رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

 

هەڤپەیڤین: میدیا

  نووسەر و رووناكبیری ناسراوی كوردستان، پیری رۆژنامەنووسان مومتاز حەیدەری، خاوەنی چەند پەرتووكێكی بەنرخ و سەرنووسەری هەردوو گۆڤاری K21 و لەیلا قاسم- لەیلا زانایە، لەم هەڤپەیڤینەیدا لەگەڵ رۆژنامەی میدیا، راستگۆیانە و بوێرانە تیشك دەخاتە سەر رەوشی سیاسی و كلتووری كوردستان و باس لە بنەماڵەی حەیدەرییەكان دەكات و چۆنیەتی دروستكردنی كتێبخانەكەی دەخاتەڕوو، هەروەها تیشك دەخاتە سەر هەندێ لایەنی ژیانی تایبەتی حیزباتی و هزری خۆی لەماوەی تەمەنی خەبات و تێكۆشانیدا.

میدیا: ناسیۆنالیزمی كوردی بۆ لەماوەی رابردوو نەیتوانیوە؟ ببێتە فاكتەری دروستبوونی دەوڵەتی كوردی، هۆكارەكەی ئاشنا نەبوونی تاكی كوردە بەم بیرە یان هۆكارەكەی بۆ نارێكی سیاسەتی دەسەڵاتی كوردستان دەگەڕێتەوە؟
حەیدەری: لەچوار چێوە گشتییەكەدا، ناسیۆنالیزم، لە بۆتەی پێشكەوتنی كۆمەڵایەتی هەمەلایەن: ئابووری، خوێندەواری، پیشەسازی، كلتووری، ئەوانەش لەپرۆسەیەكی شارستانی- سیاسی، پەیتا، پەیتا دروست دەبێ و كۆمەڵە كەسانێك لەمەیدانی چالاكی خوێندەواری و فێركردن و هۆشیاری نەتەوەیی هەڵدەكەون، بەواتایەكی دیكە ئەو كۆمەڵە كەسانە لەمێژووی نیشتمانی هەر نەتەوەیەك بە(پێشرەو) دەناسرێن. جا لەبارەی كوردەوە، جارێ بەر لەهەموو شتێ، كۆمەڵگەی كوردی (كوردستانی)، تا ئێستا لەقۆناغی (عەقڵی) دەرەبەگی عەشیرەتگەری و بنەماڵەدایە، بەدەست بەرژەوەندی خۆویست و دواكەوتووی كۆمەڵاتییەوە دەناڵێنی..! تائیستاش لە چوار چێوەی ئایدۆلۆژیەتی دەرەبەگیدا خۆیان بەتاكە حاكمی نیشتمان، ناوچە، گوند، دەڤەرەكە دەزانن! لەلایەكی دیكەشەوە خەسڵەتی رژێمی دەرەبەگی و عەشیرەتگەری (كۆمەڵگەی كشتوكاڵی) لەپێشكەوتنی خوێندەواری و هۆشیاری سیاسی و پیشەسازی رێگرە..، دیارە هاوكات خودی پرۆسەی دروست بوونی عەقڵی (بیر) ناسیۆنالیزم لە ناو هەناو گواستنەوەی قۆناغی دەرەبەگەیدا دەبێت. ئەمانە هەموو بەلایەك، لەلایەكی دیكەشەوە لەوانەش كوشندەتر، بەتایبەتی بۆ كۆمەڵگەیەكی دواكەوتوو، نمونەی كۆمەڵگەی كوردی، كە ژێر دەستەی دێرینی چەوساندنەوەی هەمە جۆری چینایەتی، كۆمەلایەتی، سیاسی، نەتەوەییە..!؟ سەرەڕای كارە ئایینەكە، كە بەجارێ عەقڵ و كلتوورو جەستەی داگیركردووە جا بۆ سەرهەڵدانی هەر پرۆسەیەكی نەتەوەیی، رۆشنبیری، سیاسی، هۆشیاری شارستانی، ئەو هۆكارانەی ناوبراو، رێگریەكی گەورە بوون..؟!
بۆیە بیری ناسیۆنالیزم و جوولانەوەی ناسیۆلیزمی كورد لاواز بووە و زۆر درەنگ تاكی پێشرەو دەست بژێری كورد دەركەوتووە!؟! كە دەریش كەوتووە، لەسەر دەمێكی زێدەی ئاڵۆزی هەمەلایەنی سیاسی، پەرتەوازەی نەتەوەیی، رەوشی سیاسی جیهان، بەتایبەتی لەكۆتایی سەدەی (19)هەم و سەرەتای سەدەی بیست –سەردەمی سایكس پیكۆ و دواتر گەڵاڵە بووە.
بەواتایەكی دیكە ناسیۆنالیزمی كوردی- بەلای منەوە تائێستاش لەگەڵ دابێت، بەتەواوی وەكو جوولانەوەیەكی نەتەوەیی سەرتاسەری قووڵی كوردستانی دروست نەبووە، تاكو لەپێناو پرۆژەی دەوڵەتی نەتەوەیی تێبكۆشێ..!! لەوەش دژوارتر، پاش دابەش بوونی كوردستان بۆ جاری دووەم- واتە پاش جەنگی یەكەمی جیهانی- كە دەرفەتێكی زێرین دروست بوو..! پرۆژەی دەوڵەتی نەتەوەیی كوردی لەبارچوو..!؟! هەر وەكو (م. رفیق حلمی) لەیادداشتەكانی دەڵێ: ((لەجیاتی دەوڵەتی كوردی، دەوڵەتی توركیا دروست بوو.. هتد )) هەڵبەت كۆمەڵێك هۆكارو فاكتەری هەیە، بەڵام لەم دەرفەتە ئێجگار بەرتەنگەدا ناتوانرێ بەفراوانی باس بكرێ- جا بەلای منەوە-، تاكو كورد سەركردایەتێكی سەرتاسەری نەتەوەیی نەبێ، بۆ جێ بەجێ كردنی پرۆژەی دەوڵەتی نەتەوەیی بكات، (تاكی كورد) بەخۆی ناتوانی دروست بكات..
میدیا: كورد زیاتر لەسەدەیەكە خەبات لەدژی داگیركەرانی كوردستان دەكات، بەڵام، ئاكام و بەرهەمی ئەو خەباتەی هێندەی قوربانیەكانی نییە! بۆچی دەگەڕێتەوە، سیاسیەكانمان، یان ئەوەتا ئینتیما بۆ نیشتمان كاڵبۆتەوە؟
حەیدەری: ئەم پرسیارە، پرسیارێكی قورسو بەجێیە، دیارە تەمەنەكەی لەسەد ساڵ زیاترە، ئەوەی ئەمڕۆ بەدەستییەوە دەناڵێنین نەبوونی سەركردایەتییەكی سیاسیی نەتەوەیی سەرتاسەری كوردستانییە..!! كەلەبەر رۆشنایی بەرژەوەندی باڵای ئاسایشی نەتەوەییدا، تەكتیكی چالاكو بەهێزو رۆشن ئەو تەكتیكەش لەبەر رۆشنایی ستراتیژێكی نەتەوەیی هەمو لایەنی سیاسی، ئابووری، كلتووری، كۆمەڵایەتی پیشوو درێژ دەست نیشانی نەكردووە..!؟! بەڵكو بەگشتی، لە دەرەوەی بەرژەوەندیی نەتەوەیی سەرتاسەری كوردستان – یەك كوردستان-، واتە لەدەرەوەی بزووتنەوەی رزگاریخوازی سەرتاسەری، خەباتی سیاسی لەچوار چێوەی بەناوی بەرژەوەندیی: (برایەتی كوردو....) عەرەب، تورك، فارس بەرێوەچووە..!! لەكاتێكا ئەو (برایانە ) هەردەم لەگەڵ ئێستاشی دابێ هەرداگیركەرن و گوركی لەپێستی مەڕن.. هتد.
بەكورتی هۆكارە سەرەكییەكەی لاوازی عەقڵی –بیر – ستراتیژی نەتەوەیی لە كایەی خەباتی رزگاریخوازی كورد بووە..!
بەواتایەكی دیكە، لاوازی – یان نەبوونی- هۆشیاری نەتەوەیی، نەخشەی نەتەوەییە، بۆیە كە خەباتو قوربانییەكانی بێ سنووری زیاتر، لەو سەد ساڵەدا، ئامانجی سەرەكی خۆی، كە رزگاری نیشتمانی نەتەوەییە، وەدەست نەهێناوە..!! ئێستاكەش كە سەرەتای سەدەی -21، سەدەی نەتەوە ژێر دەستەكانە، ئەگەر نەخشە ستراتیژیی نەتەوەیی دروست نەبی. (واتە پەیرەو نەكرێت)، هەمدیسان لەبازنەی قوربانی بێ سنووری مایە بووچ – حەی ئەڵڵا- دەكەین..!!
میدیا: سیاسەتوانانی كورد، لەهەموو پارچەكانی كوردستان بەرەدوام، ئەو قەوانە، بەرگوێی تاكی كورد دەدەن، كەزەمینە بۆ پێكهێنانی دەوڵەتی كوردی نییە، ئایا كەی كاتی دێت..؟
حەیدەری: ئەو (ق+++ەوانە سواوە) نیشانەی لاوازی نەخشەی سیاسیی نەتەوەیی جوولانەوەی ئازادیخوازی كوردستانە،. هەروەكو لەوەڵامی پرسیاری دووەمدا ئاماژەم پێی كردووە، لەچوار چێوە گشتییەكەیدا، سەركردایەتی سیاسی، لەهەر پارچەیەكی كوردستاندا، راستەوخۆ دروشمی سەربەخۆیی كوردستانییان بەرۆشنی و بوێرانە، نەیان كردۆتە ئامانجی سەره‌كی خەباتی سیاسیی هاوچەرخ، واتە لەرەوتی تیكۆشاندا، لەپێناو وەدەست هێنانی مافی سەربەخۆیی – دەوڵەتی نەتەوەیی سەربەخۆ- بۆتاكی كورد كاریان نەكردووە، بەڵكو بەپێچەوانەوە، لەبەر رۆشنایی (دروشمی برایەتی...) مەسەلەی گەڵاڵەكردنی پرۆسەی سەربەخۆیی كوردستان لەبار بردووە..؟!!؟ دەكرا تاكتیكێكی سیاسی- نەتەوەیی تێكۆشان، خزمەتی ئامادەكردنی تاكی كوردو نزیك بوونەوەی لەستراتیژی یەكجارەكی سەربەخۆیی كورردستان بكرێ..هتد..
خۆ دزینەوە لەو پاشاگەردانییەی سەرانی رزگاریخوازی كوردستان، لەماوەی ئەو سەدساڵەو لەهەر بەشێكی كوردستان، واتە بەپێی رەوشی تایبەتی و هەرە دژواریان، بۆیە كە هەردەم ئەو: (پاساوە لاوازە) حازر بەدەستە، دووبارە، سێ بارە دەبێتەوە..!؟! جا كەی سەركردایەتی سیاسی- نەتەوەیی گەلی كوردستان، نەتەوەییانە، بوێرانە، رەخنەگرانە،بەخۆیدا چووەوەو رێبازو شێوازی خەباتی سیاسییان لەبەر رۆشنایی بەرژەوەندیی باڵای ئاسایشی نەتەوەیی - بەهەمو چەمكو جومگەو رەهەندەكانییەوە- بەرۆشنی و راستگۆیانە لەدەرەوەی بەرژەوەندی حیزبایەتی تەسكی خۆیان و دەركی دارێشت، ئەوە موژدەی دەوڵەتی كوردی نزیك دەكاتەوە. ئامین..؟!
میدیا: بیری عێراقچییەتی لەناو رۆح و مێشكی گەنجان بەبەرنامە دەچەسپێندرێ، ئەوە تاچەند كاریگەری لەسەر دوور خستنەوەی گەنجان لەبیری نەتەوەیی و نیشتانپەروەری دەبێت..؟
* حەیدەری: مەسەلەی (عێراقچییەتی) رەنگدانەوەی لاوازی بیری نەتەوە پەروەرییە، هاوكات بەرهەمی نەزۆكی دروشمی (برایەتی كوردو عەرەب) ە، لێرەدا دەڵێم، دەبا كاتی خۆی بگوترێ: (دۆستایەتی كورد و عەرەب) ئەوەیش لەچوار چێوەی دۆستایەتی تێكرای گەلانی سەر رووی زەوی. بێگومان ئەو دەردە كوشندەیە، كەپێی دەگوترێ (عێراقچییەتی)، نەك لەئێستادا، هەرلەسەرەتاوە، واتە لەگەڵ لكاندنی باشووری كوردستان بەدەوڵەتی عێراقی عارەبی دەستكردی ئینگلیزەكان، كارێكی خراپ و زیان بەخش نەك تەنیا لەسەر گەنجان كردووە،بگرە بەگشتی كۆمەڵە خەڵكانێكی زۆر،بەتایبەتی توێژی سەرمایەدارەو بازرگان و كەسانی مشەخۆرو بێ شوناس كردووە، من پێم وایە، شوێنەوار و پاشماوەی هێشتا هەر زۆرە، سەرباری دیاردە و سیاسەتی (تەعریب) بەشێوازی جۆراو جۆر پەیڕەو دەكرێ بۆیە كە دەبێ زیاتر لەبەرامبەر، هەر دوو دیاردەكە بەپێی ریباز و سیاسەتێكی نەتەوەیی – شارستانی، بوەستین و چارەسەریان بكەین.
میدیا: داڵدانی ئەنفالچییەكان ئەوانەی كوردن و لەژێر سێبەری دەسەڵات خۆیان حەشارداوە چۆن دەبینن..؟ ئایا كاتی نەهاتووە، دادگایی بكرێن؟
حەیدەری: بەر لە هەموو شتێ، بەرژەوەندیی حیزبایەتی تەسكی سەرانی باشووری كوردستان لەپێناو وەدەست هێنانی (دەنگ) لەكاتی هەڵبژاردندا و هاوكات ژمارەیەك هۆكاری دیكەی عەشیرەگەری و خزمایەتی و ناوچەگەری، زەمینە ئەو داڵدانەیە، لەلایەكی دیكەوە، سەركردایەتی سیاسیی كورد، لەماوەی (23) ساڵەی تەمەنی راپەڕین، بەتەواوی راستگۆیانە لەمەر مەسەلەی ئەنفال- جینۆسایدی كوردان- كاری نەكردووە..!؟ هاوكات ئەگەر دەستەڵاتی سیاسی بەتەواوی لەمەر مەسەلەی ئەنفال - جینۆساید-هۆشیارانە، نەتەوەییانە كاری بۆ بكردایە ئەوە مەسەلەی دادگایی كردنی ئەنفالچییەكان بەسروشتی دەهاتە پێشەوە..!!
میدیا: پۆست و پارە و ئەدای خراپی بەرپرسانی كورد لەبەغدا، هیچ دەسكەوتێكی نەتەوەیی، لەگەڕانەوەی بستە خاكێك و جێبەجێ كردنی مادەی (140)نەبووە راتان لەم بارەیەوە چییە؟
حەیدەری: لەچوار چێوەی گشتییەكەیدا، لەبازنەی پرسیارەكە و هاوكات لاوازی سیاسەتی نەتەوە پەروەریی سەركردایەتی باشووری كوردستان و خودی دەوری نا كارامەیی و لێهاتوویی و گیانی نەتەوە پەروەریی بەرپرسە كوردەكان لەبەغدا، ئاكامەكەی وەدەست نەهێنانی دەسكەوتی نەتەوەیی بوو. هەڵبەت ئەو ئەنجامەش زێدە مایەی داخە!!؟
میدیا: ئاسایشی كورد، لەكاتی ئێستادا پارێزراو نییە، سەركردایەتی كورد چی بكات، بۆ پاراستنی ئاسایشی نەتەوەییمان..؟!
حەیدەری: سەركردایەتی كورد، خودی خۆی بەرپرسیاری سەرەكیی لاوازی ئاسایشی نەتەوەییە..؟ (بەدەسكی دار بیور، قەدی دارە گەورەكە دەبڕیتەوە)؟! جاكێ؟ بیپارێزی ..؟!
میدیا: لەسەردەمی جیهانگیری، ناسیۆنالیزم دەڵێن پاشەكشەی كردووەو شتێك نەماوە بەناوی دەوڵەتی نەتەوەیی، بەڵكو ئابووری جیهانی جێگەی هەموو گرتۆتەوە، وەخەباتی چینایەتی لەم نێوه‌ندەدا كاریگەری لەسەر ئەم پرسە هەبووە؟
حەیدەری: جارێ بەر لەهەمووشتێ، جیهانگیری- عەولەمە- رووی دووەمی سیاسەت و شێوازی خوێن مژانەی رژێمی سەرمایەداری جیهانە، واتە لەهەرر لەكوێ بێت، دژی كامەرانی خەڵك و سەروەریی – السیادە – نیشتمانییە. ئەو پاساوەش كە گوایە، جیهانگیری، جێگرەوەی نەتەوەییە، بۆ ئەوەیە، سستی و لاوازی خەباتی پێی پەردە پۆش بكەن!؟!، نەخێر سەد جار نەخێر، نابێت. ئەگەر – كورد یش وای لێكبداتەوە، ئەو پاساوێكە، بۆ كزی هەست و رێباز و ئامانجی رەوای نەتەوە پەروەرییە..!؟ هاوكات دەكرێ لەمەڕ دیاردەی جیهانگیری، لەهەندێ لایەنی ئابووری لەپێناو پێشكەوتنی كۆمەڵایەتی- تەكنەلۆژی سوودی لێ وەربگیرێ.
میدیا: ئەوشەڕەی بەرۆكی گرتووین واتا شەڕی داعش كە لەگەڵ كورد نەبوو، كردیانە هی ئێمە راتان چییە بۆ بەسەر كوردیان ساغكردەوە؟ كەی ئەم شەڕە تەواو دەبێ؟
* حەیدەری: شەڕی داعش، ئامانجی داعش، بگرە دروست كردنی داعش، زێدە بەكورتی: دەست كردی ئەو وڵاتانەیە، ئەو هێزی تاریكەری و روانگەی فیكری بەسەرچووه‌ كە لەئەنجامی گۆڕانكاری وپێشكەوتنە هەر مەزنانەی جیهان و هەڵوەشاندنەوەی سنوورە كۆنەكانی ئیمپریالیزم، بەرژەوەندی باڵایان دەخاتە مەترسیێكی بێ سنوور، دروستییان كردووە..!!
ئالێرەدا. بۆ كوردستان- كرا ئامانج..؟! چونكە لەماوەیەكی (دوور یان نزیك) كورد – تێكڕای نەتەوەی كورد - سنوورەكانی رۆژهەڵاتی ناوەڕاست و نزیك دەگۆڕی، جا (داعش) كە بەشێوەیەك لەشێوەكان نوێنەری داگیركەرانی كوردستانە.
ئەوەتا تەماشا بكەن، نەخشەی شەڕەكەیان چۆن دەستی پێ كرد: مەخمور – گوێر، هەولێر، كۆبانێ بەرەو سنوور، باشوور، شنگالو ناوچە تەعریب كراوەكان، لەلایەكی دیكەوە خانەقین، دیالە، كەركوك . هتد..؟!
كەواتە، لەشەڕی چالدێرانەوە تا ئەمڕۆكە تێكڕای پانتایی – یەك كوردستان- شەڕی داعش دوا شەڕی كورد دەبێ. بۆیە كە، ئەو شەڕە زوو تەواو نابێت گرنگ ئەوەیە كورد تێكڕای نەتەوەی كورد، زێدە هۆشیار بێت بەڵێ زێدە هۆشیاری تەنانەت دەبێ، دارو بەردی كوردستانیش دژی دوا هێزی هەرە تاریكی جیهان و دوا شەڕی نەتەوەیی كورد دژی تێكڕأی داگیركەرانی كوردستان راپەرن. بەڵێ بەیەكگرتوویی. راپەڕن...

میدیا: كام خەبات، كورد بەرەو كیانی خۆی دەبات، نەتەوەیی، یان چینایەتی یان ئیسلامی؟ خۆت ئینتیمات بۆ كام فیكرە هەیە؟ ئایا حیزبی لەئێستادا، یان لەرابردوو لەناو كام حیزب كارت كردووە..؟
حەیدەری: ئەوەی راستی بێت لەوەڵامی بەشی یەكەمیدا، زۆر بەكورتی دەڵێم: خەباتی نەتەوەیی- كۆمەڵایەتی پێشكەوتن خواز و فیكری رۆشنگەری، بەرەو سەربەخۆیی دەبات. سەبارەت بە بەشی دووەم لام رۆشن نییە، سەبارەت بەبەشی سێیەمی پرسیارەكە، هەمدیسان بەكورتی دەبێژم: من ئێستا، زیاتر لە (40) ساڵە، سەر بەهیچ جۆرە حیزبێك نیم.
لەرابردووشدا كادرێكی پێشكەوتووی حیزبی شیوعی عێراق – ئەوسا هەرێمی كوردستان- بووم. دیارە، هەر لەوقوتابخانەیەش فێری خەباتی سیاسی – شۆڕشگێری راستگۆ بووم. چرای رۆشنی كلتوورییەكەشم كلتووری مرۆڤپەروەر- نەتەوە پەروەر- هەمدیسان زادەی تیۆریی ماركسی و باخچە رەنگینەكەی لێنینە..! هەوكات سەرچاوەی ئاستی رۆشنبیریم، كەلەپوورو سامان نەتەوەیی كوردان و دەریای شارستانی مرۆڤایەتیم.
میدیا: كاتی خۆی لەسەندیكای رۆژنامەنووسان بوویت، دوایی وازت هێنا هۆكاری چییە؟!
حەیدەری: جارێ، بەر لەهەمووشتێ، من ئێستاش بەشانازییەوە، ئەندامی سەندیكای رۆژنامەنووسانی كوردستانم. چونكە سەندیكای رۆژنامەنووسانی كوردستان دەسكەوتێكی شارستانی- نەتەوەیی، تێكڕای خاوەن قەڵەمەكانە. هتد.. هەر لێرەوەش بەپێی ناورەۆكی پرسیارەكەتان، من دوو خول- دەورە-، وەكو رۆژنامەنووسێكی خاوەن ئەزموونو بەتەواوی بێلایەن سكرتێری سەندیكای رۆژنامەنووسانی كوردستان بووم، بۆ زێدە زانیاری من چ لە لێژنەی باڵای ئامادەكاری بۆ دروست كردنی سەندیكاكە، چ پاش كۆنگرەو پۆستی سكرتێری –بەشەهادەتی- ژمارەیەكی زۆر رۆژنامەنووسان دەروێكی چالاك و بەرچاوم گێراوە. هەڵبەت بوونی هەندێ گیرو گرفت و هۆكار، لەگەڵ هەندێ ئەندامانی ئەنجومەنی سەندیكا- بەتایبەتی لەدەورەی دووەمدا لەپۆستی سكرتێری وازم هێنا..!
هەڵبەت لێرەدا، جێی نابێتەوە، باسی گیروگرفت و هۆكارانە بكەم. كەی دەرفەتێكی لەبار دروست بوو، واتە: رەخنە گرتن دەوری پیرۆزی خۆی وەدەست هێنا، ئەوسا بۆ مێژوو، قسەی خۆمان دەكەین. تۆبڵێی ئەو رۆژە زوودابێت..؟!
میدیا: حەیدەری بنەماڵەتان لەچییەوە هاتووە..؟ چەند پشتن و رۆڵی حەیدەرییەكان لەبزاڤی كوردایەتی چییە؟ ئەم گۆڕەی لەهەولێر لەناو شێخەڵڵا هی حەیدەرییەكانە ؟
* حەیدەری: تەمەنی بنەماڵەی حەیدەرییان زیاتر لە (400)ساڵە، بۆیە زۆر بە كورتی دەڵێم بنەماڵەی حەیدەری، بنەماڵەیەكی گەورەی زانست پەروەریی سوننە مەزهەبی ئایینی ئیسلامە. كاتی خۆی لەسەردەمی شا ئیسماعیل سەفەوی، كە مەزهەبی شیعەگەریی داهێناو، بەزەبری شمشێری زۆرداری پەرەی سەند، جایەكی لەئامۆزەكانی بەناوی (محەمەد پروەدین) روو لەباشووری كوردستان- كوردستانی سەردەمی عوسمانی-دەكات و لە هەریری لەسەردەمی میرسلیمان بەگ نیشتەجێ دەبێ، هاوكات دەوڵەتی عوسمانی لەبەر ئەوەی دژی دەسەڵاتی شا ئیسماعیل سەفەویی شیعە مەزهەب رایان كردووەن بەگەرمی باوەشییان بۆ دەكاتەوە. كوڕە زاكەی محەمەد پیرودەین) بەناوی حەیدەر – بەحەیدەری یەكەم ناسراوە - زانایەكی گەورەی لێ هەڵدەكەوێ. ئەو زاتە گەروەیە پاش كۆچی دوایی لەهەریر -سارداو – دەنێژرێ. نەوەی ئەو زانا گەورەیە، بە (حەیدەری)دەناسری و پاشان لەگوندی ماوەران، نزیك شەقڵاوە نیشتەجێ دەبن، لەئەنجامدا، ماوەران دەبێتە مەڵبەندێكی گەورەی زانستی ئایینی – علومی عەقڵی و نەقلی- ئەوەی هەولێریش تەنیشت ئارامگەی شێخ عەبدوڵڵا – شێخەڵڵا- ئەوە ئارامگەی حەیدەری دووەمە ساڵی (1716)زایینی كۆچی دوایی كردووە. لە بزافی رزگاریخوازی (كوردایەتی) رۆڵی بنەماڵەی حەیدەرییان لەسەردەمی شێخ و لە ئیسلام ئیبراهیم حەیدەری – برا گەورەی باوكم، ناسراو بەحەیدەر ئەفەندی حەیدەری، لەئەستەنبولەوە دەست پێدەكات . تا دەگاتە بەغدا، پاشان لە كوردستانی باشوور- هەولێر-زیاتر دەورەكە پەرە دەسێنێ بەتایبەتی لەسەردەمی عاصم حەیدەری ساڵح حەیدەری، جەمال حەیدەری، موهیب حەیدەری، تا دەگاتە من و جەمشیدی برام...هتد.
بۆ زێدە زانیاری سەیری كتێبەكانی: جەنابی مەلا عەبدولكەریمی مودریسن جەنابی شێخ محەمەد عەلی قەره‌داغی زانای بەناو بانگ ئیبراهیم فەسیح ئەلحیدەری، (پ.د. عیماد عەبدولسلام رەئووف، مامۆستا كەریم شارەزا، مامۆستا بورهان حاتەم، دیوانی شیعری ناصح حەیدەری، مامۆستا سنوور سەباحو دەیانی دیكە لەلێكۆڵەرەوەی عارەبو كوردان.
جێی ئاماژەیە جەنابی عەبدولرەحمانی كەواكیبی حەیدەری بووە سەرچاوە: (پ.د. كەمال مەزهەر بەكورتی مێژووی هاوچەرخی كوردیایەتی دەوری بنەماڵەی حەیدەری لەبزاڤی كوردایەتی بەرۆشنن نووسیەتی..هتد
میدیا: چەند كەس لەبنەماڵەكەتان، لەلایەن حیزبی بەعسی رووخاو لەسێدرە دراون و تەرمەكانییان ئایا وەرگیراونەتەوە؟ یان بزرن؟ سۆراختان بۆیان كردووە؟
حەیدەری: بەدەستی حیزبی بەعسی فاشی شەوی 8-9/3/1963، برا گەورەم موهیب حەیدەری، لەگەڵ ژمارەیەكی تێكۆشەرانی حیزبی شیوعی، لەنێوان رێگای بەغدا-حیللە، زیندەبەچاڵ كراون، تەرمەكەی تا ئێستا نەدۆزراوەتەوە، هەروەها، رێكەوتی 20/7/1963 تێكۆشەری سەركردەی ناسراو جەمال حەیدەری، ئەندامی مەكتەبی سیاسی حیزبی شیوعی عێراق، بەدەستی چەپەڵی سەركردە فاشییەكانی حیزبی بەعس شەهید كرا و لاشەكەی لەناو بردراوە..!
لەساڵی 1964، پاش كودەتاكەی عەبدولسەلام عارف، لەرێگەی حیزبی شیوعییەوە، هەوڵ درا بۆ ئەوەی لاشەكەی شەهید جەمال حەیدەری بدۆزرێتەوە، بەڵام بەداخەوە بێ سوود بوو.
* میدیا: ئەی باسی كتێبخانەكەی ماڵی خۆتانمان بۆ خوێنەرانی میدیا بكەیت و بەنیازن چی بكەن بۆ ئەم ئەرشیفە و پەرتووكەكان چین و كام پەرتووكیان ناوازەن و لە شوێنەكانی دیكە نییە؟
* حەیدەری:چیڕۆكی كتێبخانەكەم، وا بەئاسانی لەدیدارێكی رۆژنامەنووسی بەرتەسك دا، باس ناكرێ.. بەڵكو زۆر بەكورتی ئاماژەی پێ دەكەین:
تەمەنەكەی نزیكەی (60) ساڵە، بەر لەشۆڕشی 14ی تەممووزەوە، دەستم بەكتێب كڕین و پەیداكردن، كردووە. هەندێكیان كاتی خۆی بەرۆژانەی خۆم (10 فلس بوو) كۆم دەكردەوە، كتێبم پێ كڕیوە. شایانی باسە، من تاكە قوتابی بووم لە ئاستی شاری هەولێر بگرە (لیوای هەولێر)- پارێزگا- ساڵی 1957، بەشداری گۆڤاری هیوام كردووە، مانگانە (750 فلس) ئابوونەم داوە. مامۆستای كۆچ كردووی گەورە فاتیح مەلا عەبدولكەریمی مودەریس سەرە مانگان دەهاتە هەولێر، ئابوونەی كۆدەكردەوە و جێی ئاماژەیە، هەر (36) ژمارەكەی گۆڤاری هیوا لەكتێبخانەكەم پارێزراوە.
هەوڵ دەدەم باڵەخانەیەكی تایبەتی بۆی دروست بكەم. شایانی وتنە، بڕیار بوو، سەرۆكی حكومەتی كوردستان، جەنابی نێچیرڤان بارزانی، باڵەخانەیەكی تایبەت بەكتێبخانەكە دروست بكات، ئەوە دوو ساڵ زیاترە كارەكە جێ بەجێ نەكراوە..! بەهەرحاڵ، لەدوارۆژێكی نزیكدا، بەهەر چوونێك بێت، وەكو دەزگایەكی سەربەخۆیی كلتووری دێتە كایەوە...هتد.
تا ئێستا زیاتر لە (150) خوێندكاری بەكالۆریۆس، ماستەر، دكتۆرا، سوودی تەواویان لەكتێبخانەكە وەرگرتووە. شایانی زانینە، ناو و ژمارە تەلەفۆن، جۆری سەرچاوەكان، رێكەوتی مێژووی سەردانیان هەر هەمووی لەسێ دەفتەردا تۆماركراون. دەخوازم بۆم بكرێ ئەو سێ دەفتەرە، وەكو كتێبێكی سەربەخۆی دیكۆمێنتی چاپ بكەم. هاوكات لەپاڵ كتێب و گۆڤارەكانی هەمەچەشن و رەنگ و بابەت، ئەرشیفێكی سیاسی- حیزبی، باشم پێكەوە ناوە. بۆ زیاتر زانین سەیری، ئەو (10-15) ساڵە دوایی ئەو باسی دەرچوون، نامەی ماستەر و دكتۆرا بەتایبەتی لەمەیدانی مێژوو- ئەدەبیاتی كوردی بكەن، ئەوسا دەزانن، كتێبخانەی حەیدەری چ دەورێكی گێڕاوە، بۆیە كەمن لەو رووەوە هیچ ناڵێم. دەیان، كتێبی كۆن و دەگمەن هەن، كەلەكتێبخانەی دیكەی رەسمی و كەسی (شەخسی)دا بوونی نییە. تەنانەت كتێبی قەدەغەكراویش هەیە. ناوەرۆكی كتێبخانەكە، رەنگدانەوەی پێداویستییەكانی ژیانی كلتووری، مێژوویی، سیاسی، كۆمەڵایەتی...هتد.
* میدیا: هەردوو گۆڤاری (K21، لەیلا قاسم- لەیلا زانا) چۆن دەریدەكەن، كێ لە رووی دارایی هاوكاریتان دەكات، ئایا ئێستا هۆكاری چییە دەرناچێت، واتا كاریگەرییەكان چین؟
* حەیدەری: مەسەلەی دەركردنی هەردوو گۆڤاری (K21، لەیلا قاسم- لەیلا زانا) وابزانم لێرەدا، ناكرێ (واتا جێیان نابێتەوە) بەتەواوی وەڵامەكەی دەور بكەمەوە، چونكە تەمەنەكەی شەش ساڵی خشتی كاركردن و نووسین و ماندووبوون و داهێنان و ئێش و ئازارە..! خۆی لەخۆیدا چیرۆكێكی هەمەلایەنی بێكەسی كلتووری كوردان دروست دەكات..! بەهەرحاڵ، مەسەلەی ئەو دوو گۆڤارە، ژمارەیەك پرسیار دروست دەكات، وەڵامدانەوەی نامیلكەیەكی سەربەخۆ وەدەست دێنێ.
لەمەڕ مەسەلەی داراییش، لەسەرەتاوە، پارچە زەویەكم (10 دۆنم) فرۆشت، هەروەها نیوە بیرێكی ئیرتوازیشم فرۆشت، هاوكات بڕی یارمەتی لێرە و لەوێ پێشكەش كراوە. بەڵام لەژمارە (7)ەوە، ئەوە كتێب پەروەر جەنابی مام جەلال، حاتەمانە و بەزیادەوەش بوودجەی هەردوو گۆڤارە دەستەبەركرد. بەڵام لەمانگی (12)ی 2013وە، واتا پاش قەیرانی ئابووری كوردستان، بوودجەكە وەستاوە، بۆیە كەدەرچوونی گۆڤاری (K21) لەپاش ژمارە (21)ەوە، وەستاوە، گۆڤاری (لەیلا قاسم- لەیلا زانا)ش تەنیا حەوت ژمارەی لێ دەرچوو- لێرەدا، حەز دەكەم رابگەیەنم، ژمارە (8) گۆڤاری لەیلا قاسم- لەیلا زانا بەشێواز و چەشنێكی سەرنج راكێش پاش ماوەیەك.. دەردەچێ.!
هەر لێرەوەش، لەناخەوە دەخوازم تەندروستی جەنابی مام جەلال تاڵەبانی، زۆرباش بێت و تەمەنی درێژ بێت. لای من، هەردەم زێدە مایەی سوپاس و پێزانین و شانازییە.
میدیا: خەباتتان لەهەموو بوارێكەوە زۆرە، بیرتان لەوە نەكردۆتەوە، كەكاتی نووسینەوەی بیرەوەریەكانتان هاتووە، ئەمە لەبەرنامەتان هەیە؟
حەیدەری: نووسینەوەی یاداشت، یان بیرەوەری، بۆ هەركەسێ لەهەر بوارێكی ژیان بوو بێت، كارێكی شارستانی- نەتەوەییە، دەبێ بەراستگۆیی- بوێری بنووسرێ. لەبارەی خۆشمەوە، ئەوەی راستی بێت، ژمارەیەكی زۆر دۆست و برادەرانی شارەزا لەژیانم بەپەرۆشەوە داوام لێ دەكەن، كەبنووسمەوە. بەهەرحاڵ بڕیارم داوە بنووسم. هەندێ شتیش لەلایەن چەند دۆست و برادەرێكەوە، بەگفتوگۆ كراوە. دەخوازم بەتەواوی بنووسم، ئەوەی لەماوەی ژیانم كەلەتەمەنی (9) ساڵییەوە، وەك پەیامنێری حیزبی، لەسەر داوای شەهید جەمال حەیدەری برا گەورەم، كەنامەم بەنهێنی بۆ ئەندامانی لیژنەی (محەلی هەولێر) دەگوازتەوە و تا ئەم رۆژگارە، دنیایەك رووداو و كارەسات و زانیاری تاڵ و شیرین لەمێشكدا كاڵەكەی كردووە..! دەبێ ئەو مێژووە بنووسرێتەوە، چونكە تەنیا هی خۆم نییە، بگرە هی نەتەوەكەشمە، دەخوازم بنووسرێ، بەڵكو هەوڵدەدەم بنووسمەوە. سوپاس.
میدیا: لەماوەی رابردوو هەوڵی تیرۆركردنت دراوە، چەند جار بوو كێ كردی و لێكۆڵینەوە لەوباریەوە كرا؟
حەیدەری: مەسەلەی هەوڵی تیرۆركردنم، ئەوەشیان چیرۆكێكی ئاڵۆز و ناسك و سیاسی مایەی سەرنجە، كەمن سەرەڕای خەباتی لەمێژینەی دڵسۆزانەی خۆم بۆ نەتەوەكەم، هاوكات رۆڵەی بنەماڵەیەكی گەورەی نیشتمانپەروەر و شۆڕشگێڕ، خاوەن سەركردەی تێكۆشەر و شەهید. لەوەش كارەساتر، پاش راپەڕین هەوڵ بدرێ تیرۆر بكرێم..!! كەچی لەسەردەمی حیزبی بەعسی فاشی دا، كەنەچوومە ژێر ركێفی ئەوان- لای بەڕێز كاك غەفوور مەخمووری دیكۆمێنتێك هەیە، ئەوە دەسەلمێنێ، كەمن نەچوومەتە ژێر ركێفی ئەوانەوە- هاوكات لەسەردەمی بەعسدا، من زۆر بەنهێنی پەیوەندی تایبەتیم لەگەڵ سەركردایەتی حیزبی شیوعی عێراق، بەتایبەتی لەگەڵ مامۆستا عەزیز محەمەد و مامۆستا كەریم ئەحمەد، لەرێگەی پەیامنێری زۆر تایبەتی ئەویش بەڕێز موژدە مەلا حەسەن- فەتاح تۆفیق، بووە. كەچی زۆر نووسەر و رۆشنبیر و رۆژنامەنووس، بەشێكی كارامەی دەسەڵاتی بەعس بوون، هەمدیسان ژمارەیەكی زۆر لەوانە ئێستا بەشێكن لەدەسەڵاتی كوردی پاش راپەڕین..! جا لەبەر ئەو سەردەمە- سەردەمی حیزبی بەعس- لەمەڕ هەڵوێستم و رەخنەگرتن، تەنیا دوو جار لەكاری رۆژنامەنووسی دەركرام، هەروەها پاشانیش كتێبخانەیەكی ئەهلیم كردەوە، پاش چوار ساڵ، كەدەورێكی گرنگی لەمەیدانی كلتووری ئەو سەردەمانێ گیرا، كتێبخانەكەش داخرا، لێرەدا هەندێ نهێنی سەیر لەبارەی منەوە هەیە، كەچۆن راپۆرت نووسراوە و كێ نووسیویەتی، بۆ چ دەزگایەكیش نێردراوە؟
ئەوجا سەیر ئەوەیە، لەچەند كۆڕ و كۆبوونەوەیەكی پاش راپەڕین، لەژێر چەتری ئازادیی راپەڕین و دەسەڵاتی كوردیدا، لەبەر بوێری و راستگۆییم، هەوڵی تیرۆركردنم بدرێ..! ئەوەش بەنەخشەیەكی دارێژراوی تۆكمە، كە بڕی (5كگم) TNT، بەكارهاتبوو، بۆ ئەوەی بەهەر جۆرێ بێت بەخۆم و كتێبخانەكەم لەناوبچن..!!! دەپرسن چەند جار بوو، ئەوە هەر یەك جار بوو. بەڵام لەبارەی لێكۆڵینەوە، دەبێ بگوترێ، هەمان شەو وەزارەتی ناوەخۆ (14/3/1999) بەیانێكی ناڕەزایی دەركرد، بەناڕاستەوخۆ پەنجەی بۆ بەغدا درێژكردبوو..! بەڵام بەداخەوە پەردەپۆش كرا و تا ئێستاشی لەگەڵدابێ، بەهیچ جۆرێ ئەو كەیسە باسی لێوە نەكرا و ناكرێ..!! جا كێ كردی..؟! بۆ كردییان..؟! ئەوە دەبێ ئەو پرسیارە لە (عالەم و لغەیبی) سیاسەتی دەسەڵاتی كوردی بكرێ..!! جێی ئاماژەیە، شەوی پاشتر، كۆچ كردووی شەهید سەعد عەبدوڵڵا لەپێش ژمارەیەك مێوان گوتی: (ئێمە پێمان وایە، واتە بەپێی زانیاریان) وڵاتێكی ئیقلیمی و حیزبێكی سیاسی كوردی كردوویانە..)!! هەر لەبارەی مەسەلەی لێكۆڵینەوە، من پاش هەفتەیەك سەردانی وەزیری ناوەخۆم كرد، كەئەو سەردەمە جەنابی كاك فازیل میرانی بوو، لەبارەی مەسەلەی تیرۆركردنەكەم پرسی..! گوتی: (یەكێك گیراوە كەسەر بەلایەنێكی سیاسییە، چاوەڕێ بە، ئەنجامەكەی دەردەكەوێ). تا ئێستا لەچاوەڕێی گۆدادام..!!
هاوكات رۆژنامەی (الحیاە)ی لەندەنی زۆر گرنگی بەهەواڵی تیرۆركردنەكەدابوو، كەچۆن سكرتێری سەندیكای رۆژنامەنووسانی كورد بە (أعجوبە) رزگاری بووە. لەكۆتایی ئەم پرسیارە بەشانازییەوە دەڵێم، یەكەم كەس بووم، لەكوردستان لەسەردەمی دەسەڵاتی نیشتمانی كوردان هەوڵی تیرۆركردنم بدرێ، چونكە خاوەن پەیامێكی راستگۆم لەگەڵ خۆم و نەتەوەكەم...هتد.
میدیا: بۆ ناوی (مومتاز)ت لێنراوە، تا چەند لەخۆت رازیت بەو كارانەی لەرابردوو كردووتە، چەند كتێب و گۆڤارت هەیە؟
حەیدەری: دیارە مام شێخولئیسلام ئیبراهیم حەیدەری- وەزیری ئەوقاف- هەروەها كوڕەكەی داود حەیدەری ئامۆزام، وەزیری داد بووە، هەڵبەت ئەوانە لەگەڵ ژمارەیەك وەزیر و كاربەدەستی گەورەی ئەو سەردەمە لەبەغدا، تێكەڵاویان هەبووە، یەكێ لەو وەزیرانە ناوی (عەلی مومتاز دەفتەری) دەبێت، جا كەمن لە (8/3/1938) لەدایك بوویمە، داوایان لەباوكم كردووە، كەبەناوی (عەلی مومتاز) بكرێم. دایك و باوكیشم رازی بووینە، ئەوكاتە بەناوی (عەلی مومتاز) تۆماركراوە.. بەڵام من لەكاتی سەرژمێری 1957، داوام لەكاك موهیدب-ی برا گەورەم كرد كە (عەلی)یەكەی لەتۆماری باری كەسیدا بسڕێتەوە. ئەویش واتا كاكم موهیب جێبەجێی كرد. ئەوسا تەنیا (مومتاز)ەكە مایەوە. ئەوەبوو سەرەو بوردەی بەشی یەكەمی پرسیارەكەتان.
بۆ بەشی دووەمی پرسیارەكەتان چەند لەخۆم رازیم؟ ئەوە مەسەلەیەكی رێژەییە، گرنگ ئەوەیە، مرۆڤ بەراستگۆیی بەپێی توانا و دەرفەت لەهەر بوارێكی ژیان بێت، خزمەت بەنەتەوەكەی بگەیێنێ- بەش بەحاڵی خۆم ئەوەی بۆم كراوە، كردوومە و ویژدانی نەتەوەیی و مرۆڤپەروەریم ئاسوودەیە.
لەبارەی ژمارەی كتێب و گۆڤارەكانی كتێبخانەكەم، دەبوایە ئەو بڕگە لەپرسیاری (14) بوایە، بەهەرحاڵ، بەپێی راپۆرتێكی برای بەڕێز كاك غازی حەسەن رۆژنامەنووسی ناسراو، كەلەرۆژنامەی هەولێر گلۆپ بەزمانی ئینگلیزی بڵاوی كردەوە، هاوكات هەمان راپۆرت بەزمانی كوردی لەگۆڤاری شارەوانی دا بڵاوكرایەوە (بە 20 هەزار كتێب و گۆڤار مەزەندەی كردووە)، لەوانەیە كەمتر بێت، یان زیاتر بێت، هەرچۆنێك بێت لە (20) هەزار دانە، ئەمڕۆ نا سبەینێ تێدەپەڕێ.
میدیا: لەگەڵ سەركردەكانی كورد، وەك حەیدەرییەكان و خۆتان پەیوەندیتان لەگەڵ بارزانی و تاڵەبانی و ئۆجەلان چۆنە؟
حەیدەری: لەمەڕ ئەو پرسیارە دەڵێم، لەچوار چێوە گشتییەكەیدا ژمارەیەكی زۆر لەسەركردەكانی باشووری كوردستان، بەتایبەتی ئەو سێ زاتە، كەناویان لەپرسیارەكە هاتوون: (جەنابی مام جەلال، جەنابی كاك مەسعود بارزانی، جەنابی ئۆجەلان (ئاپۆ)) بەچاوێكی رێز و پێزانینەوە، تەماشای خەبات و دەوری بنەماڵەی حەیدەرییان كردووە. ئێمەش لەلای خۆمانەوە، بەگشتی ئەوان وەك سەركردایەتی كوردستان، بەڕێزەوە سەیرمان كردوون. بەڵام سەبارەت بەجەنابی مام جەلال بەتایبەتی هەر لەسەردەمی پاشایەتییەوە لەگەڵ كۆچ كردووی نەمر ساڵح حەیدەری زۆر باش بووە، هەروەها لەگەڵ شەهیدی سەركردە جەمال حەیدەری باش بووە. بەڵام سەبارەت بەجەنابی ئۆجەلانەوە، لەبەرئەوەی لەیەكتری دووربووین- باكوور- هەروەها بەراورد تا رادەیەك لەگەڵ دوو زاتەكەی دیكە تازەیە، بەڵام لەگەڵ ئەوەشدا، من سەرەتای مانگی كانوومی دووەم 1992، لەگەڵ چوار هاوڕێی دیكە بەرێزان (محەمەد ئەمین پێنجوێنی، تاریق جامباز، حەكیم، چالاك محەمەد قەڵادزەیی) لە (سەهل ئەلبیقاع) سەردانی جەنابی ئۆجەلانمان كرد و زۆر بەڕێزەوە پێشوازی لێ كردین، پەیوەندیێكی دۆستانەی خەبات دروست بوو...هتد، بەهەرحاڵ مەسەلەكە، زیاتر لای ئەو سەركردانەیە (هەر هەموویان) چۆن خەبات و قوربانی ئەوانی دیكە هەڵدەسەنگێنن تاكو پەیوەندییەكە دروست و مایەی خۆشحاڵ بێت. واتە بەچاوێكی بەرژەوەندی نەتەوەیی تەماشا بكرێ، نەك بەرژەوەندی حیزبی و سیاسی. گرینگ ئەوەیە بەگشتی لەسر ئاستی نیشتماندا رێزگرتن و پێزانینی خەبات و قوربانی هەركەس و گروپێك، راستگۆیانە بێت و واتا لەپێناو خزمەتی كوردایەتی بێ..!
میدیا: ئەم بارودۆخە نالەبارەی كوردستان تێیكەوتووە، هۆكاری چییە و كێ لێی بەرپرسیارە؟ كەی چاك دەبێ و چۆن؟
حەیدەری:: ئەو بارودۆخە نالەبارەی كوردستان كەتێیكەوتووە دەسەڵاتی سیاسی ئێستای كوردستان، بەهەرسێ بەشییەوە: سەرۆكایەتی كوردستان، پەرلەمان، حكومەتی كوردستان و لەپشت پەردەوەش مەكتەبی سیاسی حیزبە سەرەكییەكان هەر هەموویان پێكەوە بەرپرسیارن..!!
كەی چاك دەبێ؟ ئەوكاتەی دەسەڵاتی سیاسی بەڕاستی بڕوا بەوەی هێنا كەچاكی بكات. ئەوە پێویستە چاكسازییەكی، ریشە و بنەڕەتی، سەرتاسەری لەمەڕ تێكڕای دام و دەزگاكانی كوردستان، لەبەر رۆشنایی بەرژەوەندی باڵای نەتەوەیی و دادپەروەری و یەكسانی: سیاسی، كۆمەڵایەتی، زاستی، كلتوری، مرۆڤپەروەری...هتد دەست پێبكات، ئەوەش پلان و نەخشەیەكی فراوان و بوێرانەی دەوێ.. هتد ئەگەر وا كرا، لەوانەیە لەماوەی یەك دوو ساڵەدا تا رادەیەكی باش چاك بكرێت، ئەگەر نا....؟!
میدیا: دوا وتەتان و سەرنجتان لەسەر (لەبارەی) رۆژنامەكەمان و ماڵپەڕەكەمان چییە؟
حەیدەری: رۆژنامەی میدیا رۆژنامەیەكی رۆشنبیری- نەتەوەییە، تاڕادەیەكی باش لەدەرەوەی بازنەی حیزبایەتی و ناوچەگەرییە، بەڵام پێم باشە، هاوسەنگییەكی پیشەیی رۆژنامەنووسی لەهەواڵەكاندا، بەتایبەتی سەبارەت بەسكرتێری YNDK و هەواڵی دیكەی گرنگی سیاسی هەبێ. واتە هەندێ جار هەواڵ و چالاكییەكانی سەركردایەتی YNDK، دەچێتە خانەی (تەشریفاتی) وەكو رۆژنامەكانی دیكەی حیزبەكانی كوردستان. دەخوازم (میدیا) هەردەم ئاڵا هەڵگری خەباتی نەتەوەیی و ئێش و ئازاری خەڵك بێت. سوپاس.

كۆمێنتت له‌سه‌ر ئه‌م بابه‌ته‌