رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

  میدیا - باكووری كوردستان

لــــــــــــه‌گــه‌ڵ نزیكبوونه‌وه‌ی هه‌ڵبژاردنه‌كانی توركیا كێشه‌كانی ئەردۆغان و عەبدوڵڵا گول په‌ره‌ده‌ستێنێ، شاره‌زایه‌كی سیاسه‌تی توركیاش جه‌خت له‌وه‌ ده‌كاته‌وه‌ کە AKP لەئاستی نێودەوڵەتی و ناوخۆی تورکیاش پێگه‌ی لاواز بووه‌.

چاودێری سیاسی و شاره‌زای ره‌وشی سیاسی توركیا (فوئاد زیندانی)، كه‌ هاوكات سەرۆكی (فیدراسیۆنی زیندانیانی سیاسی كوردستان)ـه‌، له‌ ئاخافتنێكیدا بۆ میدیا، سه‌باره‌ت به‌ كێشمه‌كێشه‌كانی نێوان ئەردۆغان و عه‌بدوڵڵا گول، سه‌ره‌تا به‌ پێویستی ده‌زانێت كه‌ پێداچوونەوەیەکی کورت بۆ ژیانی سیاسی ئەو دوو کەسایەتییەی ده‌سه‌ڵاتی سیاسی له‌ توركیا بكات و، دواتر به‌مجۆره‌ شرۆڤه‌ی دۆخی سیاسیی توركیای كرد: رەجەب تەیب ئەردۆغان لەدایکبووی ساڵی 1954ی شاری (ئەستەنبۆڵ)ـه‌و بۆ ماوەی چوار ساڵ شارەداری مەزنی ئه‌و شاره‌ بووە، سەرۆکی پارتی دادوگەشەپێدانی (AKP) کۆنزەراتیڤە، دوای ئەوەی لەهەڵبژاردنەکانی ساڵی 2002 سەرکەوتنی بەدەستهێنا، لەئاداری ساڵی 2003 بەفەرمی بووە سەرۆکی ئەنجومەنی وەزیرانی تورکیاو ساڵی 2011 بۆ جاری سێیەم کابینەی حکومەتی پێکهینا. عه‌بدوڵڵا گول لەدایکبووی ساڵی 1950ی شاری قەیسەری تورکیایه‌و لەساڵی 2002 دوای سەرکەوتنی پارتەکەی، واته‌ پارتی دادوگەشەپێدان (AKP)، پۆستی وەزیری دەرەوەی تورکیای وەرگرت، ساڵی 2007 لەسەر پێشنیاری ئەردۆغان سەرۆکی پارتەکەی (AKP) عه‌بدوڵڵا گول بووە کاندیدی سەرۆکایەتی کۆمار، لەمانگی ئابی ساڵی 2007 وەک یازدەمین سەرۆک کۆمار لەمێژووی تورکیا پۆستی سەرۆک کۆماری بەدەستهێنا. ئەردۆغان سەرۆکی پارتی دادوگەشەپێدان لەماوەی 12ساڵی رابردوودا توانی دەستکەوتی ئابووری مەزن بۆ تورکیا بەدەستبهێنێ، بەڵام لەهەمانکاتدا شکستی گەورەشی بەدوای خۆیدا هێنا، لەوانە: کۆنتڕۆڵکردنی هەموو بوارەکانی ژیان لە تورکیا، ناڕوونی پرۆسەی ئاشتی نێوان بزووتنەوەی ئازادیخوازی کورد و حکومەتی تورکیا، کارکردن و هاوکاری بەردەوام لەگەڵ بزووتنەوەی فه‌تحوڵڵا گولەن و حزبە نەژادپەرستەکانی تورکیا، ئەنجامدانی تاوانی کۆمەڵکوژی رۆبۆسکی، ئەشکەنجەدان و کوشتنی زیندانییانی سیاسی، مانەوە لەبەردەم دەرگای یەکیێتی ئەوروپا بە ئەندام نەبوونی تورکیا لەو یەکێتییەدا، پاڵپشتیکردنی تیرۆر و پێشوازیکردن لە تیرۆریستان و ناردنیان بۆ سوریا و بەکارهێنانیان لەدژی گەلی کورد لەڕۆژئاوای کوردستان و....هتد، ئەوەی کە گەلانی تورکیا و هەموو یه‌كێتی ئەوروپای بێزارکردووە، پاشەکشەی ئەردۆغان و AKPیە لەڕیفۆڕم و لەو بەهارەی بەناوی چاکسازی پڕوپاگەندەی بۆ دەکرد، کار گەیشتە ئەو ئاستەی پەرلەمانی تورکیا لەژێر ناوی یاسای ئینتەرنێت ویستی دەرگای چاودێریکردن بەسەر هەموو هاوڵاتیانی تورکیا بکاتەوە، بەپێی ئەو یاسایە حکومەت دەتوانێ زۆر بەخێرایی دەستوەردان بکا، بەتایبەتی لەبوارەکانی تویتەر و یوتوب و فەیسبووک و ماڵپەڕە کۆمەڵایەتییەکانی دیكه‌، بۆ رەتکردنەوەی ئەو یاسایەش هیچ رێگایەک نەمابوو، تەنیا بەپێی دەستووری تورکیا سەرۆک کۆمار مافی ئەوەی هەیە ڤیتۆ بەکاربێنێ و یاساکە رەتبکاتەوە و بینێرێتەوە بۆ پەرلەمان. لێرەدا عه‌بدوڵڵا گول وەک سەرۆک کۆمار بۆ جاری یەکەم دەبێ بەرەنگاری ئەردۆغان ببێتەوە، کە جگە لەوەی سەرۆکی ئەنجومەنی وەزیرانە، هاوکات سەرۆکی پارتەکەیەتی. ئەردۆغان دوای ئەوەی لە ئا تیڤی تورکی رایگەیاند کە دوای هەڵبژاردنی داهاتووی شارەوەنییەکان (كۆتایی ئەم مانگە) ماڵپەڕەکانی یوتوب و فەیسبووک دادەخەم، شەقامی تورکی بەتەواوی وەکو تاکە ئومێدێک چاویان بڕیبووە سەر (عه‌بدوڵڵا گول)ی سەرۆک کۆمار بۆ هەڵوەشاندنەوەی ئەو یاسایەی کە ئەردۆغان هەڕەشەی پێدەکرد، لەکۆتاییدا عه‌بدوڵڵا گول ڤیتۆی بەکارهێنا یاساکەی پەسەند نەکرد، زانی ئەو یاسایە یاسای کەلەبچە و کۆت و بەندکردنی هاوڵاتیان و گەڕاندنەوەی تورکیایە بۆ ریزی وڵاتێکی وەکو ئێران و ئەو وڵاتانەی کە سانسۆڕی ئینتەرنێتیان کردووە. ئه‌وه‌ش پێشێلکردنی ڕەهای مافی کەسەکانە و تووڕەبوونێکی دیكه‌ی یه‌كێتی ئەوروپا بەدوای خۆیدا دێنێت، بۆیە گەڕاندیەوە بۆ پەرلەمان. خاڵێکی دی کە عه‌بدوڵڵا گول و پارتی AKPی بێزار کرد، دوای ئەوەهات کە تۆمارێکی دەنگی ئەردۆغان بڵاوکرایەوە لەڕێگەی تەلەفۆن بە (بیلال)ی کوڕی خۆی دەڵێ: (40) ملیۆن دۆلار پارەکە بشارەوە!. عه‌بدوڵڵا گول گەیشتە ئاو باوەڕەی کە AKP ئاستی جەماوەریی لەدابەزیندایە، لەلێدوانێکیدا گول رایگەیاند داخستنی فەیسبووک و تویتەر بابەتی گفتوگۆکردن نییە. عه‌بدوڵڵا گول و تەنانەت خودی ئەردۆغان پێشبینی دەکەن کە چۆن تۆماری دەنگی لەڕێگەی تاقمی (فه‌تحوڵڵا گولەن)ی هاوپەیمانیان بڵاوکرایەوە، گرتەی ڤیدیۆیی ژووری نووستن و گرتەی فیلمی سێکسی و تۆماری دەنگی تەلەفۆنی ئەندامانی (AKP)ش لەلایەن تاقمی فه‌تحوڵڵا بەهەمان شێوە بڵاوبکرێتەوە. عه‌بدوڵڵا گول دەزانێ سەردەمی ئەوە بەسەرچووە لە ساڵۆنەکانی یه‌كێتی ئەوروپا پێشوازی لەئەردۆغان بکرێ، بەتایبەتی دوای مردنی منداڵێکی تەمەن 14 ساڵ كه‌ پاش 269 رۆژ مانەوە لە کۆما کە مانگی حوزێرانی ڕابردوو لە ڕاپەڕینی پاکی گازی لەئەستەنبۆڵ لەلایەن پۆلیس بریندارکرابوو، مردنی ئەو منداڵە لەڕۆژانی رابردوودا خۆپیشاندانی چەند ملیۆنی لەدژی ئەردۆغان و AKP بەدوای خۆیدا هێنا، ئەوەش هێمایەکی دیكه‌یه‌ بۆ ئه‌وه‌ی نە لە ئاستی نێودەوڵەتی و نە لە ئاستی ناوخۆی تورکیا هەردوولا(ئەردۆغان)یان ناوێ .

كۆمێنتت له‌سه‌ر ئه‌م بابه‌ته‌