رۆژنامەی میدیا

Share this on Faceook

Follow us on Twitter

   هه‌ولێر          دهۆك       سلێمانی
FacebookTwitterGoogle BookmarksPinterest
Pin It

Facebook

Twitter

Google Plus

YouTube

میدیا - كارزانی مامەندپیران

  عەقید (ئیسماعیل عەلی محەممەد) ناسراو بە (ئیسماعیل دەست گەورە) ئامر هێزی دووی فەرماندەیی هەولێر لەدیمانەیەكدا بۆ میدیا تیشك دەخاتە سەر رەوشی پێشمەرگە و هاتنی داعش بۆ ناوچەكەو چۆنییەتی بەرگریكردن و راوەدوونانی داعش و پاككردنەوەی دەڤەرەكە لەم چەتانە.

میدیا: سنووری هێزەكەتان لە كوێوە دەست پێ دەكات و تا كوێیە، ئایا دوای هاتن و هێرشی داعش بۆ ناوچەكەتان بەچ شێوازێك بەرگریدەكەن و چۆن هێرشەكانی داعشتان تێك شكاندووەو پێشمەرگە تا چەند پێشڕەوی كردووە؟
عەقید ئیسماعیل عەلی محەممەد: ئەو سنوورەی بەهێزەكانی ئێمە سپێردراوە كە پارێزگاری لێ بكەن، لەسنووری قەزای مەخمووری سەر بەهەولێر، لە باشووری باقرتەوە دەست پێدەكات تا دەگاتە زێی بچووك، لەم سنوورە هێزەكانمان بڵاو بوونەتەوە و ناوچەكە لەچەكدارانی داعش دەپارێزن، پێشمەرگە زیاتر لەساڵێكە لەم سنوورە هەیە، كە تیرۆریستان دزەیان كردە ئەو ناوچەیە، پێشمەرگە هات بۆ پاراستنی سەروماڵی هاوڵاتیان، بەڵام ئەو كاتە من لێرە ئامر هێز نەبووم، برادەرانی تر لێرە بوون، بەڵام دوای رزگار كردنەوەی قەراج من بوومە ئامر هێزی دوو، هاتمە ناوچەی قەراج، سەبارەت بەرێكخراوی تیرۆریستی داعشیش لەم رۆژەوە دروست نەبووە، پێشتریش بەدەستی ئەو تیرۆریستانە شەهیدمان داوە، بۆ نموونە لەرۆژی هەڵبژاردنی ساڵی پار، دوو برادەرانی ئاسایش و سوپا شەهیدیان داوە، بەر لەهێرش كردنە سەر مەخموور ئەو رێكخراوە تیرۆریستییە شانەی نوستووی لەناوچە عەرەبە سوننە نشینەكان هەبووە و لەوانەیە خۆیان بەمەزڵوم زانیبێ چوونەتە ناو ئەو رێكخراوەو پێیان وابووە هەمان رێكخراوی حكومەتی بەعسە، ئەمانە بەشێكیان بەهەڵە بەهەڵە بەگەر داعش كەوتوون و هەندێكیان نازانن ئەو رێكخراوە بۆچی دروست بووەو، هەر تەنیا بەگەریان كەتوون و بەشێكیان بەعسی كۆنن، ئەوانە قین لەدڵن بەرامبەر كورد و لەسەردەمی بەعسیش بەردوام هەڕەشەیان لەكوردە نیشتەجێبووەكان كەخاكی خۆیانە لێكردوون و ئێستاش بەهەمان شێوە دەیانەوێ هەڕەشە لەكوردان بكەن لەپاڵ رێكخراوی تیرۆریستی داعش و چەندین جار هێرشیان كردووە، بەڵام پێشمەرگەو خەڵكی ناوچەكە بەورەی پۆڵاین و سەركردایەتییەكی بەهێز، رووبەرویان دەبینەوەو چەندین جار تێكمان شكاندوون و هەر جارەی بەشێوەیەك دێن بەڵام ئێمە پیلانەكانیان دەكەینە بڵقی سەر ئاو و هەرەوتەمان كردوون و هەرجارەی هەڵهاتوون چەندین تەرمیان بەجێهێشتووەو بەخۆیان راناگەن لەهەڵاتن و ئێمە بەورەی زۆرەوە رووبەرویان دەبینەوەو ناتوان پێشڕەوی بكەن لەناوچەكەمان و سنووری كاری سەربازی خۆمان زۆر بەچاكی پاراستوەو خەڵكی خۆمان و ناوچەكە زۆر بەرێكوپێكی دەپارێزین و لێناگەڕێین دوژمن پێی بێنێتە ناوخاكمان لەقەراج و شوێنەكانی دیكەش.
میدیا: بۆچی پێشمەرگە سەرەتای هاتنی داعش تووشی كشانەوەی ناچاری بوو، ئەمە جگە لەوەی هێزی زۆر هەبوو لەوێ ئێمە شكاین یان تاكتیك بوو؟
عەقید ئیسماعیل عەلی محەممەد: ئێمە ئامادەی شەڕ نەبووین، بەشێوەیەكی كت و پڕ هێرشیان كردە سەر كوردستان و ئامادە شەڕی ئەوانیش نەبووین و شارەزای شەڕ كردنیان نەبووین، لەبەر ئەوەی هێزێكی چەكداری تازە بوون، لەهەمانكاتدا هێزەكانمان لەشوێنەكانی تر كاری ژینگەپارێزی و مرۆییان دەكرد، چونكە كارمان بەشەڕ نەمابوو حەزیشمان بەشەڕ نەبوو، بەڵام كاتێك رێكخراوێكی تیرۆریستی وەك داعش هێرشی كردە سەرمان دەرگای لێ گرتین، هەرچی پێشمەرگە بوو لەهەر شوێنێك بوو خۆی گەیاندەوە فەرماندەو ئامادەی شەڕ بوو دژی داعش، ئێمەش لەناوچەكە و لەئاكامی هێرشەكانیان زۆر بەوردی لەهەموو روێكەوە ئەوانمان خوێندەوە، لەچۆنیەتی بیركردنەوەیان و شێوازی هێرشكردنیان و جۆری چەكەكانیان و لەپێشدا ئەوان هەر دەیانوت ئێمە شەڕ لەگەڵ كورد ناكەین و بەرەو بەغدا دەڕۆین، پاشان روویانكردە كوردستان، ئەمەش پیلان بوو لەدژمان دارێژرا، بەڵام پێشمەرگە قارەمانەكانی كوردستان، لەخۆبووردوانە بەرگرییان لەخاك و نیشتمان كرد، هەرواش دەكەین و لێناگەڕێین بستە خاكێكی كوردستان لەبندەستی ئەوان بێت.
میدیا: ئایا كورد ئەم شەڕەی لەگەڵ داعش خۆی كردی و بۆ بەرگری بوو لەخاكی عێراق و ئەوان سوڕانەوە یان هەر ئەو شەڕە هیچ پەیوەندییەكی بەئێمەوە نەبوو بەسەرماندا سەپا، تێروانینتان لەم بارەیەوە چییە؟
عەقید ئیسماعیل عەلی محەممەد: داعش هات وڵاتەكەم داگیر بكات، هەرچی دەست بەچەكە لەم رۆژە ئامادەیە شەڕی لەدژ بكات، شەڕ كردنی ئێمە بۆ پاراستنی خاك و نیشتمان و گەل بوو، شەڕێكی ناچاری، كە دەرگای شەڕیان لێگرتین و هیچ هەڵبژاردەیەكی ترمان لەبەردەم نەما جگە لەشەڕ دژی رێكخراوێكی تیرۆریستی، ئەمەش بووەتە هۆی ئەوەی لەلایەن خەڵك باوەڕی تەواوی بەئێمە هەبێت، چونكە بۆ خاك شەڕ دەكەین، لەهەموو دونیاش وایە، هەر هێزێك شەڕی پاراستنی خاك بكات، گەل بەتێكڕاو بەهەموو شێوەیەك پاڵپشتی ئەو هێزە دەكات، لەكوردستانیش هەمان شت لەگۆڕێدایە، پێشمەرگە شەڕی پاراستنی خاك دەكات، لەشاخەوە بگرە تا ئەمڕۆ هەمیشە لەپێناو پاراستنی خاكی كوردستان دژ بەدوژمن ئامادە بووە، كورد هیچ كاتێك حەزی بەشەڕ نەكردووە، بەدرێژایی مێژوو كورد شەڕی بەكەس نەفرۆشتووەو شەڕی لەگەڵ كەس نەكردووە، بەئارەزووی خۆی بەڵكو شەڕی بەسەردا فەرزكراوە و هەموو كات بەرگری لەخۆی كردووە، ئێمەش سەرەتا داخلی ئەو شەڕەی داعش نەبووین، تاوەكو ئەوان هێرشیان كردە سەر ئێمە و بۆیە لێیان هاتینە دەست و هەموویانمان تێكشكاند.
میدیا: چ جیاوازییەك لەنێوان شەڕی پێشمەرگەی جاران و ئێستا هەیە، پێشتر پێشمەرگە بەرۆحییەتی بەرزی كوردایەتی شەڕی كردووە، ئەم رووحیەتە ماوە؟
عەقید ئیسماعیل عەلی محەممەد: جاران لەشكرێكی پارتیزانی بووین، ئێستا لەشكرێكی نیزامی ئامادە كراوە، بەڵام هێشتا ماوە، چونكە وەك دەوڵەت نەناسراوین رێگەمان پێ نەدراوە وەك دەوڵەت مامەڵە بكەین، بەڵام پێشمەرگە بەهەمان رۆحیەت شەڕ دەكات، ئەوەتا بەسەدان كەس رۆژانە دێنە ریزی پێشمەرگە وەك خۆبەخش ئامادەن لەپاڵ پێشمەرگە شەڕ لەدژی داعش و داگیركەران و دوژمنانی كوردستان دەكەن، ئەم رۆحیەتە شۆڕشگێڕی و وڵاتپارێزییە هەموو كات لای پێشمەرگە هەبووەو هەیە، هەر ئەم گیانی شۆڕشگێڕییە بووەتە هۆی پاراستنی كوردستان.
میدیا: سەرەتای هاتنی داعش كێشەی چەكتان هەبوو، ئەو چەكانە داعش هەمووی قورس بوون هی پێشمەرگە چەكی سووك بوون، دوای هاوكاری نێودەوڵەتی بۆ پێشمەرگە، كێشەی چەكتان ماوە یان ئێستا چەكی پێشمەرگەش قورسە؟
عەقید ئیسماعیل عەلی محەممەد: بەڵێ كێشەی كەمی چەكمان هەبوو، ئامادەی شەڕ نەبووین، لەبەرامبەردا سوپای عێراق بەچەند كاتژمێرێك تێك شكاو هەرچی توانای سەربازی لەرووی چەك و ئامێرو سووتەمەنی و ئوتومبێلەوە ئەو سوپایە هەیبوو، كە لەلایەن وڵاتانەوە هاوكاری كرابوو، بەچەكی سووك و مامناوەندو قورس و كەوتە دەست داعش، كە چەكی مۆدێرن بوون، چەند پارێزگایەك بەماوەیەكی زۆر كەم كەوتە دەستیان و دەستیان بەسەر عیتادی سوپای عێراق داگرت، لەدەزگاكانی راگەیاندن گوێ بیست دەبووین دەیانگوت بەیەك شەو دەوڵەتێك لەتەنیشتمان دروست بوو، هێزی سەربازی عێراق خۆی نەگرت، هێزێكی نارێك بوو ئەو هەموو كێشەو گرفتە لەئاكامی سەرهەڵدانی شكانی ئەوان بوو چەك و جبەخانەیەكی زۆریان دەست كەوت و هەر بەم چەكانە لەئێمەیاندا و هێرشیان كردە سەرمان، سەرەتا چەكی رووبەڕوبوونەوەی ئەوانمان نەبوو، بەڵام ئێستا لەهەموو روێكەوە پێشمەرگە كامیلەو چەكەكانمان كاریگەرن تا ئەو ئاستەی تونیومانە داعش باش تێك بشكێنین و ناوچەكەیان لێ پاكبكەینەوە.
میدیا: لەسەرەتای هێرشی داعش، تاوەكو ئێستا كە زۆرجار هێرش دەكەن و جار هەیە هەندێ شوێن دەگرن بەڵام پێشمەرگە لێیان دێتە دەست و دەیانشكێنێ، داعش ئێستا بەهێز بووە یان لاواز بووەو توانای شەڕی نەماوە؟
عەقید ئیسماعیل عەلی محەممەد: بەجێمانی ئەو هەموو چەكە بوو، كە لەپاش سوپای عێراقییەوە جێما ئەوانی بەهێز، ئێستاش ئەو چەكەی لەژێر دەستی داعش دایە بەچارەگێكی ئەوە لەژێر دەستی ئێمە نییە، چونكە كە هێرش دەكەین چەكیان بەجێ دەمێنێت، دەبینین دۆشكەو درع و هەمەر و چەكی جۆراوجۆریان بەجێ دەمێنێت، هەر ئەو چەكانەی خۆیانە ئێمە لەدژی خۆیان شەڕی پێ دەكەینەوە، دوژمن چەكی هەموو عێراقی لەدەستە، ئەو چەكەی بۆ كوردستان هاتووە هێشتا كەمەو پێویستمان بەچەكی زۆرترە، بۆ ئەوەی زیاتر بەسەر دوژمن زاڵ ببین، هەندێك چەكمان لەداعش گرتووە لەوانەیە ئێمە نەزانین بەكاریشی بهێنین، لەبەر ئەوەی ئەو چەكەی لەژێر دەستی پێشمەرگە چەكی رووسی بووە، كە هی ساڵانی حەفتاكانە و بەڵام بەهۆی شكانی زۆریان لەزۆربەی بەرەكانی شەڕ بە بەراورد لەگەڵ پێشتر هێزی داعش لاوازبووەو ئەو توانایەی جارانی بۆ شەڕكردن نەماوە .
میدیا: ئەی عبوەكان دایدەنێنەوە؟ ئەوانیش بیانین یان لەناوەخۆ دروستیان دەكەن و لەدژی پێشمەرگە بەكاریدەهێنن؟
عەقید ئیسماعیل عەلی محەممەد: عبوەكان گەلێك زۆرن، هەر شوێنێك ئازاد دەكەینەوە، كۆمەڵێك عبوەیان لێ چاندووە، بەڵام دەستكردن و هیچ مۆرێكی پێوە نییە، بۆیە پێمان وایە خۆیان ئەو عبوانە دروست دەكەن.
میدیا: خەڵكیش بەخۆبەخش روویان لەسەنگەرەكانی پێشمەرگە كرد، خۆبەخشتان چەند هەیە، ئایا ئەوانەتان لەریزەكانی خۆتان جێكردۆتەوە؟
عەقید ئیسماعیل عەلی محەممەد: خەڵكێكمان لەگەڵ دایە بەخۆبەخش هاتوون و دەستیان داوەتە چەك دژی دوژمن، ئەو خۆبەخشانەش لە وەزارەت ناونووس دەكرێن، ئینجا لەناو هێز جێگایان بۆ دەكەینەوە و وەریان دەگرین، لەبەرئەوەی دەبێت ناویان هەبێت، بەڵام من پێم باشە ئەو خۆبەخشانە سەرەتا مەشقیان پێ بكرێت ئینجا رەوانەی ناو هێزەكانی پێشمەرگە بكرێن، بەمە دەوتوانن باشتر شەڕ بكەن و شارەزاییان هەبێت.
میدیا: خەڵكی ناوچەكە چۆن هاوكاری هێزی پێشمەرگەی كردووە و تا چەند هاوكاری هێزەكانتانە بۆ سەرخستنی پێشمەرگە؟
عەقید ئیسماعیل عەلی محەممەد: خەڵك زۆر باش هاوكارییەكانی دەگەیاندە هێزەكانی پێشمەرگە، ئێستاش بۆ ئەوەی هاوكارییەكارییەكان وەك یەك بگەن، رێكخراوێك بەناوی بنكەی زورگەزراو دامەزرا، هەر كۆمەكییەك دێت لەوێ كۆدەكرێتەوەو بەسەر هێزەكان دابەش دەكرێت، ئەو بنكەیە رۆژانە هاوكارییەكان دەگەیەننە ئێمە، خەڵكیش هەیە سەردانمان دەكات و هاوكارییەكانیان بگەیەننە ئێمە، ئەمەش وا دەكات بەهێزتر بین و زیاتر سوور بین لەسەر پاراستنی ئەو خاكە.
میدیا: رەوش و ورەی هێزی پێشمەرگە چۆنە لەم سنوورە؟
عەقید ئیسماعیل عەلی محەممەد: ئێمە لێرە زۆر باشین، رۆژانە لەدوورەوە تەقە لەیەكتر دەكەین، هەندێك جار بەشە و هێزەكانیان لە شوێنێكەوە دێنن و دەیانەوێت پەلاماری سەنگەرێك بدەن، بەڵام ئێمە هەموو كات ئامادەی رووبەڕووبوونەوەی ئەوانین و تێكیان دەشكێنین، ئێستا پێشمەرگە زۆر بەهێزن، هەرچەندە سەرەتای شەڕی داعش لاوازییەكمان پێوە دیار بوو، بەڵام ئێستا پێشمەرگە لەوپەڕی بەهێزیدایە، پێشمەرگەمان لەگەڵە 20 رۆژە نەچووەتەوە، دەڵێت نەكا هێرش بكەین و فریای شەڕەكە نەكەوم.
میدیا: لەكاتی هێرشدا كەستان لەداعش بەدیل گرتووە عێراقی نەبووبێت؟
عەقید ئیسماعیل عەلی محەممەد: كەسمان بەدیل نەگرتووە كە عێراقی نەبووبێت، بەڵام چەكداری ئەوانمان كوشتووە عێراقی نەبووە، ئەو تەرمانەی كە جێیان دێڵن هەندێكیان خەڵكی ناوچەكەن، بەڵام لەهەمانكاتدا خەڵكی بیانیشی تێدایە، بەروخساریانەوە دیارە عێراقی نین، بەڵام هیچ ناسنامەیەكیان لەگیرفاندا نییە، بیكەینە بەڵگەی ئەوەی خەڵكی كام وڵاتن.
میدیا: هێرشی خۆكوژی داعش چۆنە و لەچ كاتێك ئەنجامیدەدەن؟
عەقید ئیسماعیل عەلی محەممەد: بەڵێ هێرشی خۆ كوژیش دەكەن، ئەو رۆژە تەنها لەگوندی سوڵتان عەبدوڵڵا پێنج جار هەوڵیانداو بەئوتومبێلی بۆمبڕێژ كراو هێرشیان كرد.
میدیا: چەند گوندی كوردی ماوە پێشمەرگە ئازادی بكاتەوە؟
عەقید ئیسماعیل عەلی محەممەد: تەنها لەرۆژئاوای قەراج سێ گوندی كوردی ماوە پێشمەرگەی لێ جێگیر ببێت، ئەوانیش گوندەكانی حوشترالوك و زوڕناو گوندێكی دیكەیە، ئەگینا گشت گوندە كوردییەكانی دیكە لەژێر دەستی خۆمانە، داعش ئێستا ورەی تەواو رووخاوە، لەترسی هێرشی هێزی پێشمەرگە خەندەق لێ دەدات، شەوانە بەدزی لەپێش خۆیان خەندەق لێ دەدەن، بەردەوام تەقەشیان لێ دەكەین و حەفارەیەكیشمان لێ سووتاندوون.
میدیا: ئەو خەندەقانەی ئێوە لێتان داوە تا چەند ئامانجی خۆی پێكاوە؟
عەقید ئیسماعیل عەلی محەممەد: ئەو خەندەقانەی ئێمە لێمان داوە، تەنها بۆ رێگری كردن بووە لە هێرشی خۆكوژی و ئۆتۆمبێلی بۆمبرێژ كراو، تا نەتوانن ئۆتۆمبێلە خۆكوژییەكانیان بگاتە ناو بارەگاو سەنگەرەكانی هێزی پێشمەرگە.
میدیا: فڕۆكەی هاوپەیمانان تاچەند كاریگەری هەبووە؟
عەقید ئیسماعیل عەلی محەممەد: فڕۆكەكانی هاوپەیمانان رۆڵی باشیان هەبووەو بۆردومانی زۆر باش دەكەن، توانیویانە هاوكارێكی باش بن بۆ هێزی پێشمەرگە بۆ لێدانی بنكەو بارەگاكانی داعش.
میدیا: عەرەبی سوننە بۆچی چوونە پاڵ داعش؟
عەقید ئیسماعیل عەلی محەممەد: ئەوان بەهەڵە چوونە پاڵ داعش، پێیان وابوو لەو بارودۆخە رزگاریان دەبێت و لەژێر دەستی مالیكی دێنە دەرەوە، كەچی رێكخراوێك هات، سەد خۆزگە بەمالیكی، ئەوانە مرۆڤایەتی نازانن، گوندەكانیان پێ چۆڵ كردن، عەرەبی سوننە ئێستا زۆر لێیان بێزارن، لەوانەیە گەنجێك چووبێتە پاڵ داعش، ئێستا داعش لەگوندە عەرەبییەكان دەستی بەدزی و تاڵان كردووە، رۆژانە زانیاریمان بۆ دێت كە بیر دەردەكەن، دەرەی خەڵك دەدورنەوەو تاڵانی دەكەن، محەویلەی كارەباو لێفەو بەتانی و هەرچی بكەوێتە بەردەستیان دەیبەن.

كۆمێنتت له‌سه‌ر ئه‌م بابه‌ته‌