رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

میدیا: لانە ئامانج

  سەرەڕای دروستكردنی دەیان ماركێت و مۆڵی گەورە و رازاوە لە شارە گەورەكانی باشووری كوردستان كە رۆژانە هەزاران هاوڵاتی و خەڵكی بیانی سەردانی دەكەن، بەڵام هاوڵاتیانی هەژار و كەمداهات له‌ هه‌ولێر زیاتر بە بازاڕی قەیسەری دڵخۆشن و جەخت لەوەش دەكەنەوە كە نرخەكان لەو بازاڕه‌ زۆر هەرزانترە.

"من هەفتانە سەردانی مۆڵەكان دەكەم و شت و مەك دەكڕم، بەڵام بازاڕی قەیسەری هەندێ‌ شتی هەیە زۆر هەرزانترە، بەتایبەتی جلوبەرگ، بۆ نموونە جلوبەرگ لە مۆڵەكان بە بیانووی ماركەبوونی نرخێكی خەیاڵی لەسەر دانراوە، كەچی هەمان شت لە بازاڕی قەیسەری بە چوار قات هەرزانتر دەكڕی".
ئەوە قسەی میدیا نەجیب بوو. ئەو خوێندەڤانی زانكۆیە و جەخت لەوە دەكاتەوە كە مۆڵەكان سیمای شارەكانی جوانتر كردووە و بەشی خواردەمەنییەكانی "نرخەكانی باشن، بەڵام جلوبەرگی زۆر گرانە". گوتیشی: "خەڵكی كەمداهات زیاتر روو لە بازاڕی قەیسەری دەكەن، بەتایبەتی لە جەژن و بۆنەكان كە جلوبەرگ دەكڕن".
سۆزان هیمداد مامۆستا قۆناغی بنەڕەتییە و ئەویش هێما بۆ ئەوە دەكات كە نرخەكان لە مۆڵەكان گرانترە و هاوكات دەڵێت: "من خۆم و منداڵەكانم هەر سەردانی قەیسەری دەكەین، هەموو شتێك لە بچووكترین شت تا گەورەترین شت هەر لە قەیسەری دەیكڕین، شتی زۆر جوانی تییایە و هەرزانیشە، راستە مۆڵەكانیش شتی جوانیان تیایە، بەڵام نرخی زۆر گرانە و ناگاتە ئەو شتانەی كە لە قەیسەری هەن و نرخیشیان زۆر گونجاوە".
بەڵام ئاڵا وریا كە خوێندەڤانی قۆناغی ئامادەییه‌ رای پێچەوانەی هەیە و سەبارەت بە خۆیشی گوتی: "من تەنها سەردانی مۆڵەكان دەكەم و زۆر بە كەمی سەردانی بازاڕی قەیسەری دەكەم، لەبەر ئەوەی زۆر تەنگەبەرە و زۆریش جەنجاڵە، كە دەچم پەشیمان دەبمەوە، زۆر لەوە تووڕە دەبم كە دەبینم لەو شوێنانەی كە تەنانەت شتێكی پیاوانی تیا نییە، كەچی پڕی پیاوە، بەڕاستی زۆر ناشیرینە كە شوێنێك تایبەت بە ئافرەتە و زیاتر شتی ئافرەتی تیایە، كەچی بە رێژەیەكی بەرچاو پیاوڕ تیا دەبینی، ئافرەت هەیە شەرم دەكات داوای جلێكی ژێرەوە بكات، ئەوەندە پیاو دەوەرەیان داوە، بۆیە هیوادارم پیاوان ئەو هەڵسوكەوتە ناحەزە تەرك بكەن" .
یوسف محەممەد خوێندەڤانی زانكۆیە و رایوایە: "بوونی ماركێت و مۆڵ هیچ كاریگەرییەكی لەسەر بازاڕە میللییەكان نییە، خەڵك زیاتر سەردانی بازاڕی قەیسەری دەكات، هۆكارەكەشی راهاتنە لە كڕینی كەلوپەل لەو بازاڕە و لە لایەكی دیكەشەوە بە بەراورد بە مۆڵەكان نرخی كەلوپەلەكانی بە هەرزانتر دەزانن، گوتیشی: "بازاڕی قەیسەری سیمای شارستانی كۆنی شاری هەولێری پێوە دیارە كەوا لە كۆن چۆن بازاڕ كراوە، لەوانەیە زۆربەی گەشتیارانیش حەز بكەن ئەو بازاڕە ببینن" .
ساكار محەممەد ژنی ماڵەوەیە، ئەویش یەكێكە لەو هەزاران كەسەی كە سەردانی بازاڕی قەیسەری دەكەن، ئەو دەڵێت: "پێش هەر شوێنێك یەكەم جار من سەردانی بازاڕی قەیسەری دەكەم، ئینجا دواتر بۆ مۆڵ و بازاڕەكانی تر دەچم، چونكە تاقیم كردووەتەوە نرخی مۆڵەكان زۆر گرانترە، بۆیە پێویستە كۆنترۆڵی نرخ بكرێت" .
سیروان عەلی لە بازاڕی قەیسەری دووكان هەیە و سەرەتا باسی ئەوە دەكات كە زیاتر ئافرەتان سەردانی ئەو بازاڕە دەكەن، گوتیشی: "بازاڕی قەیسەری بازاڕێكی كۆنە و لەمێژە هەیە، زۆربەی شتە پێویستەكانی خێزانی تیایە و هەموو حەجماتی تیایە، زۆر كەس هاتووە كێشی زۆر بووە، جل بۆی نەبووە، لە قەیسەری دەستی كەوتووە، یاخود پێڵاو هەموو قیاسێك و هەموو جۆرێكی تیایە، واتە بەگشتی دەتوانین بڵێن شتی زۆر جوان و نرخی گونجاوی هەیە".
سیروان ئەوەی رەتكردەوە كە تەنیا چینی كەمداهات سەردانی ئەو بازاڕە بكات و هەر لەو بارەیەوە گوتی: "ئەو خەڵكانەی دێنە بازاڕی قەیسەری لە هەموو ئاستێكن، هەیە فەقیرە، هەیە دەوڵەمەندە، ئیتر هەر كەسەو بە جۆری خۆی، بۆیە ناتوانین بڵین تەنیا هەژارەكە دێن، بگرە زۆر جار دەوڵەمەندەكان زیاتر سەردانی ئەم بازاڕە دەكەن".

كۆمێنتت له‌سه‌ر ئه‌م بابه‌ته‌