میدیا - ژیلە ئامانج

  بەهۆی زیاتر كرانەوەی كۆمەڵگای كوردی بەرووی جیهان و خستنەڕووی مەسەلەی ئازادی و ماف، ژمارەی ئافرەتانی كارا و خودان پیشەو مووچە بەرە و زیادی رۆیشت، بەڵام ئەمە نەبووەتە هۆی بنەبڕ كردنی ئەو رێگرییەی لەئافرەتانی كۆمەڵگا دەكرێت، ئێستاش رێگرییەكان بەردەوامن و سنوورەكان قەتیس كراون، لەلایەن دەسەڵاتی كۆمەڵگای پیاو سالاری و ئافرەت ناتوانێت دەربازی ئەودیو هێڵە سوورەكان ببێت.

بەناز عومەر ئافرەتێكی فەرمانبەری تەمەن (30) ساڵەیە، بۆ میدیا رێگرییەكانی چوونە دەرەوەی باس دەكات و دەڵێت" من بەپیشەی فەرمانبەرییەوە خەریكم، بەیانیان دەچم بۆ دەوام وە دوای دەوام راستەوخۆ دەگەڕێمەوە بۆ ماڵەوە، چونكە بەئازادانە ناتوانم بۆ هەر شوێنێك بمەوێت بچم، لەبەر ئەوەی لەماڵەوە دەڵێن جوان نیە ئافرەت بێ هۆكار بچێتە دەرەوە، تەنها رێگەی ئەوەم پێ دەدەن بۆ دەوام بەتەنها بچمە دەرەوە، گەر بۆ دەرەوە بڕۆم دەبێت لەگەڵ ئەندامانی خێزانەكەم بچمە دەرەوەو منیش ناچارم بەگوێیان بكەم".
مامۆستا (نەزیرە حەسەن) ی تەمەن (35) ساڵەیش كە لەیەكێك لە قوتابخانەكانی شاری هەولێر دەوام دەكات، دەڵێت" من وەك مامۆستایەك بەیانیان یان نیوەڕۆیان دەچمە دەوام، دوای گەڕانەوەم لەدەوام ئازادم بمەوێت بۆ هەرشوێنێك بڕۆم، چونكە دیارە من ئیشێكم هەیە بۆیە دەچم، ئەگینا كەس بێ كارو بێ هیچ هۆیەك ناچێتە دەرەوە، كەسیش ناتوانێت ببێتە رێگر لەدەرچونی من بۆ دەرەوە، لەبەر ئەوەی خۆم خاوەن بڕیارم ".
ئەوانەی زیاتر رێگری چوونە دەرەوەیان لێدەكرێت ئافرەتانی ماڵەوەن، وەك (ژیان ستار) ی تەمەن (25) ساڵە باسی دەكات، ئەو هیچ دەوامێكی فەرمی نییە و ئافرەتی ماڵەوەیە لەوبارەوە دەدوێت" هەموو كات دەڵیم خۆزگە منیش بەردەوام بوومایە لەخوێندن، هەر هیچ نەبێت ئەوكاتە دەمتوانی بۆ دەوام بچمە دەرەوەو هەمیشە لەژوورەوە نەمێنمەوە، چونكە من ناتوانم بەئازادانە بچمە دەرەوە گەر شتێكم پێویست بێت دەبێت لەگەڵ دایكم بچمە دەرەوە، ئەگەر دەوامێكم هەبووایە دەمتوانی بەئازادانە بچمە دەرەوەو كەسیش رێگرم نەدەبوو، بەڵام چیبكەم نەمتوانی درێژە بەخوێندن بدەم، هەرچەندە ناكرێ ئافرەت وابێت، دەبێت تارادەیەكیش خاوەن بڕیار بێت لەناوكومەڵگا، بەڵام كۆمەڵگای ئێمە رێگرە لەبەرامبەر كارەكانی ئافرەتان و بڕیاری ئافرەتان، حەز دەكەم كۆمەڵگا ئیتر نەبێتە رێگرو مافی ئافرەتیش بدات".
(ئەمیرە عەونی) تەمەن (20) ساڵەیش ئافرەتێكی دیكەی ماڵە، حەز بەدەرخستنی هێزو توانای خۆی دەكات و دەڵێت" وەك ئافرەتێكی ماڵەوە زۆر حەزم لێیە لەدەرەوەی ماڵ كار بكەم، وەك هەموو ئافرەتانی دەرەوەی ماڵ، منیش حەز دەكەم خاوەن هێزو دەسەڵاتی خۆم بم، بەڵام لەماڵباتەكەم بوونەتە رێگر لەبەر دەمم و ناهێڵن بەحەزی خۆم كار بكەم، هەموو كات دەڵێن با خەڵك قسەمان لەسەر نەكات، واز لەكار كردن بێنە خۆ شتێك هەر دەبێ بیخۆین و لەبرسان نامرین، وا دەزانن ئێمە لەبەر پارە هەڵدەستین كار دەكەین، بەڵام ئێمە دەمانەوێ خۆمان لەسەر پێی خۆمان بوەستین هەموو كارەكان بتوانین خۆمان ئەنجامی بدەین".
توێژەرێكی كۆمەڵایەتی (ئارام باوەدین) پێیوایە، هیچ پەیوەندییەك لەنێوان فەرمانبەر بوونی ئافرەتان و كێشەی خێزانی نییە، ئەوەی كێشەكەی خوڵقاندووە، تێڕوانینی تاكی كۆمەڵگایە، ئەو توێژە زیاتر دەدوێت و دەڵێت" لەراستیدا پەیوەندییەك نییە لەنێوان بەفەرمانبەر بوونی ئافرەت و كێشەی خێزانی، بەڵام ئەوە تێڕوانین و باوەڕی تاكەكانی كۆمەڵگایە دەربارەی كاركردنی ئافرەت، جا چ وەك فەرمانبەر بێت یان هەر كارێكی دیكە، ئەو بیركردنەوە و تێڕوانینەی كۆمەڵگا، بووەتە هۆی دروست بوونی كێشە، كە بەچاوی نامووسەوە سەیری ئافرەت دەكەن و بەیەكسانی نابینن، كە ئافرەتەكەی یان خوشكەكەی یان هەر ئافرەتێكی دیكە، نابێت لەنزیكەوە لەگەڵ پیاوان كار بكات و نابێت هیچ جۆرە پەیوەندییەك لە نێوان ئافرەتان و پیاوانی دەرەوەی خێزانەكانیان هەبێت، هەروەها وا سەیری ئافرەت دەكەن كاری ئافرەتان تەنها كاری مالەوەو منداڵ بەخێوكردنە، كە ئافرەتانیش وەك پیاوان پێویستیان بەئابووری سەربەخۆی خۆیان هەیەو بۆیان هەیە ئەو مافەی خۆیان بەكار بهێنن ".