رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

  غەفوور مەخمووری سكرتێری گشتیی (ی.ن.د.ك): بەستنی كۆنگرەی نەتەوەیی كورد بۆ رێكخستنەوەی ناوماڵی كوردان زۆر گرنگە و پێویستە بەزووترین كات ببەسترێت

هەڤپەیڤین - میدیا

  غەفوور مەخمووری سكرتێری گشتیی یەكێتی نەتەوەیی دیموكراتی كوردستان YNDK لە هەڤپەیڤینێكی لەگەڵ میدیا دا، تیشك دەخاتە سەر رەوشی سیاسی ئێستای كوردستان و ناوچەكە و جیهان، مەخمووری یەكریزی و كۆدەنگی كوردان لەم قۆناغە بەفاكتەری سەركەوتن و هۆكارێك بۆ سەربەخۆیی كوردستان دادەنێت.

میدیا: مانگی 3 بۆ كورد كۆمەڵێك بۆنەی خۆش لە سەركەوتن و بۆنەی ناخۆش لەكارەساتی تێدایە، تەنانەت یادی دامەزراندنی YNDKیشی تێدایە، خوێندنەوەت بۆی چییە ؟
غەفوور مەخمووری: مانگی ئادار مانگی قەدەری كوردانە بە خۆشی و ناخۆشییەوە، مانگی ئادار سەرەتای بەهار لە بەهاردا سروشت نوێ دەبێتەوە، واتە لای كورد بەهار وەرزی نوێبوونەوەیە، بۆیە سەیر دەكەین بەشێك لە بۆنە و خۆشییەكانی كورد كەوتۆتە ئەم مانگە، دوژمنانی كورد ئەوە باش دەزانن كەوا كورد هەوڵدەدات لە بەهاردا خۆی نوێبكاتەوە، وەكو دەبینین لەم مانگەدا گەلی كوردستان راپەڕی و سەرهەڵدانی بەهاری 1991 ی تۆماركرد، بۆیە دوژمنان بەردەوام هەوڵیانداوە ئەم مانگەی كوردان لە شاییەوە بكەن بە شین، هەربۆیەشە لەم مانگەدا كۆمەڵێ كارەساتییان بەسەر كوردا هێناوە، لوتكەی ئەم كارەسات و تاوانەش كیمیابارانكردنی هەڵەبجە بوو.
یەكێتی نەتەوەیی دیموكراتی كوردستان YNDK وەكو رێكخراوێكی نەتەوەیی كە هەڵگری پەیامی نەتەوەییە لەم مانگەدا لەدایكبووە، ئەمەش گوزارشت لەوە دەكات كەوا YNDK لەگە ڵ خۆشی و ناخۆشییەكانی نەتەوەكەمان ئاوێتە بووە و، بۆ ئەوە لەدایكبووە بە بیرو هزری نەتەوەیی خۆشییەكانی نەتەوە پێشبخات و پەند لە ناخۆشییەكان وەربگرێت بۆئەوەی لە داهاتوودا بەگژ پیلانی ناحەزان و دوژمنان دابچێتەوە و بەرەو ئایندەیەكی گەش هەنگاو بنێت.
میدیا: سیاسەتی بڕینی بودجە و موچەی فەرمانبەران و نانبڕاوكردنیان لەلایەن حكومەتی عێراقی لەسەردەمی مالیكی و ئێستاش لەلایەن عەبادی درێژەی هەیە، چی دەگەیەنێ لای ئێوە، حكومەتی عێراقی بۆچی ئەم سیاسەتە دژی كوردستان پەیڕەو دەكات؟
غەفوور مەخمووری: ئێمە با فێڵ لەخۆمان نەكەین هیچ دەسەڵاتێكی عێراقی نە لە ئێستا و نە لە داهاتووش ئامادە نییە مافەكانی كورد بدات، حكومەتەكانی عێراق لە رابردوودا چۆن بوونە لە ئێستا و داهاتووش هەر وادەبن، حكومەتی عەبادی درێژەپێدەری حكومەتی مالیكییە، لای من هەردووكیان دوو رووی یەك دراون، بەدرێژایی مێژووی عێراق كەسم نەبینیوە هێندەی مالیكی دژی كورد بێت ئەو لە هەندێ شتدا لە سەددام حوسێن-یشی تێپەڕاندووە، سیاسەتی برسیكردنی خەڵك زۆر كە مالیكی پێڕەوی دەكرد و ئێستاش عەبادی پێڕەوی دەكات زۆر لە سیاسەتی بەعەرەبكردن مەترسیدارترەو دەبێ هەموو لایەكمان لەدژیدا بوەستینەوە.
میدیا: ئەم هەموو دانوستاندن و رێككەوتنەی لە نێوان هەولێر و بەغدا دەكرێ، هیچ ئاكامێكی نەبووە، هۆكارەكەی بۆ بەغدا دەگەڕێتەوە یان هەولێر، یان ئەوەتا پێكەوە هەڵناكەن و دەبێ لەیەكتر جیاببنەوە؟
غەفوور مەخمووری: مێژووی دیالۆگەكانی كورد لەگە ڵ حكومەتە یەك لەدوای یەكەكانی عێراق بە زۆر هەوراز و نشێودا تێپەڕیوە و بەردەوام عێراقییەكان فێلیان لە كورد كردووە و، وەكو یاری مشك و پشیلەی لێهاتووە، من زۆر جار وەكو كورتەیەك باسم لە دیالۆگەكانی كورد و عێراق كردووەو بەبیر خوێنەرم هێناوەتەوە، ئەگەر سەیر بكەین سیاسەتی مالیكی و سیاسەتی ئێستای عەبادی شتێكی نوێ نین، لەڕابردوودا تەواوی دەسەڵاتەكانی عێراق لەسەرەتای گرتنە دەستی جڵەوی دەسەڵات جۆرە نەرمییەكیان نواندووە و پاشان كە دەسەڵاتەكەیان بەرەو بەهێزی رۆیشتووە دژی گەلی كوردستان وەستاونەتەوە، ئەوەتا كە عەبدولكەریم قاسم هاتە سەر حوكم لە 1958 تا 1961 جۆرە نەرمییەكی نواند، بەڵام پاشتر لە 1961 لە بەڵێنەكانی پەشیمان بۆوەو ئەوەبوو لە 11/9/1961 شۆڕشی ئەیلول بەسەرۆكایەتی ژەنەرال بارزانی نەمر بەرپا بوو، دەسەڵاتی قاسم ئەوەی توانی لە كورد كوشتن و هێرش و بۆمباران و سوتاندنی شار و گوندی كوردستان درێخی نەكرد، ئەگەر نموونەیەكی تر وەربگرین؛ بەعس لە 1968 كە كودەتای كردو دەسەڵاتی گرتە دەست جۆرە نەرمییەكی نواندو لەگەڵ سەركردایەتی شۆڕشی كوردستان دەستی بەدیالۆگ كردو لەئەنجامدا ناچار بوو كە رێككەوتننامەی 11ی ئاداری 1970 مۆر بكات و رایبگەیەنێت و لە 1970 تا 1974 هێمنییەك باڵ بەسەر كوردستاندا بكێشێت و، لەماوەی ئەو چوار ساڵەدا كە بەعس دەسەڵاتی بەرەو بەهێزی رۆیشت لە بەڵێنەكانی خۆی پاشگەز بۆوەو كەوتەوە شەڕی كوردستان و جۆرەها پیلانی بەكارهێنا، هەر لە بەعەرەبكردن و كیمیابارانكردن و بێ سەرو شوێنكردن و تادەگاتە شاڵاوە بەدناوەكانی ئەنفال، ئامانجی بەعس لە سیاسەتەیدا نەهێشتنی گەلی كوردستان بوو بەخاك و خەڵكەوە، دوا نموونەش ئەزموونی رووخانی بەعسە لە 9/4/2003دا، كە بەعس رووخێنرا ئەوانەی ناوی ئۆپۆزسیۆنی عێراقیان لەخۆ نابوو و خودان پێگەیەكی ئەوتۆی جەماوەری نەبوون لەناو عێراقدا گەڕانەوە عێراق و بەهاوكاری وڵاتانی هاوپەیمان و وڵاتانی دەوروبەری عێراق بنكەو پێگەی خۆیان بەهێز كردو لە هەموو شتێكدا هانایان بۆ سەركردایەتی كوردستان دەهێناو سەركردایەتی كوردستانیش لەهاوكاری و پشتگیرییان درێخی نەكردو ئەوەی بۆ ئەو لایەنە عەرەبییە ئێراقییانەی كرد چارەكی ئەوەی بۆ هێزو لایەنە كوردستانییەكان نەكرد، هێندە بەپیر ئەوانەوە چوون و لایەنە كوردستانییەكانیان پەراوێز خست، هەقە لەمەودوا سەركردایەتی كوردستان چاو بەهەڵوێست و سیاسەتەكانیدا بخشێنێتەوەو زیاتر ناوەندی سیاسی كوردستان یەك و رێبكخاتەوەو بەهێزی بكات.
میدیا: بەپێی خەبات و تێكۆشانی درێژ ماوە نەبڕاو و نەپچڕاوی كورد، كاتی ئەوە نەهاتووە كورد سەربەخۆیی رابگەیەنێ؟
غەفوور مەخمووری: پرسی سەربەخۆیی كوردستان و دامەزراندنی دەوڵەت، پرسی سەرەكی و ستراتیژیی كوردە، بۆیە پێویستە سەركردەكانی كورد بەبایەخەوە لەسەر ئەم پرسە بوەستن و كاری بۆ بكەن، باوەڕناكەم كوردێك هەبێت باوەڕی بە سەربەخۆیی كوردستان نەبێت، سەربەخۆیی كوردستان هیواو ئاواتی هەموو كوردێكە، بۆیە پێویستە هەموومان كاری بۆ بكەین و زەمینەسازی بۆ هێنانەدی ئەم ئاواتەی كورد بكەین، ئێمەی كورد لەماوەی رابردوودا دوو هەلی زێڕینمان لەدەستدا، یەكیان لە ساڵی 1991 و ئەوەی دیكەشیان لە 2003 بوو، ئەم دوو هەلە زۆر لەباربوون بۆ راگەیاندنی دەوڵەتی كوردستان، بەڵام بەداخەوە باش نەخوێندنەوەمان بۆ رەوشەكە وایكرد كە سوود لەم دوو هەلە وەرنەگرین، ئێستا شەڕی تیرۆریستانی داعش هەلێكی دیكەی بۆ كورد رەخساندووە كەوا كار بۆ سەربەخۆیی كوردستان بكات، پێویست سوود لەم هەلە وەربگرین و لەدەست خۆمانی نەدەین.
بەباوەڕی ئێمە ئێستا گونجاوترین كاتە بۆ راگەیاندنی سەربەخۆیی كوردستان، بەتایبەت دوای ئەو هەموو پێشهات و گۆڕانكارییانەی كەوا لەسەر ئاستی ناوچەكەدا دێنە پێشەوەو روودەدەن، ئێمەی كورد پێویستە بەزووترین كات ناوەندی سیاسی كوردستان رێكبخەینەوە و دوور لە بەرژەوەندییە حیزبییەكان كاربكەین و سوود لەو بارودۆخە ناوچەیی و نێودەوڵەتییە وەربگرین و بەكارنامەیەكی نەتەوەیی و نیشتمانی بەرەو ئازادی كوردو سەربەخۆیی كوردستان هەنگاو بنێین.
میدیا: كاری زۆرتان بۆ بەستنی كۆنگرەی نەتەوەیی كورد ئەنجامدا و گەیشتە قۆناغەكانی كۆتایی، كەچی لەپڕێكدا كارەكانتان هەڵپەسارد، هۆكارەكەی كورد بوو یان وڵاتانی ئەقلیمی یان هۆكاری شاردراوەی دیكە لە ژێر پەردەدا بوو؟
غەفوور مەخمووری: بەستنی كۆنگرەی نەتەوەیی كورد لەم قۆناخەدا بۆ رێكخستنەوەی ناوماڵی كوران زۆر گرنگە و پێویستە بەزووترین كات ببەسترێت، لێژنەی ئامادەكاری كۆنگرەی نەتەوەیی كورد كۆمسینەكانی زۆر كاری باشیان تەواوكرد، بەڵام بەداخەوە بەستنی كۆنگرە بە هۆكاری سیاسی و لەژێر فشاری وڵاتانی دەوروبەر بۆ كاتێكی نادیار دواخرا.
میدیا: پرسی دەستوور بۆ باشووری كوردستان زۆر گرنگە ماوەی زیاتر لە 20 ساڵە فەرمانڕەوایی خۆمان دەكەین بێ دەستوور، كاتی ئەوە نەهاتووە كورد دەستووری هەبێت، كەچی ئێستا بووەتە مڵملانێی سیاسی نێوان حیزبەكان بگەڕێتەوە پەرلەمان باشترە یان راستەوخۆ بخرێتە راپرسی؟
غەفوور مەخمووری: پرسی دەستوور پرسێكی گرنگەو پێویستە بەزووترین كات یەكلا بكرێتەوە، هەندێ پرسی نەتەوەیی و نیشتمانی هەن پێویستە نەخرێنە قالبی حزبییەوە، پرسی دەستوور یەكێكە لەو پرسانەی كە پێویستە مامەڵەیەكی نەتەوەیی و نیشتمانی لەگە ڵ بكرێت و بەزووترین كات یەكلابكرێتەوە.
میدیا: بەپارێزگاكردنی هەڵەبجە هەنگاوێكی دڵخۆشكەر بوو بۆ خەڵكی هەڵەبجە و كوردستان، كەچی حیزبەكان خەریكە لەسەر پۆستەكان شەڕدەكەن، ئەم هەنگاوەی بەپارێزگاكردنی هەڵەبجە تاچەند خزمەتی ئەم شارە دەكات؟
غەفوور مەخمووری: ئەمە هەنگاوێكی گرنگ بوو، پڕ بەد ڵ پیرۆزبایی لە جەماوەری شاری هەلەبجە دەكەین و ئومێد دەكەین خۆیان بتوانن ئیدارەی خۆیان بكەن نەك كوێخای دوور لەویستی خۆیان بۆ دیار بكرێت، زۆر بەداخەوە ئەم پێنج لایەنەی كوردستان خەریكە ئاو و هەواش لەنێوان خۆیان دابەش دەكەن، لە سیاسەتدا غروور باش نییە، هەقە چاو بەم سیاسەتەیان دابخشێننەوە و بەرژەوەندی نەتەوەیی و نیشتمانی لەبەرچاو بگرن نەك هەموو شتێك بەحیزبی بكەن.
میدیا: دروستكردنی كۆمسیۆنی هەڵبژاردنەكانی كوردستان هەنگاوێكی باش بوو، ئەوەی جێگەی ناڕەزایی بوو بەحیزبیكردنی ئەم كۆمسیۆنەیە، ئێوە نوێنەرتان تێدا هەیە، لەم بارەیەوە راتان چییە؟
غەفوور مەخمووری: ئێمە لەگە ڵ ئەوەداین كەوا سازییە نەتەوەیی و نیشتمانییەكان لەسەر بنەمایەكی نەتەوەیی دابمەزرێن و دووربن لە دەستێوەردانی حزبی، بەڵام ئەوەی بینیمان كۆمسیۆنی هەڵبژاردنەكان رێك پێچەوانەی ئەمە بوو، كۆمسیۆنێكی حیزبی پێكهێنراو دیسان هەر پێنج لایەن پۆستەكانیان لە نێوان خۆیاندا دابەشكرد و بەرگێكی حیزبییان كردە بەر كۆمسیۆنەكە.
میدیا: گەڕاندنەوەی ناوچەدابڕێندراوەكان لە هەموو كاتەكانی دیكە ئەستەمتر بووە، سەركردایەتی سیاسی چیبكات بۆ گەڕاندنەوەی ئەم ناوچانە، لەچوارچێوەی مادەی 140 دەبێت یان رێكاری دیكە دەبێ بگرنەبەر؟
غەفوور مەخمووری: بەبڕوای من گەڕاندنەوەی ناوچە دابڕێنراوەكانی كوردستان بۆ باوەشی كوردستان، ئێستا لەهەموو كاتێك ساناتر بووە، لەبەرئەوەی هێزی پێشمەرگەی كوردستان تا دوا سنوور چووە و ئەو ناوچانەی بەخوێن ئازاد كردووە، باشترین چارەسەر ئەوەیە لەو ناوچانە بمێنینەوە نەكشێینەوە، باوەڕ دەكەم سەركردایەتی كوردستانیش هەر ئەمە دەكات.
میدیا: توركیا داوای چەكدانانی لە PKK كردووە، ئۆجەلانیش ئازاد ناكات، لە نێو ئەم هەموو هەنگاوەو گەمە سیاسییەی توركیا دەیكات، پرۆسەی ئاشتی بەچی دەگات ؟
غەفوور مەخمووری: مانەوەی PKK بەندە بەو چەكەی كەوا لەدەستیدایە، چەكدانانی PKK واتە بێهێزكردنی PKK، توركیا لە چارەسەری پرسی كورد جدی نییە و، هەوڵدەدات زیاتر كات بەفیڕۆ بدات، ئەگەر توركیا جدیە با بەڕێز عەبدوڵڵا ئۆجەلان ئازاد بكات و گۆڕانكاری بنچینەیی لە دەستووری توركیادا بكات و دان بە مافەكانی كورددا بنێت، ئەو كات پرسی دانانی چەك بێنێتە رۆژەڤەوە.
میدیا: رۆژئاوای كوردستان پەرتەوازەیی حیزبە كوردییەكانی پێوە دیارە لەداهاتوو كاریگەری دەبێت لەداواكردنی كورد بۆ مافەكانی؟ چی بكرێ تا كورد لەم بەشەی وڵات یەكگرتوو بێت؟
غەفوور مەخمووری: سەركەوتنی كورد لە رۆژئاواو هەر بەشێكی دیكەی كوردستان بەندە بە یەكێتی و یەكڕیزی كورد لەو بەشەی كوردستان، بەداخەوە دووبەرەكییەكی بێ مانا لە رۆژئاوای كوردستان هەیە، ئەو دووبەرەكییەش دەگەڕێتەوە بۆئەوەی بەشێك لە لایەنە سیاسییەكان بێكاریگەرن و بەشێكی دیكەیان خاوەن بڕیاری سیاسی خۆیان نین، پێویستە لایەنەكانی رۆژئاوای كوردستان بەرژەوەندی نەتەوەیی لەبەرچاو بگرن و جلی تەنگی حیزبایەتی فڕێبدەن و جلی كوردایەتی بپۆشن، ئەگەر ئەمە نەكەن زیان لەخۆیان و لە بزاڤی كوردایەتی دەدەن و مێژوویش بەزەیی بەكەسدا نایەتەوە.
میدیا: هەڵكوتانە سەر پارتەكانی رۆژهەڵاتی كوردستان لەباشووری كوردستان درێژەی هەیە، لەدواین رووداویش هەڵكوتانە سەر حیزبی دیموكرات لە كۆیە، ئایا ئێران ئەمە دەكات یان حیزبەكانی باشوور؟، ئەمەش نیگەرانی زۆری لایەنەكانی رۆژهەڵاتی كوردستان لێكەوتۆتەوە، هۆكارەكەی چیە؟
غەفوور مەخمووری: هەر كەس و لایەنێك ئەمە بكات كارێكی خراپ دەكات و ئێمە رەتی دەكەینەوە، لایەنە سیاسییەكانی رۆژهەڵاتی كوردستان هەقی خۆیانە كەوا ناڕازی و نیگەران بن، ئەوان بەهەموو شێوەیەك رەچاوی بارودۆخی باشووری كوردستان دەكەن، هەقە باشووری كوردستانیش ئەمە بەهەند وەربگرێت و رێزیان بگرێت و بیانپارێزێت، ئەوان لایەن و كەسایەتی وڵاتپارێز و تێكۆشەرن پێویستە رێز لە كار و خەباتیان بگیرێت و هەموومان پشتیوانیان بین.
میدیا: ئەم بارە نالەبارە ئابوورییەی بەسەر باشووری كوردستاندا هاتووە، كاریگەری لەسەر كارەكانی YNDK كردووە؟ بەنیازی دانانی تەلەفزیۆن بوون و ئەم پرۆژەیە بەچی گەیشت؟
غەفوور مەخمووری: بێگومان ئەم بارە نالەبارە كاریگەری نێگەتیفی هەبووە و، كاریگەری بۆسەر كارو خەباتی ئێمەش هەبووەو زۆر پرۆژەمان هەبووە دوامان خستووە، یەكێك لەو پرۆژانە دواخستنی دانانی تەفزیۆنەكەمان بووە.
میدیا: ئەوەی تێبینی دەكرێت لە كۆبوونەوەیەكی پێنج قۆڵی ( پارتی و یەكێتی و گۆڕان و یەكگرتوو كۆمەڵ) بەشدارن لەداڕشتنی سیاسیەتی باشووری كوردستان، ئەم قۆرخكردنی پێنجینەیە، حیزبەكانی دیكەی پەراوێزكردووە، بۆچی حیزبەكانی دیكە ناخوێندرێنەوە؟
غەفوور مەخمووری: وەك لە وەڵامە پرسیارێكی پێشوودا وتم لە سیاسەتدا غروور باش نییە، نەخوێندنەوەی یەكتری ئاكامێكی باشی نابێت و زیان بە یەكڕیزی و یەكدەنگی دەگەیەنێت، بۆیە پێویستە ئەو لایەنانە چاو بە سیاسەتی قۆرخكردنی دەسەڵات و بازارو ئاوو هەوا دابخشێننەوە، خەڵك بۆ ئەوە هەڵینەبژاردن هەموو كایەكانی ژیان بەحیزبی بكەن، خەڵك بۆ ئەوە هەڵیبژاردن كەوا خزمەت بكەن، بەڵام ئەوەیدەیبینین شەڕە لەسەر ئەوەی موختاری ئەم گوند هی كام حزب و فەڕاشی ئەم قوتابخانە بۆ كام حیزب بێت، با خەڵك خۆی بڕیار بدات ئایا ئەمەی ئەوان دەیكەن سیستماتیككردنی دەزگاو دامەزراوەكانی كوردستانە یان بە حیزبی كردنییان!!
میدیا: داعش هەڕەشەیەكی گەورەیە بۆ سەر كوردستان و داعش چی لەكوردستان دەوێت و كێ لەپشتیانەوەیە؟
غەفوور مەخمووری: داعش ئاوێتەیەكە لە شۆڤێنییەتی عەرەبی و توندڕەوەی ئایینی، هەموو ئەوانە لە پشتیانن كەوا دوژمن و ناحەزی گەلی كوردستانن، ئامانجیان تێكدان و لەناوبردنی دەسكەوتەكانی گەلی كوردستانە، بەڵام ئەوەی مایەی خۆشحاڵییە هێزی پێشمەرگەی كوردستان لوتی شكاندن و ریسوای كردن و وانەیەكی وای پێدان كەوا داعش و ئاغاكانییان خەونی نەزۆكیان نەهێتەدی.
میدیا: بیستەم ساڵیادی YNDK لەبارودۆخێكی دژواردا دەكەنەوە، بەشداریتان لەسەنگەرەكانی بەرگری لە كوردستان لەچ ئاستێكدایە، بەبۆنەی یادەكانی ئادار و نەورۆز و راپەڕین پەیامتان بۆ جەماوەر و ئەندامانتان چیە؟
غەفوور مەخمووری: بەپێی ئیكمانیاتی خۆمان بەشداری بەرگریكردن لە خاكی كوردستانمان كردووەو لە ئازادكردنەوەی زۆر شوێنیشدا بەشداربووین.
بە بۆنەی جەژنی نەورۆز و سەری ساڵی كوردی و بیستەم ساڵیادی دامەزراندنی یەكێتی نەتەوەیی دیموكراتی كوردستان YNDK، جوانترین پیرۆزبایی ئاراستەی تەواوی گەلی كوردستان و بنەماڵەی شەهیدانی رێی سەرخۆبوون و ئازادی كوردستان و بنەماڵەی سەربەرزی شەهیدی سەركردەمان (شەهید سەربەست مەحموود) و بنەماڵەی شەهیدانی راپەڕین و بێسەروشوێنەكان و ئەنفالكراوەكان شەهیدانی دەستی تیرۆریستانی داعش دەكەین و سەری رێزو نەوازش بۆ تەواوی شەهیدانی كوردستان دادەنەوێنین و، سڵاو دەنێرین بۆ جەماوەری خۆڕاگری كوردستان، سڵاو دەنێرین بۆ زیندانیانی سیاسی پارچەكانی دیكەی كوردستان كە لە زیندانی داگیركەرانی كوردستان دان و خۆڕاگرانە درێژە بە خەبات و بەرخودان دەدەن، سڵاو دەنێرین بۆ رۆڵەكانی نەتەوەكەمان لە باكوور و باشوور و رۆژهەڵات و رۆژئاوای كوردستان و رەڤەندی كورد لە دەرەوەی وڵات و داوای یەكڕیزی و یەكدەنگییان لێدەكەین بۆ بەرەڤانیكردن لە دۆزی رەوای گەلی كوردستان.
بەم بۆنەیەوە كە هاوكاتە لەگەڵ ساڵیادی راپەڕینی بەهاری 1991 ی گەلی كوردستان، داوا لە گەلی كوردستان دەكەین وەك چۆن راپەڕینمان بە یەكڕیزی كرد با ئاواش بەیەكڕیزی پارێزگاری لە دەسكەوتەكانی راپەڕین بكەین و هەوڵی بەرەو پێشەوەبردنیان بدەین و بیانكەین بە بناخەیەكی پتەو بۆ دامەزراندنی دەوڵەتی كوردستان، با بەگیانی راپەڕینی بەهاری 1991 بەیەكڕیزی دژی تیرۆریستانی داعش بوەستینەوە.
هەر بەم بۆنەیەوە سڵاو و پیرۆزبایی تایبەتی خۆمان ئاراستەی تەواوی ئەندام و دۆست و لایەنگرانی YNDK و هاوبیرانی نەتەوەیی دەكەین و هیوای سەركەوتن و پێشكەوتنیان بۆ دەخوازین لەپێناو هێنانەدی كوردستانێكی سەربەخۆو ئازادو یەكگرتوو دیموكرات، كە ئەوەش هیواو ئامانجی هەرهەموو لایەكمانە و، كارو خەباتی ئێمەیش بۆ هێنانەدی ئەو ئامانجەیە.

كۆمێنتت له‌سه‌ر ئه‌م بابه‌ته‌