رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

      میدیا – كارزانی مامەندپیران

 

  دوای ئەوەی داعش خۆی گەیاندەوە گوێڕو چەند كاتژمێرێك لەم شارەدێیە مایەوە، بەڵام هەر زوو لەلایەن پێشمەرگە وەدەرنران و رووبەڕووی شكست بوونەوە، ئەوەی لێرە جێگای سەرنجە مانەوەی ماڵە كوردێكە لەم شارەدێیە لەكاتی هاتنی داعش، كە تا پێشمەرگە شارەدێكەی رزگار كردەوە، هەر لەناو گوێڕ مابوونەوە، چیڕۆكی مانەوەو رزگار بوونیان لەزاری مامۆستا تەها عەزیز بۆ خوێنەرانی میدیا دەگێڕینەوە.

 

چەند رۆژێك بوو بەنیازی سەردانی ماڵی مامۆستا تەها بووم، تا چیڕۆكی جێمان و رزگار بوونیان لەژێر دەستی داعش بۆ میدیا بگێڕێتەوە، ئێوارەیەكی ئەم زستانە بەر لەخۆرئاوا بوون، گەیشتمە هەولێرو لەگەڕەكی نازماوەی شاری هەولێر، هەر چۆنێك بوو بەتەلەفۆن و پرسیار ماڵی مامۆستام دۆزییەوە، ئەو دانیشتووی شارەدێی گوێڕەو ئێستا ئاوارەی شاری هەولێر بووە، دوای تێپەڕبوونم بەكۆڵانێكی قوڕاوی سەرەنجام گەیشتمە ماڵی مامۆستا تەها لەگەڕەكی نازماوە، كە لەخانوویەكی 100 مەتری كرێدا ژیان دەگوزەرێنێت و بەهۆی پەلاماری داعش و نائارامی شارەدێكەی ئاوارەی هەولێر بووە.

مامۆستا تەها عەزیز حوسێن مامۆستای وەرزشەو لەساڵی 1964 لەشارەدێی گوێڕ لەدایك بووە وەك خۆی دەڵێت" هەر لەو گوێڕە بەستەزمانە لەدایك بوویمە و هەر لەوێش دەبم و خێزاندارم و هەشت منداڵیشم هەیە، كە پێنج كچ و سێ كوڕە"، مامۆستا ئەو شەوەی داعش بۆ جارێكی دیكە هێرش دەكاتەوە، مامۆستا درەنگی بەنیازی رزگار كردنی خێزانەكەی دەبێت، بەڵام چەكدارانی داعش هیندە نزیك دەبنەوە، بۆیە ناتوانێت لەماڵ بێتە دەرەو ئەو شەوە تا بەیانی لەگوێڕ دەمێنێتەوە، كە پێشمەرگە گوێڕ لەداعش پاك دەكەنەوە، ئەویش لەماڵەكەی دێتە دەرەوەو روو لەشاری هەولێر دەكات.

مامۆستا تەها بەم شێوەیە چیڕۆكی ئەو شەوە دەگێڕێتەوە" گوێڕ ناوچەیەكی مەترسیدارە، چونكە سەرسنوورە لەگەڵ داعش، گوندەكانی دەوروبەری گوێڕ، وەكو گوندەكانی كەنهەش و حاسودیە و گەهارە و عەدلە و گوبێبە لەسەر زێی گوێڕن، داعش دەتوانێت لەرێگای ئاوییەوە بێنە ناو گوێڕ، لەناو گوێڕیش زۆر شارەزان، چونكە عەرەبی ناو گوێڕ لەناو داعش هەیە شارەزای كوڵان و نەخشەی گوێڕە، ئەو شەوەی كە داعش گەیشتنە ناو گوێڕ، ئەو شەوە دیار بوو شتێك هەبوو، لایەنی پەیوەندیداریشمان لەم رەوشە ئاگادار كردبۆوە، بەڵام كەمتەرخەمی هەبوو، بنكەیەكی ئاسایش لەنزیك ماڵی من بوو، وتیان ئەگەر شتێك بوو ئاگادارت دەكەینەوە، بەڵام سوپای عێراقی لەگوندی كەپران لای قوتابخانەی هەتاو كشابوونەوەو لەوێ داعش لەزێ پەڕیبوونەوە و سوپای عێراقیش ئەو خاڵەیان بەردابوو بەرگریشیان نەكردبوو، داعش بە بەلەم لەیەك شوێن هاتبوو، بەڵام لەچەند شوێنێك پەڕیبوونەوە، گوندی كەپران یەك لەو شوێنانە بوو، هەروەها لای دوبەی كۆن پەڕیبوونەوەو بەرە و گردی شێلێ چووبوون، لەوێ سوپای عێراقی لێبوو كە داعش هاتبووە پێش چۆڵیان كردبوو".

مامۆستا تەها درێژە بەچیڕۆكەكە دەدات و دەڵێت" برادەرێكی عەرەبم كاتژمێر 11 ی شەو ئاگاداری كردمەوە وتی لەگوێڕ بڕۆ دەرەوە، چونكە سەگ و سواری ئەو ناوەیان كۆكردووەتەوەو ژمارەیان زۆرەو هاتوونەتە حاسودیە، زۆر تكای لێكردم كە بڕۆم، بەڵام بەقسەم نەكردو وتم سوپای عێراقی و پێشمەرگە لێرەیە، ئیتر دەرنەچووم و مامەوە، بەڵام داعش بەرۆژ هاتبوونە حاسودیە و كۆبوونەوەیان كردبوو، كە چی بكەن و چۆن لەئاو بپەڕنەوە و تەنانەت بەلەمەكانیشیان بەگەڵابە هێنابوو ئامادەی كردبوو، دواتر ئەحمەدی برام ئەمجارە تەلەفۆنی بۆ كردم وتی وەرە گامێشتەپە، دیسان بەهەندم وەرنەگرت، ئەو رۆژە سارد بوو وتم پێویست ناكات بچمە ماڵە خزمان بەم سەرماو سۆڵەیە، بەڵام چەكم هەڵگرت و لەماڵ مامەوە، تا كاتژمێر 1:30 خولەكی شەو، ئەمجارە برادەرێكم مفەوەزێكی ئاسایش بەناوی عیماد تەلەفۆنی بۆ كردم وتی لەكوێی وتم لەگوێڕم، وتی منداڵەكانت هەڵگرەو وەرە رێگای دیبەگە، پرسیم چی بووە، وتی داعش خەریكه‌ بگاتە ناو گوێڕ، منیش چوومە سەربان بینیم دەنگی تەقە دەهات، سەیرم كرد لەسەرەوەی گوێڕ رستەیەك گوللە عەریق بۆ ئاسمان چوو، لەودیو چەند تەقەیەكی عەریق وەڵامی دایەوە، وتم ئەوە نهێنی خۆیانە تەواو راستە".

مامۆستا درێژە بەچیڕۆكی ئەو شەوە دەدات و دەڵێت" كە زانیم بووە راستی، بەپەلە چوومە خوارەوەو منداڵەكانم هەستاند و چوومەوە سەربان، گوێم راگرت زۆر نزیك ببوونەوە، بەگوێڕەی هەڵسەنگاندنی خۆم 150 – 200 مەترێك لێم نزیك بوون، بۆیە نەمتوانی دەرچم، داعش گەیشتبووە ناو گوێڕ، هەرچەندە پێشمەرگە بەرگریشی دەكرد، كاتێك زانیم تەواو دەرناچم منداڵەكانم بردە ژوورەوە لەدەرگا درا، بانگیان كردم و وتیان دەرگا بكەوە و دەستت بەرز بكەوە و مەترسە، خێزانەكەم وتی لەدەرگا دەدەن ویستم بچم دەرگا بكەمەوە، خێزانەكەم نەیهێشت و گڵۆپم كوژاندەوە و بەمنداڵەكانم وت بێ دەنگ بن و پاڵ بدەنەوە، منیش كلاشینكۆفەكەم لای خۆم داناو وتم ئەگەر هاتنە ژوورەوە تا دوا فیشەك بەرگری دەكەم تا دەكوژرێم، دوای كەمێك رۆیشتن، ئەو شەوەش تا بەیانی شێخ عجیل نوری (سەرۆك عەشیرەتی بلباس لەمەخموور) و محەمەدی برای پەیوەندییان پێوە دەكردم، ماڵە خزمەكان و خوشك و براكانم پەیوەندییان پێوە دەكردم، دواجار محەمەد تەلەفۆنی كرد وتی مادام مەجالی دەرچوونت نییە لەژوورەوە بمێنەوەو خۆت رابگرە تا پێشمەرگە دەگاتە لات، ئەو شەوە تەلەفۆنێكی ئێجگار زۆرم بۆ كرا، تەنها ئەو تەلەفۆنانەی وەڵامم نەدایەوە 270 تەلەفۆن بوو، شەوێ گوێم لەدەنگی داعش دەبوو كە دەهاتن و دەچوون لەكۆڵان، من ترسم لەخۆم نەبوو، ترسم لەمنداڵەكان و خێزانەكەم بوو، ئەگەر تەنها بوومایە دەمتوانی هەرچۆنێك بووایە خۆم قوتار بكەم، راستەوخۆ بەرەو گەڕەكی زمارە جاسم هاتن، كە گشت ماڵە عەرەبەكان لەم گەڕەكەن، تەنها چەند ماڵە كوردێكی تێدایە، لەو گەڕەكە بڵاو بوونەوەو چوونە سەر كۆشكەكان.

هەروەها دەشڵێت" مامۆستایەكی هاوڕێم ئێستا بریندارەو رزگاری بووە، كاتێك هەڵاتوون لەگوێڕ لەنزیك بازگەكە داعش تەقەی لێكردبوون، ئوتومبێلەكەیان وەرگەڕا بوو، كە خۆی و كوڕەكەی و دوو دراوسێی لەگەڵ بوو، ئەوان شەهید ببوون و خۆیشی بریندار ببوو، بەڵام خۆی بەمردوو نیشان دابوو لەپەنا ئەوانی تر، دەیگوت داعشەكان كوردیشیان لەگەڵ بووە، جگە لەمن مامۆستایەكی عەرەبیش بەمەلا خەڵەف ناسراوە ئەویش لەگوێڕ مابوویەوە، ئەویش نێوانی لەگەڵ داعش خۆش نییە، ئەگەر بكەوێتە دەست داعش وەكو كار سەری دەبڕن، ئەویش بەخاوخێزانەوە خۆی لەماڵ شاردبوویەوەو گڵۆپەكانی كوژاندبۆوە، ئەوانیش رزگاریان بوو نەكەوتن دەست داعش، كە لەماڵەوە دوو خێزانن، داعش پیاوی شەڕ نین، چونكە لەگەڵ بانگی بەیانی هاتمە حەوشە، گوێم لێبوو داعشێك رێگای ون كردبوو، لەوانی تر دابڕابوو دەگریاو هاواری دەكرد یەوێل ئەحمەد، یەوێل ئەحمەد ئەنتە وێن، جا وەرە لەگەڵ پیاوی وا شەڕ بكە، كاتێك فڕۆكەكان دەهاتن ئەوان لەترسان رایاندەكردە ژوورەوەو شوێن نەدەما خۆیان تێدا حەشار بدەن، دەیانویست بخزێنە نێو دیوارەكان لەترسی خۆیان، بەڵام كەس نەبوو شەڕیان لەگەڵدا بكات".

كەی پێشمەرگە هات؟ ئەمە پرسیاری ئێمە بوو، لەوەڵامدا وتی" كاتژمێر پێنج كوڕە خاڵێكم تەلەفۆنی بۆ كردمەوە وتی خاڵە شتێكی وا نەماوە بەپشتیوانی خودا ئێوە رزگارتان بووە مەترسن، منیش تا بەیانی بەئاگابووم، جارجارە دەهاتمە دەرەوە جارێك بیستم یەكێكیان وتی ئەو ماڵە ئوتومبێلی تێدایە، دیار بوو لەكاتی رۆیشتنیان بوو، كاتێك دونیا رووناك بوو چوومە سەربان، بینیم داعش هاتبوونە خوارەوەو بەرەو سەر زێیەكە كشابوونەوە، بووە كاتژمێر هەشت و نیو ئوتومبێلێك بەخێراییەكی زۆر رۆیشت سەیرم كرد، ئەو ماڵە عەرەبە بوون كە لەگوێڕ مابوون، منیش وتم خێرا سەركەون با ئێمەش دەرچین، خێزانەكەم پرسی هیچ نەماوە؟ وتم نەخێر دڵنیابن، دەرگای حەوشەم كردەوە ئوتومبێلەكەم بێنمە دەرەوە بینیم هامەڕێك و باجەرێك هاتن، ئاڵای كوردستانی پێوە بوو، لەگەڵ هامەرێكی ئاسایش هەڤاڵ هندرێنیشیان لەگەڵ بوو، دیاربوو بەرپرسی میحوەری مەخموور رەوانەی كردبوو، چونكە ئەو زانیاری هەبوو كە من لەگوێڕ ماومەتەوە، كاتێم ئەوان گەیشتنە من وتیان لێرە چی دەكەیت؟ وتم وا لێرەم وتیان وەرن سەركەون با رزگارتان بكەین، هەڵوێستیان هەبوو، بەڵام من وتم نا ئەوەتا ئوتومبێلم پێیە، چونكە نەمویست منداڵەكانم جارێكی تر بێنە خوارەوە، نەوەك داعش مابن لەشوێنێك خۆیان حەشار دابێت، بەهەر حاڵ ئەوان لەگەڵم هاتن تا منیان گەیاندە لای پێشمەرگەكان و لەوێ بەرەو هەولێر بەرێكەوتم".

مامۆستا دێتە سەر باسی منداڵەكانی دەڵێت" زۆر پێم سەیر بوو، منداڵەكانم تا بەیانی دەنگیان لێوە نەهات، فڕۆكەی هاوپەیمانان بۆردومانی دەكرد، جارجارە منداڵەكانم بەهێدی دەیانپرسی باوكە ئەوە داعشە هات، دەمگوت بەڵێ ئیتر بێ دەنگ دەبوونەوە، بەراستی زەحمەتە هەشت منداڵ كە زۆربەیان بچووكن لەترسی خۆیان هاوار نەكەن و بێ دەنگ بمێننەوە، بەهەر حاڵ منداڵە بچووكەكەم تەمەنی 10 رۆژ بوو شەوانە تا بەیانی دەنگی دەهات، ئەو شەوە سوبحانەڵڵا لەكاری خودا دەتگوت سڕكراوە، تا بەیانی خەوی لێكەوت و نەگریا لەناو ئەو تۆپباران و بۆردومانی فڕۆكەو هاوەن دەهات".

لەكۆتاییدا مامۆستا دەڵێت" بەداخەوە ئەو خەڵكە لێرە شەهید بوون و كەسانێك كەوتنە دەست داعش، داعشیش كوژراویان هەبوو، فڕۆكە لەبازگەكەی دابوو دیاربوو یەكێك لەوانەی لەوێ كوژرابوو موسڵمانیش نەبوو، چونكە سونەت نەكرابوو، سەبارەت بەگوێڕیش مەترسی هەر لەسەر دەبێت، تا ناوچەكانی ئەو زێ رزگار نەكرێن تا قەرەقۆش، چونكە ئەو خەڵكانە شارەزای تەواوی شارەدێكەن و دەزانن چەند كۆڵانی تێدایەو چۆنەو چۆن نییە، خەڵكی ئەو ناوچەیە زۆرێك لەگەڵ داعشدان، خەڵكیش هەیە عارەبەو دژی داعشە، گوێڕ ناوچەیەكی ستراتیژییە، گوێر بگیرێت مەترسی لەسەر چوارریانی دیبەگە دەبێت و مەخمووریش دەكەوێتە مەترسییەوە، داواكارم حكومەتی هەرێم ئەوانەی كەمتەرخەم بووینە كاری پێویست لەهەمبەریان بكات".

دواپرسیارمان ئەوە بوو، مامۆستا چۆن پێناسەی ئەو شەوە دەكەیت؟ لەوەڵامدا دەڵێت" ئەوەی لەسەرەوە باسمان كرد هەر بەقسە خۆشە، شەوێكی درێژو تاریك، بێ پشتیوان لەگەڵ خانەوادەیەك لەچاوەڕوانی مەرگ بیت و كەس بەهاناتەوە نەیەت، لەمردنیش گرنگتر شەرەف و نامووس بوو، چونكە ئەو دوژمنە لەبەدڕەوشتی ناوی دەركردووە، لەگەڵ ئێزیدییەكان و مەسیحییەكان بەدڕەوشتی خۆی نیشانداوە، لەگەڵ هەموو كەسێكیش بەكاری دەهێنێت".

كۆمێنتت له‌سه‌ر ئه‌م بابه‌ته‌