رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

      میدیا - عومەر ئاوارە

 

ئیسماعیل هەلوب جێگری یەكەمی پارێزگای سەڵاحەدین لە دیدارێكدا لەگەڵ (میدیا) دا تیشك دەخاتە سەر هاتنی داعش بۆ پارێزگاكە و قەزاكانی و ڕێگەنەدانی حكومەتی عێراقی بۆ كردنەوەی فەرمانگە حكومییەكانی قەزای خورماتوو، بە تایبەت پۆلیس و دادگا و جەختیش لەوە دەكاتەوە كە لە ئایندەیەكی نزیكدا پارێزگای سه‌لاحه‌ددین و قەزاكانی لە دەست چەكدارانی داعش ڕزگار دەكرێن.

 

میدیا: لە ئێستادا وەكو پارێزگای سه‌لاحه‌ددین پیلانی ئەوەتان بە دەستەوە هەیە كە لە نزیكترین كاتدا پارێزگاكە لە دەست چەكدارانی داعش ڕزگار بكەن؟

ئیسماعیل هەلوب: بەڵی بەدڵنییاییەوە، نەك تەنها پیلانێك بەڵكو چەندەها پیلان داڕێژاوە، لە ئێستادا بەمەبەستی ڕزگاركردنی پارێزگاكە بەزووترین كات لەدەست چەكدارانی داعش، لە هەمان كاتدا هێزە سەربازییەكانی دەوروبەری بارێزگاكە بەردەوامن لە ڕاوەدونانی چەكدارانی داعش وپاككردنەوەی ناوچەكە لەو چەكدارانە كە ئەو هەڵمەتە سەربازییانە ماوەی چەند ڕۆژێكە و لە یەكەم وێستگەشدا شاری بێجی و پاڵاوگەكەی لە دەست ئەو چەكدارانە دەرهێنران و ئازادكران.

میدیا: دوای ئەوەی پارێزگای سه‌لاحه‌ددین كەوتە دەست چەكدارانی داعش، لە ئێستادا وەكو ئیدارەی پارێزگاكە كارەكانتان لە كوێ بەڕێوە دەبەن؟

ئیسماعیل هەلوب: دوای داگیركردنی پارێزگاكە لە لایەن چەكدارانی داعش دەمودەست ئیدارەی پارێزگاكە بارەگای خۆی گواستەوە بۆ قەزای سامەڕا، هەروەها دوای گەیشتنی ژمارەیەكی زۆری ئاوارەی پارێزگاكەش بۆ هەرێمی كوردستان لە پارێزگای هەولێریش نوێنەرایەتییەكمان كردەوە بەمەبەستی ڕایكردنی كاروباری ئەو ئاوارانە، هەروەهاش لە ئێستادا نوێنەرایەتییەكی دیكەمان لە بەغدای پایتەخت كردۆتەوە ئەویش بە هۆی زۆربوونی پەیوەندییەكانمان بە حكومەتی ناوەندەوە كە ئەوانەی كە ئاماژەم پێدا هەمووی كاتین، هەر كاتێك پارێزگای سەڵاحەدین ( سه‌لاحه‌ددین ) ئازادكرا، ئەوا ئیدارەی پارێزگاكە دەگەڕێتەوە پارێزگاگەولەوەی وەكو جاران دەست بەكاردەبن.

میدیا: كێ هۆكاری سەرەكی داگیركردنی پارێزگای سه‌لاحه‌ددینە لە لایەن چەكدارانی داعش؟

ئیسماعیل هەلوب: ئێمە وەكو ئیدارەی پارێزگای سه‌لاحه‌ددین پێمان وایە كە داگیركردنی پارێزگای سه‌لاحه‌ددین لە لایەن چەكدارانی داعشەوە بۆ ئەو كێشە سیاسی و ئەمنییانەی سەردەمی حكومەتەكەی مالكییە كە نەیتوانی دڵی جەماوەر ڕازی بكات بووە هۆی لە دەستدانی پارێزگای سه‌لاحه‌ددین و هیچ پەیوەندییەكی بە ئیدارەی پارێزگاكەوە نییە.

میدیا: ئایا پێتان وانییە كە پاشماوەكانی ڕژێمی بەعس لە ناو پارێزگاكە ڕۆڵیان گێڕابێت لە كەوتنی پارێزگای سه‌لاحه‌ددین بە دەست چەكدارانی داعش؟

ئیسماعیل هەلوب: ڕژێمی بەعس ڕژێمێكی بنەبڕكراوە و هیچ چالاكییەكی سیاسی لە عێراقدا بە گشتی وپارێزگای سه‌لاحه‌ددین بە تایبەتی نەماوە، ئەوەی لە پارێزگای سه‌لاحه‌ددین ڕوویدا هۆكارە سەرەكییەكەی پاشەكشەی سوپابوو لە بەرامبەر چەكدارانی داعش كە لە باكورەوە هاتنە ناو پارێزگاكە وداگیریان كرد، كە پێش داگیركردنی سه‌لاحه‌ددین موسڵیان لە چەند كاتژمێرێكدا داگیركرد كە ئەمەش بووە هۆی ئەوەی داعش دەسەڵاتی سەربازی بە هێزبێت و بگاتە پارێزگای سه‌لاحه‌ددین ودەستی بە سەردا بگرێت.

میدیا: لە ئێستادا لە پارێزگاكەی ئێوە كێ هاوكاری داعش دەكات ؟

ئیسماعیل هەلوب: بە دڵنییاییەوە چەندین لایەنی سیاسی بەرهەڵست، ئەوانەی كە چاویان بە دیموكراسیەت هەڵنایەت هاوكاری سەرەكی چەكداراتی تیرۆرستی داعشن بۆ ئەوەی ڕێژەیەكی زۆر لە خاكی عێراق داگیر بكات، بە تایبەت پارێزگای سه‌لاحه‌ددین، لەوانەش ژمارەیەك لەو كونە بەعسیانەی كە لە ناوچەكەدا ماون.

میدیا: لە ئێستادا میلیشیا شیعەكانی سنووری قەزای خورماتوو ڕێگری لە خێزانە سوننە كانی گوندەكانی سنوری شارەكە دەكەن بەمەبەستی گەڕانەوەیان بۆ سەر ماڵ وحاڵیان، ئێوە وەكو پارێزگای سه‌لاحه‌ددین هەڵویستان چییە بەرامبەر ئەو ڕێگریكردنە.

ئیسماعیل هەلوب: دوای ئەوەی زۆر شار و شارۆچكە كە لە دەست داعش دابوو، لە لایەن چەكدارانی میلیشیا شیعەكانەوە رزگاركرا، بەڵام لە ناو ئەو میلیشیایانەدا ژمارەكی كەسی خراپ بونە هۆكاری ئەوەی كە ناوی میلشیا خراپ بكەن، بە ئەنجامدانی تاوانی جۆراوجۆر دژ بە هاوڵاتیانی پارێزگای سه‌لاحه‌ددین، زۆرترین ناوچە كە تووشی زەرەر هات گوندەكانی دەوروبەری شاری خورماتوو بو ئەویش لە كاتی ئەو ئۆپەراسێونە سەربازییانە كە لە لایەن سوپا و میلیشیا شیعەكانەوە بۆ شكاندنی ئابڵوقەی چەكدارانی داعش بۆ سەر ئامرلی و رزگاركردنی شارەدێی سڵێمان بێگی سەر بە قەزای خورماتوو كە بەو هۆیەوە ژمارەیەكی زۆر لە گوندەكانی دەوروبەری خورماتوو چۆڵكران و دانیشتووانەكەی ڕوویان لە كەركوك وخورماتوو كردو تاكو ئێستا نەگەڕاونەتەوە كە ژمارەیان شەش هەزار كەس دەبن و بۆ ئەو مەبەستەش داوامان كرد كە ڕێگەیان پێبدرێت بۆ ئەوەی بگەڕێنەوە ناوچەكانیان، بەڵام تاكو ئێستا ڕەزامەندی نیشان نەدراوە لە لایەن لایەنە ئەمنییەكانی ناوچەكەوە،لە گەڵ ئەوەشدا ئەگەر هۆزە سونییەكانی ناوچەكە چەكداریان لە چەشنی چەكدارانی میلیشیا شیعەكانی ناوچەكە دروست بكردایە، ئەوا هەرگیز ناوچەكە پێویستی بە میلیشیای شیعە نەدەبوو بۆ ئەوەی بێت شەڕی داعش لە ناوچەكە بكات، كێشەی گەڕانەوەی ئەو خێزانانە بۆ ناوچەكانیان بڕیارەكەی لە ئەنجومەنی وەزیرانی عێراقەوەیە كە زۆرجار داوامان كردووە هاوكاریمان بكەن، بەڵام تا ئێستا هیچ بڕیارێكیان لەو بارەیەوە نەداوە.

میدیا: ژمارەیەك فەرمانگە لە خورماتوو هەن تاكو ئێستا دەوامیان تێدا ڕاگیراوە، هۆكاری ڕاگرتنی بۆچی لایەك دەگەڕێتەوە؟

ئیسماعیل هەلوب: بە هۆی ئەوەی دۆسێی ئەمنی ناوچەكە بە دەست حكومەتی عێراقییەوەیە ولە ژێر دەستی ئێمەدا نییە، چەندین جار داوامان لە وەزارەتی ناوخۆی عێراق كردووە، بۆ ئەوەی بەڕێوەبەرایەتی پۆلیسی شاری خورماتوو بكرێتەوە، بەڵام تاكو ئێستا وەڵاممان نەدراوەتەوە، هەروەها داوامان لە ئەنجومەنی پارێزگای سه‌لاحه‌ددینیش بۆ ئەو مەبەستە كردووە، بەڵام ئەوانیش لەو بارەیەوە بێ وەڵامن، سەبارەت بە دادگای خورماتووش سەرۆكی دادگای پارێزگای سه‌لاحه‌ددین ئێستا لە بەغدایە و سەرۆكایەتی دادگای پارێزگاكەش داخراوە، كە بە هۆیەوە دەوامی دادگاكان راوەستاوە، هەروەهاش لە شاری خورماتوو دۆخی ئەمنی جێگیر نییە، ئەویش بە هۆی نەبوونی دەزگا ئەمنییەكان بە تایبەت پۆلیس كە ئەمەش كاریگەری تەواوی لە سەر ژیانی هاوڵاتیانی شارەكە دروستكردووە.

میدیا: دەنگۆی ئەوەهەیە كە لە مانگی چواری 2015دا شاری خورماتوو لە سەر پارێزگای سه‌لاحه‌ددین نەمێنێت، ئێوە وەكو ئیدارەی پارێزگا تاچەند ئەو دەنگۆیە بەڕاست دەزانن؟

ئیسماعیل هەلوب: ئێمە وەكو پارێزگای سه‌لاحه‌ددین مامەڵە لە گەڵ یاساو دەستوردا دەكەین نەك لە گەڵ پڕوباگەندە ودەنگۆكان، ئاسان نییە شاری خورماتوو لە پارێزگای سه‌لاحه‌ددین دابڕێت وبخرێتە سەر پارێزگای كەركوك.

كۆمێنتت له‌سه‌ر ئه‌م بابه‌ته‌