رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

  مامۆستا تاریق ئەحمەد لەم هەڤپەیڤینەی لەگەڵ ڕۆژنامەی(میدیا) تیشك دەخاتە سەر ئەو كێشە و گرفتانەی كە لە ڕووی دامەزراندنی مامۆستا و نەبوونی سەرپەرشتیاری خوێندنی كوردی لە شار و دەورووبەریدا هەیە، ئەو باس لەوە دەكات كە بەهۆی شەڕی داعش وچۆڵبوونی گوندەكانی دەورووبەری خورماتوو لە ئێستادا خوێندەڤانێكی زۆر ڕوویان لە خورماتوو كردووە و قورساییەكی زۆریشی بۆ سەر خوێندگەكانی خورماتوو دروست كردووە.

میدیا: زۆرینەی خوێندنگەكانی شاری خورماتوو لە بەر كەمی مامۆستا زۆر وانەی تێدا ناوترێتەوە، ئێوە وەكو بەڕێوەبەرایەتی بەشی خوێندنی كوردی بۆ پڕكردنەوەی ئەو بۆشاییانە چیتان كردووە؟
مامۆستا تاریق: ئێمە سەردانی وەزارەتی پەروەردەی حكومەتی هەرێمی كوردستانمان كردووە، داواكارییەكانمان خستۆتە بەردەم جەنابی وەزیری پەروەردە و ئەویش بەڵێنی داوە كە بە دامەزراندنی مامۆستای گرێبەست ئەو بۆشاییانەمان بۆ پڕبكاتەوە.
میدیا: كێشەی كەمی خوێندنگە لە خورماتوو تاكو ئێستا چارەسەر نەكراوە، بۆچی هەوڵتان نەداوە چارەسەری بكەن؟
مامۆستا تاریق: لە ئێستادا خوێندنگەكانی خورماتوو قورساییەكی زۆریان لە سەرە بە هۆی دوو دەوام و سێ دەوام تێدا ئەویش بە هۆی هاتنی ژمارەیەكی زۆری خوێندەڤانانی گوندەكانی دەرەوەی شاری خورماتوو بۆ ناو شارەكە لە دوای چۆڵبوونی ئەو گوندانە لە ئەنجامی شەڕی داعش لە ناوچەكە كە ئەویش قەرەباڵغییەكی زۆری لە ناو خوێندنگەكان دروستكردووە.
میدیا: ئێوە ساڵانە بڕیاری ئاڵوگۆڕكردنی مامۆستایان لە نێوان خوێندنگەكانی شاری خورماتوو دەدەن، لە بەرامبەریشدا مامۆستایان گلییەیان بەرامبەر بەو بڕیارە هەیە، مەبەست لەو ئاڵوگۆڕكردنانە چییە؟
مامۆستا تاریق: ئێمە بە هۆی كەمی میلاكات لە ناو خوێندنگەكان ساڵانە ئەو بەرنامەیە جێبەجێدەكەین، بۆ نمونە ئەگەر خوێندنگەیەك دوو مامۆستای زمانی ئینگلیزی هەبێت و لە خوێندنگەیەكی دیكەشدا مامۆستای زمانی ئینگلیزی نەبێت ئەوا دەبێت یەكیان بگوێزرێتەوە بۆ ئەو خوێندنگەیە، بە تایبەت ئەو مامۆستایەی كە دواین دەست بەكاربوونی هەیە .
میدیا: یەكێك لە باخچەكانی شاری خورماتوو دەوامیان لە ناو كەرەڤانەدایە و بینایان بۆ دروستنەكراوە، ئێوە وەكو بەڕێوەبەرایەتی بەشی خوێندنی كوردی بە هەماهەنگی لە گەڵ بەڕێوەبەرایەتی پەروەردەی خورماتوو تا چەند هەوڵتانداوە ئەو كێشەیە چارەسەر بكەن؟
مامۆستا تاریق: ئێمە وەكو بەشی خوێندنی كوردی ئاگادار نەكراینەوە لە كاتی كردنەوەی ئەو باخچەیە، دەبوایە لە ڕێگەی بەشی خوێندنی كوردی سەر بە وەزارەتی پەروەردەی حكومەتی عێراق بوایە، بەڵام پەروەردەی خورماتوو بە بێ گەڕانەوە بۆ ئەو بەشە و لەسەر بەرپرسیارێتی خۆیان ئەو باخچەیەیان كردەوە.
میدیا: تۆ پێت وایە دانانی كەرەڤانە كێشەی خوێندەڤانان چارەسەر بكات؟
مامۆستا تاریق: كێشەی خوێندەڤانان بە كەرەڤانە چارەسەرناكرێت، ئەو وەكو بینایەك نییە كە دروست كرابێت، ئەمە شتێكی كاتییە، لەوانەیە تا ماوەیەكی كەم بەكاربێت، یاخود لە جێگایەكی چاڵدا دابنرێت و ئاو بچێتەوە ناویەوە و مەترسی لە سەر خوێندەڤانان دروست بكات.
میدیا: لە ئێستادا كێشەی كەمی سەرپەرشتیاری خوێندنی كوردی هەیە لە خورماتوو، بۆ ئەم كێشەیە تاچەند هەوڵتانداوە چارەسەری بكەن؟
مامۆستا تاریق: داوامان كردووە كە ئەم كێشەیەمان بۆ چارەسەر بكرێت، بەڵام بە هۆی ئەوەی كە مامۆستایانی ئێمە خزمەتیان كەمە، بۆیە لە ئێستادا چارەسەر نەكراوە.
میدیا: خوێندنگە كوردییەكانی خورماتوو، گلەیی ئەوە دەكەن كە ئێوە سەردانیان ناكەن و گوییان لێناگرن، لەو بارەیەوە چی دەڵێن؟
مامۆستا تاریق: لە ئێستادا سەرەتای ساڵی خوێندنە و ئێمەش وەكو بەشی خوێندنی كوردی لە خورماتوو ڕووبەڕووی كۆمەڵێك كێشەوگرفت بوینەتەوە، لەوانە ڕێكخستنی میلاكات و هێنانی مەنهەج بۆ خوێندنگەكان و ئێستاش سەرقاڵی چارەسەركردنی كۆمەڵێك كێشەو گرفتی دیكەین، بۆیە دەرفەتی ئەوەمان نییە سەردانی هەموو خوێندنگەكان بكەین، لەگەڵ ئەوەشدا سەردانی ژمارەیەك خوێندنگەمان كردووە، بەڵام بە سەردانی خوێندنگە كێشە چارەسەر ناكرێت، ئێمە لەگەڵ بەڕێوەبەری سەرجەم خوێندنگەكانی خورماتوو هەموو سەرمانگێك كۆبونەوەیان لەگەڵدا دەكەین و لە كێشەو گرفتەكانیان دەكۆڵینەوە، دەبێت سەردانی خوێندنگەكان زیاتر لەلایەن سەرپەرشتییارانەوە بكرێت، نەك لە لایەن ئێمەوە وەكو بەڕێوەبەری بەشی خوێندنی كوردی.
میدیا: ژمارەیەك مامۆستا لە وانە وتنەوەدا لاوازن و بەتەواوەتی خوێندەڤانان تێناگەیەنن، ئێوە چی ڕێگایەكیان بەرامبەر دەگرنەبەر؟
مامۆستا تاریق: ئەو مامۆستایانەی كە ئاماژەتان پێدا لە ئێستادا بە تەماین خولی بەهێزبوونیان بۆ بكەینەوە كە زۆرینەیان دەرچووی خوێندنی عەرەبین وخوێندنی كوردیان تەواو نەكردووە، ناتوانین بڵێن 100% لە وانەوتنەوەدا باشن، تەنها بۆ پڕكردنەوەی میلاكاتی خوێندنگەكان ئەو مامۆستایانەمان دامەزراندووە و ناچارین پەنایان پێی بەرین جونكە مامۆستای هەولێر وسلێمانی نایەت لە ناو خوێندنگەكانی خورماتوو وانە بڵێتەوە.

میدیا - عومەرئاوارە

 

كۆمێنتت له‌سه‌ر ئه‌م بابه‌ته‌