رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

میدیا - رەزوان عەبدولقادر

  دوابەدوای بەرزكردنەوەی نرخی بەنزین لەلایەن حكومەتەوە، بەشێك لە هاوڵاتیان روویان لە كڕینی پایسكل كردووە، بۆ ئەوەی هەندێك لە كارەكانی رۆژانەیانی پێ ئەنجام بدەن. چەندین دووكانداری كڕین وفرۆشنتنی پایسكلیش جەخت لەوە دەكەنەوە كە گرانبوونی بەنزین و قەیرانی مووچە بازاڕی پایسكلی گەرم كردووە.

"من ماوەی زیاتر لە 40 ساڵە ئەو شوێنەم هەیە، ئێستا بازاڕەكە تا رادەیەك باشە، لەگەڵ كردنەوەی قوتابخانە خەڵكانێك دێن پایسكل بۆ منداڵاكانیان دەكڕن، بەتایبەت ئەوانەی لە ناوەندی و ئامادەیین، چونكە دەزانین بەنزین گران بووە و مانگانەش كرێی هاتوچۆی قوتابی دەبێتە بارگرانی لە سەر خێزان، هەربۆیە پایسكل دەكڕن".
ئەوە قسەی حاجی سەعدی حەسەن بوو. ئەو خاوەنی پیشانگەیەكی فرۆشتنی پایسكلەو دەڵێت: "ئێستا بازاڕی پایسكل گەرمەو باشترین جۆریشی لەنگەیە. لەبەر ئەوەی ئەوانە لە ئەوروپا دروستكراون، نەرمە و كێشی سووكە، بەڵام نوێیەكان هەموو چینین و دوای ماوەیەكی كەم تێكدەچن، كەچی خەڵك ئەو رۆشنبیریەی نییە بەس دەڵێ نوێم دەوێ".
عەلی وەهاب، مامۆستایەو لە دووكانێك خەریكی كڕینی پایسكل بوو، گوتی: " بێ مووچەیی وایكردووە نەتوانم بە ئۆتۆمبیل هاتووچۆ بكەم، بۆیە هاتووم پایسكلێك بۆ دەوام بكڕم و ئەوەش هیچ عەیبی تێدا نییە، لەلایەن تەندروستیشەوە بەسوودە، بەس خەڵكی ئێمە تا ئێستا رۆشنبیری ئەوەی نییە و سوود و گرنگی پایسكل نازانێت". گوتیشی: "ئەو پایسكلەی دەیبینی، ماركەی لەنگەیە و بە 80 هەزار دینارم كڕیوە، دەبێ وەكو سەرۆك وەزیرانی هۆڵندا لە شەقام بە قات و ربات پایسكل لێخوڕم و ئەو تەوقە بشكینم و شەرمە و عەیبە نەمێنێت".
سۆران سەمەد، خاوەن شوێنیكی فرۆشتنی پایسكلە و سەرەتا هێما بۆ ئەوە دەكات كە بازاڕی پایسكل بە هاوینان زۆر گەرم دەبێت و زیاتر خوێندەڤانان دەیكڕن. گوتیشی: "دوای گرانكردنی بەنزین نەك قوتابی، بگرە مامۆستاش دێن بۆ كڕینی پایسكل". پەنجەی بۆ پایسكلەكانیش راكێشا و گوتی: "لە تازەكان چەندین ماركەمان هەیە، لەوانە: گلانت و سامسۆنگ. ئەوانەی لەنگەش ماركەی زۆر باشن، بەڵام پایسكلی شەحن باش نییە و پاترییەكەی زوو دەمرێت، عەقڵەكەشی كەمێك ئاوی بەر كەوێت، دەسووتێت، بەشێوەیەكی سادە درووستكراووە و بازرگانییەو زەرەری زیاترە لە قازانج، بۆیە نەجاحەتی نەهێنا، هەروەها لە مەیدانی پایسكلان جۆری تایبەت بە كەمئەندام نییە و شوێنی تایبەت هەیە كە بەپێ مواسفاتی كەسەكە دروستی دەكەن".
ئاراس كامیل خوێندەڤانی قۆناغی ئامادەییە ولەگەڵ باوكی پایسكلێكی كڕیبوو، ئەو دەڵێت: "پار تەكسییەك هاتوچۆی پێدەكردم بۆ قوتابخانە بە 80 هەزار دینار، بەڵام ئەمساڵ لەگەڵ كردنەوەی قوتابخانە و گرانی بەنزین و بێ مووچەیی باوكم، ناچار بڕیارمدا پایسكلێك بكڕم، تا هاتوچۆی پێبكەم، ئێستاش ئەو پایسكلەم بە 65 هەزار دینار كڕیوە كە دەكاتە كرێی یەك مانگی تەكسی و هەموو ساڵەكەش هاتوچۆی پێدەكەم و بارەكەش لەسەر باوكم سووكتر دەبێت، ئەوەی دڵخۆشترم دەكات، ئەوەیە كە زۆرێك لە هاوڕێیەكانم لە قوتابخانە پایسكلیان هەیە".
كرێكار ئەمین شوێنی كڕین وفرۆشتنی پایسكلی هەیە و باسی ئەوە دەكات كە هەر لەم دوو هەفتەیە "10 پایسكل"ی فرۆشتووە و هاوكات دەڵێت: "كڕیارەكان زیاتر فەرمانبەر و مامۆستا و قوتابین و گرانبوونی بەنزین وایكردووە روو لە كڕینی پایسكل بكەن". جەختی لەوەش كردەوە كە "گرانی نرخی پایسكل بە هۆی ئەو "گومرگە زۆرەی حكومەتە كە لەسەری داناوە". گوتیشی: "لێرەوە داوا لە هاوڵاتیان دەكەم واز لە ئۆتۆمبیل بێنن، بەڕاستی هەمووی نەخۆشی و گازی كوشندەیە، هەروەها مرۆڤ تەمبەڵ دەكات و تەندروستی و لەشساغی لە پایسكل لێخوڕیندایە و وەرزشێكی ئاسانە و گشت چینێك دەتوانێ ئەنجام بدات".
ئاكام بەختیار گەنجێكی تەمەن 23 ساڵانەو جانتایەكی لەدەست بوو. وەك خۆی باسیكرد ماوەی سێ ساڵە ئەو پایسكلەی بە 100 هەزاردینار كڕیوە و كاری دابەشكردنی كارتی مۆبایل بۆ دووكانەكانی پێ دەكات. گوتیشی: "زۆر دڵخۆشم و باری تەندروسیم باشە و ئێوارانیش كاتێك دەچمەوە خەوێكی زۆر خۆشم لێ دەكەوێت و لەشیشم زۆر چالاك و سووك دەبێت، بۆیە بە گرنگی دەزانم لانیكەم هەموو ماڵێك پایسكلێكیان هەبێت، هەر لەمنەوە باوكیشم فێری پایسكل لێخوڕین بووە ودانەیەكی بۆ خۆی كڕی و سەردانی خزمانی پێ دەكات".
فارس عەزیز دووكانی قوماش فرۆشتنی هەیە و ئەویش یەكێكە لەو هەزاران كەسەی كە باسی پایسكل و سوودەكانی دەكەن، سەبارەت بە خۆیشی گوتی: "من تۆزێك قەڵەوم و نەخۆشی پشتئێشەم هەیەو كاری لەسەر قاچەكانم كردووە، بۆیە دكتۆر چارەسەری سروشتی بۆ داناوم و پایسكلێكی وەرزشیی جێگیرم كڕیوە و رۆژانە لە ماڵەوە بۆ ماوەی كاتژمێرێك وەرزشی پێدەكەم، هەستم كردووە تا رادەیەك سوودی بۆم هەبووە، ئەگەر كێشی لەشم دابەزێ یەكێكی ئاساییش دەكڕم و هاتوچۆی دووكانەكەمی پێدەكەم، بەڕاستی ئۆتۆمبیل ئێمەی كوشت و لەشمان مردو بێتاقەت بووین، كۆبوونەوەی چەوری و جەڵتە بەڕای خۆم دەگەڕێتەوە بۆ ئەوەی دوورین لە وەرزش، ئێستا من بەهاو سوودی وەرزش و پایسكل دەزانم و داواش لە حكومەت و پەرلەمان دەكەم هاتنەدەوام بە پایسكل بكاتە مەرجێك بۆ هاتوچۆكردنی فەرمانبەران دەزگا و وەزارەتەكان، یەكەمین جاریش لە وەزیر و بەرپرسەكانەوە دەستپێبكات"

كۆمێنتت له‌سه‌ر ئه‌م بابه‌ته‌