعدامەكانیشی بە نهێنی جێبەجێ كردووە، كە ئەمەش ئەوە پیشاندەدا دەزگای دادوەری لەرەوەندی ئیعدامەكان تاچەندە ناڕوون بووە".
بەپێی هه‌مان راپۆرت لە ئێران رێژەی ئێعدام 24% زیادی كردووە و لە 115 هەزار كەسدا، كەسێك لەئێران ئیعدام دەكرێ، لەنوێترین راپۆرتی ساڵانەی خۆیدا ناوەندی ئامار و كۆمەڵەی چالاكانی مافی مرۆڤ لە ئێران، ئاماژە بەوەكراوە كە بۆ یەكەمجار ناوی 157 زیندانی مەحكووم بە ئێعدام بڵاو دەكاتەوە.
له‌ لایه‌كی دیكه‌وه‌ كۆنگرەی دیموكراتی گەلان HDK لە نامەكەیدا كە بۆ سەرۆك كۆماری ئێران ناردوویەتی ڕایگەیاندووە: "ئێمە بە شێوەیەكی غەمگین دەبینین كە لە ئێران وەك 30 ساڵی پێشوو بە شێوەیەكی سیستماتیك سزای سێدارە جێبەجێ دەكرێت. لە مانگی ئاگۆستی 2013ـەوە كە ئێوە وەك سەرۆك كۆمار هاتوونەته‌ سەر كار، بە دەیان كەس لەسێدارە دراون. لەسێدارەدانی سمكۆ خورشیدی سزادانی 30 گیراوی سیاسی و ئایینی بە سێدارە مەترسییەكی مەزنی درووست كردووە، دەبێ بە زووترین كات مافی ژیانی مرۆڤەكان پێداچوونەوەی بۆ بكرێتەوە و دەست لە سزای دژە مرۆڤانەی سێدارە هەڵبگیرێت".
له‌ لای خۆیه‌وه‌ هاوسەرۆكایەتی دەستەی بەڕێوەبەری KCK بە هاتنی چوارەمین ساڵوەگەڕی لەسێدارەدانی ئەندامانی PJAK هەر یەك لە فەرزاد كەمانگەر، فەرهاد وەكیلی، شیرین عەلەم هولی و عەلی حەیدەریان لەلایەن رژێمی ئێرانەوە، پەیامێكی نووسراوی بڵاوكردەوە و بانگەوازی لە ئێران كرد كە لەچوارچێوەی چارەسەری كێشەی كورد هەنگاوبهاوێژێت و لەسێدارەدان بوەستێنێت.
هاوسەرۆكایەتی دەستەی بەڕێوەبەری KCK لەپەیامەكەیدا رایگەیاندووه‌: "بەهاتنی چوارەمین ساڵوەگەری لەسێدارەدانی فەرزاد كەمانگەر، فەرهاد وەكیلی، شیرین عەلەم هولی و عەلی حەیدەریان جارێكی تر رژێمی ئێران شەرمەزار دەكەین و پەیمانی بەهێزكردنی تێكۆشان جارێكی تر دووبارەدەكەینەوە. كەسایەتی ئەو شەهیدانە و تەواوی شەهیدانی كوردستان بەبیردێنینەوە، كاتێك چوونە سەر پەتی سێدارە هەڵوێستێكی پیرۆزیان نیشاندا و بوونە سیمبوڵی داستانی قارەمانی، نەبەزی و بەرخۆدانی كوردان. هەوڵێستی قارەمانانەی شێخ سەعید، سەید رەزا، شێخ عەبدولسەلام، قازی محەممەد و لەیلا قاسم هەتا رۆژی ئەمڕۆیان هێناین، دەستیان لە فیداكردنی رۆحی خۆیان بۆ گەلەكەیان بەرنەدا و هیوای ئازادییان زیندوو هێشتەوە، ئەو هەڵوێستە پیرۆزەی گەنجانی كورد كە بەر لەوەی بچنە سەر پەتی سێدارە، بەنامە و داستانی قارەمانی خۆیان، بۆ نەوەكانی داهاتوو مانیفیستۆی بەرخۆدان و ژیانیان بەجێ هێشت".

كۆمێنتت له‌سه‌ر ئه‌م بابه‌ته‌