رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

میدیا - عومەر ئاوارە

  ئافرەتانی فەرمانبەر ئاماژە بەوەدەكەن كە بە هۆی ئەوەی خاوەن موچەی تایبەتی خۆیانن كەمتر لەلایەن مێردەكانیانەوە تووشی كێشە و توندوتیژی دەبنەوە و دەتوانن لە ناو ماڵ و ژیانی خێزانی خۆیاندا وەكو مێردەكانیان لە زۆر لایەنەوە بڕیاردەربن و هاوكاری هاوسەرەكانیان بكەن بۆ بەڕێوەبردنی ماڵ، كە ئەمەش تا ڕادەیەكی بەرچاو بووەتە ڕێگر لە بەردەم دروستبوونی گرفتی خێزانی لە نێوان خۆیان و مێردەكانیاندا.

زەینەب خەلیل فەرمانبەرێكی حكومەتە، ئاماژە بەوە دەكات كە ئافرەتی فەرمانبەر بەهۆی ئەوەی كە خاوەن موچەی خۆیەتی دەتوانێت ببێتە خاوەن كەسایەتییەكی سەربەخۆ، ئەو پێی وایە كە داهاتی سەربەخۆ بۆ ئافرەتان دەبێتە گەورەترین پاڵپشت بۆ سەركەوتنیان، زەینەب زیاتر دەڵێت "ئافرەتی موچەخۆر و خاوەن داهاتی تایبەت دەتوانێت لە ڕووی دابینكردنی كەل و پەلی ماڵەوە هاوكاری خێزانەكەی بكات، هەروەها موچە و داهات بۆ ئافرەت كاریگەری لە سەر كەمكردنەوەی كێشە خێزانییەكان دەبێت و هۆكارێكە بۆ دروستكردنی پەیوەندییەكی كراوە لە نێوان خۆی و هاوسەرەكەی".
لیمۆ عەزیز ئافرەتێكی تەمەن 38 ساڵانە، ئەو ئاماژەی بەوەدا كە بەهۆی ئەوەی كە دانەمەزراوە نەبووەتە خاوەن موچە و داهاتی خۆی، ئەو لەو بارەیەوە وتی" بە بەردەوامی بۆ كڕینی پێداویستییەكانم چاوم لە دەستی مێردەكەمە كە زۆرجار داواكارییەكانم ڕەت دەكاتەوە كە ئەمەش زۆرجار لە گەڵ مێردەكەم تووشی كێشە و گرفتم دەكات، زۆرجار پارەی خەرجی ماڵیشم ناداتێ و هەڕەشەم لێدەكات، نەبوونی موچە بۆ ئافرەتان لە ئێستا كێشەكانی خێزان جار زیاد دەكات بەتایبەت ئەگەر پارەی مێردەكە كەم بێت و بەشی خەرجی نەكات، بەڵام ئەگەر ئافرەتەكەش مووچە خۆر بێت چ لەكەرتی حكومی یان كەرتی تایبەت ئەوا پاڵپشتێكی چاك دەبێت بۆ خێزانەكان ".
سازگار نوری باس لەوەداكات بەهۆی نەبوونی موچە یاخود داهات تەنها كێشەی یەك ئافرەت نییە، بەڵكو لە ئێستادا بە سەدان ئافرەت پێیەوە گرفتارن ئەویش بە هۆی دانەمەزراندنیان لەكەرتی تایبەت و حكومی، ئەو دەڵێت"من لە ئێستادا ئافرەتی ماڵەوەم وخوێندنیشم لە كاتی خۆی تەواو نەكردووە و خاوەن هیچ داهات وموچەیەك نیم، ئەگەر لە كاتێكدا خاوەنی موچەی خۆم بومایە ئەوا دەمتوانی وەكو هاوسەرەكەم حەزم لەچی بێت بۆ خۆم دابینی بكەم و تەنانەت یارمەتی هاوسەرەكەشم بدەم، ئافرەتی موچە خۆر زۆر جیاوازترە لەوەی كە موچەی نییە، ئافرەتی موچە خۆر توانیویانە تا ڕادەیەك پێشكەوتن لە ژیانی خۆیاندا بەدی بهێنن ".
مەعسومە شەریف ئافرەتێكی دیكەی تەمەن 44 ساڵانە، ئاماژەی بەوەدا كە ئەو ئافرەتەی خاوەن مووچە و داهاتی خۆیەتی دەتوانێت ژیانێكی بەختەوەر بۆ خۆی دروست بكات بە پێچەوانەی ئەو ئافرەتانەی كە بە هۆی نەبوونی موچە و داهاتێكی تایبەت بەخۆیان هەندێ جار تووشی كێشەوگرفت لەگەڵ هاوسەرەكانیان دەبن، مەعسومە زیاتر دەڵێت" هاوسەری وا هەیە ژنەكەی پشت گوێ دەخات و كەمتر بایەخی پێدەدات، ئەگەر لەو حاڵەتە ئەو ئافرەتە موچەی خۆی هەبێت یاخود خاوەن داهاتی خۆی بێت ئەوا دەربەستی ئەو پشت گوێ خستنە ناكات، ئەمەش هەڵەیە خۆ هەموو ئافرەتان مووچە خۆر نین، با پیاوەكە سەره‌تا كچەكە نەهێنێ كەموچەی نییە" .
جوان كاكەخان لەسەر ئەم پرسە هەستیارە، ئاماژەی بەوەدا كە ئافرەتی بێ موچە و داهات هەمیشە چاوی لە دەست مێردەكەیەتی كە پارەی پێبدات وپێداویستییەكانی بۆ دابین بكات، ئەمەش مافی خۆیەتی لەبەر ئەوەی ئەو مووچەی نییە، زیاتر وتی" ڕۆژانە چاوەڕاونی ئەوەم كە مێردەكەم پارەم بداتێ بۆ ئەوەی پێداویستی خۆم و منداڵەكانمی پێدابین بكەم، هەندێ مێرد هەیە پارەی كەمدەداتە ژنەكەی بۆ مەسروفاتی ناوماڵ كە زۆرجار ئەو بڕە پارەیە بەش ناكات ناچار دەبێت هەندێ شت نەكڕێت، بەتایبەت زۆر ئافرەت هەن حەزیان لە جلی جوان وسالۆن و شتی نوێی ناو ماڵە، كە چی لە بەركەمی ئەو پارەیەی كە لە مێردەكەی وەریدەگرێت ناتوانێت بە ئارەزووی خۆی حەزەكانی بەجێبگەیەنێت".
ژینۆ حەسەن توێژەی كۆمەڵایەتی جەخت لەوە دەكاتەوە كە لە ئێستادا زۆرینەی كێشەی نێوان ئافرەتان وهاوسەرەكانیان بە هۆی باری ئابووری ئەو خێزانەوەیە كە لە زۆركاتدا دەبێت ڕێگا خۆشكەر لە سەر دروست بوونی توندوتیژی لە نێوان ئەو ئافرەتانە وهاوسەرەكانیان، ئەو لەو بارەیەوە گوتی: "ئافرەتی بێ موچە ناتوانێت بە ئارەزوی خۆی هەرچی پێویست بێت دابینی بكات، ئەگەر كاتێكیش داوای ئەو شتانەی كە خۆی دەیەوێت لە مێردەكەی بكات ئەوا لە زۆرجار تووشی توندوتیژی دەبێت ولە زۆركاتیشدا ئەو توندوتیژییە دەبێتە هۆی تێكدانی شیرازەی ئەو خێزانەو جیابوونەوەی لە نێوان ئەو ژن ومێردە، بەڵام ئەگەر ئافرەت لە هەر قۆناغێكی ژیانیدا بێت ئەگەر موچە خۆربێت یاخود خاوەن داهاتی خۆی بێت ئەوا بێگومان لە ژیانێكی ئاسودەو بەختەوەردا دەژێت وپێویستی بە كەسی بەرامبەر نییە كە هاوكاری بكات وپارەی پێبدات".

كۆمێنتت له‌سه‌ر ئه‌م بابه‌ته‌