رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

      میدیا - رەزوان عەبدولقادر

  رۆژانە چەندین بڵاوكراوەی هەمەجۆر بە تیراژێكی زۆر دەردەچێت، بەڵام ئەگەر بێتو گەشتێك بەنێو شاردا بكەین، بەتایبەتی ئەو شوێنانەی رۆژنامە و گۆڤار و پەرتووك دەفرۆشن، دەبینین زۆری و بۆری پێوە دیارە و رۆشنبیران و رۆژنامەفرۆشانیش جەخت لەوە دەكەنەوە كە رێژەی خوێندنەوەی گۆڤار و رۆژنامەكان لە دابەزیندایە و كۆمەڵگە تووشی قەیرانی كەمیی خوێنەر بۆتەوە.

 

"بەگشتی ئێستا بازاڕی رۆژنامە و گۆڤارەكان زۆر كزە و ئەوەی زیاتر رەواجی لەسەر بێ، بە زۆری وەرزش و بابەتە كۆمەڵایەتییەكانە، گەنجانی ئەو سەردەمە بەدوای هەواڵی وەرزشی وەك رۆناڵدو و میسی كەوتوون و هیچ بیر لە خۆ رۆشنبیركردن ناكەن".

ئەوە قسەی بەهجەت خورشید بوو. ئەو خاوەنی شوێنی (میدیا)یە لە بازاڕی (شێخەڵا)ی شاری هەولێر و دەڵێت: "بەگشتی خوێنەر زۆر كەم بووە، بەڵام ئەو رۆژنامە و گۆڤارانەی بابەتی رەخنەییان هەیە و باسی گەندەڵی دەكەن و كەموكوڕییەكان دەدرخەن، كڕیاریان زۆرە". هۆكاریكی دیكەی بێ بازاڕیی رۆژنامەكانیشی بۆ "دەرچوونی رۆژنامەكانی بەخۆرایی گەڕاندەوە و گوتی: "هەموو كەسێك داوای رۆژنامەكانی بەخۆرایی دەكات، تەنانەت منداڵانیش، رۆژنامە حزبییەكان بو ئەوانەی رۆژانە دەدرچێت، هیچ بازاڕی نییە وسەرف نابێت، تەنیا بۆ زانینی ئاگادارییەكان چەند كەسێك دەیكڕن، كە هەر بۆیە بە مەجبووری دەدرێتە دەزگاكانی حكومەت".

 بەختیار ئەحمەد، خاوەنی نووسینگەی فرۆشتنی رۆژنامەو گۆڤارە و ئەویش دەڵێت: "جاران رۆژنامەكان زیاتر سەرف دەبوون و خەڵك زیاتر دەیكڕی، بەڵام ئێستا لەبەر بوونی ئینتەرنێت خوێنەر و كڕیارەكانمان رووی لە كزی كردووە، چونكە خوێنەر ئەوەی لە رۆژنامە و گۆڤاردا هەیە، بەهۆی ئینتەرنێت بە ئاسانی دەستی دەكەوێ، بۆیە نایكڕێت، لە هەمان كاتیشدا چینێك هەر ماوەن و دەیكڕن و هاوبەشی مانگانەن و زیاتریش گۆڤار و رۆژنامانەی هەمەڕەنگ و كۆمەڵایەتی و وەرزشی دەكڕن".

هەروەها هەردی حوسێن كە ئەویش رۆژنامەفرۆشە، هێما بۆ ئەوە دەكات كە "زۆری و بۆریی رۆژنامەكان و تێكەڵبوونی چاك وخراپ سەری لە خوێنەر شێواندووە"، گوتیشی: "زۆربەیان گرنگی بە بواری سێكسی و سیاسی دەدەن و رۆژانەش هەمان شت دووبارە دەبێتەوە، بۆیە خەڵكەكە بە هەموو توێژەكانەوە گرنگی رۆژنامەیان لا كەم بۆتەوە".

 بەڵام رۆژنامەنووس هێمن كەریم بۆچوونێكی تری هەیە و دەڵێت: مرۆڤی ئەو سەردەمە زۆر سەرقاڵە بە كاری رۆژانە و هیلاكە، كە شەوانەش لە ماڵەوەیە ئەو هەواڵ و بابەتەی بیەوێ لە TVیەكان، یاخود ئینتەرنێت دەستی دەكەوێ و هەندێ رۆژنامەش هەیە بەداخەوە كارو پیشەیان پێداهەڵگوتنی حزبە و تەنیا چالاكییەكانی حزبەكەیان بەرجەستە دەكەن، بۆیە خەڵك هیچ بایەخێكیان پێنادات و ئەندامانی حزبیش بەناچاری دەیخوێننەوە"

ئاریان عەزیز كچێكی تەمەن 21 ساڵانەو خوێندڤانی زانكۆیە، ئەو نایشارێتەوە كە زۆر بە كەمی رۆژنامەو گۆڤارەكان دەخوێنێتەوە، بەڵام وەك باسیكرد حەزدەكات بەردەوام هەواڵی تازەی كلیپ و هونەرمەندان بزانێت، ئەویش ئێستا بەهۆی بوونی ئینتەرنێت و فەیسبوك زۆر بەئاسانی هەواڵەكانی دەست دەكەوێت.

هەلمەت كەرم ماموستایەكی قۆناغی بنەڕەتییە. ئەو خەرێكی كڕینی رۆژنامە بوو، لەگەڵ ئەوەشدا گوتی: "راستییەكەی من رۆژنامە كەم دەخوێنمەوە، لەبەر ئەوەی دوو دەوامم هەیە و كاتم نییە، ئەمڕۆش كە هاتمە بازاڕ و رۆژنامەیەك دەكڕم، لەبەرئەوەیە ئاگادارییەكی دادگام تێدا بڵاوكردۆتەوە بە مەبەستی گۆڕینی ناوی كچەكەم". گوتیشی: "ئێستا خەڵك تاقەتی خوێندنەوەی گۆڤارو رۆژنامەی نییە لەو رۆژگارە ناخۆشە و بێ مووچەییە، گەورە و بچووك خووی خۆی داوەتە ئینتەرنێت و فیسبوك، ئەگەر بگەڕێن، دەبینن لە دە ماڵان، یەك ماڵیش كتێبخانەی نییە".

ئاڤان مستەفا كچێكی ماڵەوەیە و باسی ئەوە دەكات كە بە هۆی ئەوەی نازانێت ئینتەرنێت و كۆمپیۆتەر بەكار بێنێ، بەردەوام گۆڤار و رۆژنامەكان دەكڕێت. گوتیشی: "ئەوانەی بابەتی كۆمەڵایەتی و كاریكاتێری رەخنەیی تێدایە، دەكڕم و لە ماڵەوەش كتێبخانەیەكی گەورەم هەیە و چەندین جۆری كتیب و رۆژنامە و گۆڤاری تێدایە و زۆر لە خزمانیش هاتوون سوودیان لێ بینیوە، بۆ نووسینی راپۆرت و سمینار بۆ كۆلیژ و پەیمانگەكان". سەبارەت بەو كەسانەش كە دەڵێن: ئینتەرنێت كاری كردۆتە سەر كەمبوونی ژمارەی خوێنەری رۆژنامە و گۆڤارەكان، گوتی: "من ئەوە بەڕاست نازانم، لەبەر ئەوەی خوێندنەوەی رۆژنامە تام و چێژێكی جیاواز و خۆشی هەیە، هەر بۆیەش بە پێویستی دەزانم هەموو ماڵێك دەبێت بە لایەنی كەم كتێبخانەیەكی بچووكی هەبێت، ئەگەر نەشیخوێندەوەش هەر سوودی زۆرە، چونكە دەبێتە هاندەرێك بۆ منداڵەكان كەوا لە دواڕۆژدا خولیای كتێب و رۆژنامە بن"

لەلای خۆیەوە توێژەری كۆمەڵایەتی ڤینوار كاویس، سەبارەت بە هەمان پرس گوتی: "خوێندنەوە مێشكی مرۆڤ فراوان دەكات و شتەكان بە جیاوازتر دەبینێت، بەڵام لە رۆژگاری ئەمڕۆدا فوزایەك هەیە لە نێو رۆژنامەگەری كوردی، بەوەی سەدان رۆژنامە و گۆڤار دەردەچێت و ئامانجێكی هاوبەشیان نییە لە رۆشبیری و پەروەردەكردنی تاكی كورد، هەر بۆیە خەڵك ئەو سەلیقە و تاقتەی نەماوە بە دوای رۆژنامەو گۆڤارەكاندا بگەڕێت، هۆكارێكی تریش فەراهەمبوونی تەكنەلۆژیای سەردەمە كە وایكردووە هەموو شتەكان بەئاسانی لە ماڵەوە ببینی و دەست بكەوێت، تەنانەت لە ناو مۆبایلیش هەموو هەواڵێك دەزانی، هەروەها زۆربوونی ئەركی رۆژانەی ژیان و كاركردنی زۆر و بوونی دەیان tv لۆكاڵی و ئاسمانی ئەمانە هەمووی لەبەردەم خوێندنەوەدا ئاستەنگیان دروست كردووە".

كۆمێنتت له‌سه‌ر ئه‌م بابه‌ته‌