رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

میدیا - رەزوان عەبدولقادر

  مۆبایل ئامێرێكی سەردەمەو زۆربەی خەڵك بەكاری دێنێت، بەڵام ئێستا دیاردەی گۆڕینی هاندی مۆبایل بۆتە بەشێكی گرنگی ژیانی گەنجان و بایەخێكی زۆری پێدەدەن. توێژەرێكیش هۆكارەكەی زیاتر بۆ چاولێكەری و بەكارهێنانی ئینتەرنێت لە رێگەی مۆبایلەوە دەگێڕێتەوە.

سەنگەر بایز شوفێری نەخۆشخانەیە و وەك خۆی باسیكرد، هاندێكی مۆبایلی ئاسایی و هەرزانی هەیە و رۆژانە كارمەندەكانی هاوكاری پێی دەڵێن: بۆ مۆبایلەت ناگۆڕی؟ هەر لەو بارەیەیەوە دەڵێت: "هەندێ جار لە دڵی خۆم زۆر خەمم دەخوارد، ئەوان نەیاندەزانی دەستكورت و كرێچم، ئەگینا منیش دەزانم ئەو ئامێرە تازانە جوانن و هەن، بەس چیبكەم لەگەڵ نەبوونی؟ هەربۆیە راهاتووم لەگەڵ قسەكانیان، خەڵك زۆری لە غرووری دەژی و پارەی زۆرە، نازانن هەژارەكە چۆن دەژی".
رێكان عەبدوڵڵا خاوەن شوێنی مۆبایلی برووسك، هێما بۆ ئەوە دەكات كە ئەو كەسانەی بەردەوام حەز دەكەن هاندی خۆیان بگۆڕن، زۆربەیان گەنجانن و زۆرترین داواكاری لەسەر جۆری ئایفۆن و كالاكسی هەیە، لەبەر ئەوەی زۆرترین بەرنامە و مواسفاتی تێدایە، گوتیشی: " گەنج هەبووە مۆبایلی كڕیوە لام، دوای دوو رۆژ هاتووە داوای كردووە بیگۆڕێتەوە، لەبەر ئەوەی وەك هی برادەرەكەی بێت و بە 100 دۆلار زەرەر لێم كڕیوەتەوە، هەندێ كەس هەن، هیچ لە پڕۆگرام وبەرنامە نازانن، كەچی داوای باشترین هاند دەكەن و گرنگ ئەوەیە خەڵك لە دەستی بیبینن". ئەو مۆبایلفرۆشە ئەو جۆرە كارەی بە "نەخۆشی" ناوبرد و گوتی: "گەنج هەیە پارەی زۆرە و نازانێ چی لێ بكات، هەربۆیە بە شتی لاوەكی سەرفی دەكات و ئەوەش جۆرێكە لە نەخۆشی". جەختی لەوەش كردەوە كە بازاڕی فرۆشی مۆبایل لە ئێستادا "زۆر كزە و ئەوەی دێت زیاتر بۆ گۆڕینەوە مامەڵە دەكات".
شەیما سورچی مامۆستای ئاماددەییە و نایشارێتەوە كە بە هۆی چاولێكەری ناچار بووە هاندی مۆبایلەكەی بگۆڕێت، ئەوەتا دەڵێت: "لە دەوامی ئاسایی خۆم مامۆستاكان زۆربەیان ئایفۆنیان هەبوو، منیش هەستم بە شەرم دەكرد مۆبایلەكەی من بێ مواسفاتە، بۆیە لەبەر قسەی ئەوان گۆڕیم و ئایفۆنم كڕی، هەر چەندە هاوسەرەكەم رازی نەبوو، گوتی: ئەمە ئیسرافە، بەڕاستی ئەوەی مللیەتی كورد فەوتاندووە چاولێكەریە و هیچ تر نییە".
سەركار سەباح مامۆستای زانكۆیە ئەو بۆچوونێكی جیاوازتری هەیە و دەڵێت: "ژیان بە سادەییەوە خۆشە و زۆركەس دەبینی و دەڵێ خۆزگەم بە ساڵانی هەشتاكان كە هیچ جۆرە تەكنەلۆژیایەك نەبوو، جیهازەكەی من نرخەكەی 30 دۆلارەو زۆریش پێی مورتاحم و ماوەی پێنج ساڵە لامە و بەكاری دێنم، هیچ كێشەی نەبووە، ئەو كەسانەی بەردەوام هاند دەگۆڕن، هەندێكیان هەست بە كەمی دەكەن و دەیانەوێ لەو رێگەیە پڕی بكەنەوە و پۆز بە مۆبایل لێ بدەن، تەنانەت لە كۆلیژ زیاتر تووشی چاولێكەری دەبن، بەداخەوە دیاردەی چاولێكەری كۆمەڵگەی وێران كردووە، نەك مۆبایل، هەموو شێتكی گرتۆتەوە و بۆتە نەخۆشییەكی كوشندە".
تارا تەمەنی 22 ساڵەو خوێندەڤانی زانكۆیە، بەڵام ئەو رایوایە گەنجی ئەو سەردەمە دەبێت لەگەڵ تەكنەلۆژیا بڕۆن، سەبارەت بە خۆیشی گوتی: "كە پۆلی شەشەمی ئاماددەییم تەواوكرد، یەك مەرجم بۆ دایك وباوكم هەبوو، ئەویش گۆڕینی هاندی مۆبایلەكەم بوو، یەكێكی تازەیان بۆ كڕیم بە هەزار دۆلار، ئەوە زیاتر دڵخۆشی كردم، لە كۆلیژ مۆبایلەكەم لە هی هەمووان جیاوازتر بوو، هاوڕێكانم دوای من زۆربەیان هاندەكانیان گۆڕی، بۆچوونی من وایە پێویستە ساڵانە گۆڕانكاری لە هەموو ژیانتدا بكەیت".
گۆڤەند مستەفا توێژەری كۆمەڵایەتی و مامۆستایە و جەخت لەوە دەكاتەوە كە لە رووی دەروونییەوە ئەو كەسانەی بەردەوام هاندی مۆبایلەكانیان دەگۆڕن، لێیان بۆتە خوویەك و بۆشایی كاتی خۆیانی پێ پڕ دەكەنەوە، هەندێكیش وەك چاولێكەری و بۆ پۆزلێدانە. گوتیشی: نەبوونی هۆشیاری و رۆشنیری بەرامبەر تەكنەلۆژیای سەردەم گرفتێكەو كۆمەڵگه‌ی ئێمە بەدەستیەوە دەناڵێنێت، تاكی كورد ئەوەندی خەریكی مۆدیلات و شت گۆڕینە، نیو ئەوەندە بە دوای خۆڕۆشنبیركردن وسەرچاوەی زانستییەوە نییە، بۆیە زۆربەی شتەكان بە هەرەمەكی بەكار دێنێت".

كۆمێنتت له‌سه‌ر ئه‌م بابه‌ته‌